ខេត្តព្រះសីហនុ ៖ ទំនប់បង្ហៀរសម្តេចហ៊ុនសែនទំហំប្រមាណ៣០ហិកតាដែលជាបឹងស្តុកទឹកស្អាតដ៏សំខាន់ សំរាប់ផ្គត់ផ្គង់ប្រជាពលរដ្ឋស្រុកស្ទឹងហាវប្រើប្រាស់នោះ ក្រោយពីក្រសួងឧស្សាហកម្ម និង សិប្បកម្មសំរេចប្រគល់សិទ្ធិគ្រប់គ្រងមកអោយមន្ទីរឧស្សាហកម្មនិងសិប្បកម្មខេត្តព្រះសីហនុវិញ គេសង្កេតឃើញថា សកម្មភាពនៃការជីកកកាយដើម្បីធ្វើអាជីវកម្មចិញ្ចឹមត្រី ក៏ដូចជាការចាក់ដីលុបលើដីចំណីបឹង បានកើតមានជាបន្តបន្ទាប់គួរអោយកត់សម្គាល់ ដោយបញ្ហានេះ នៅមិនទាន់មានមន្ត្រីជំនាញពាក់ព័ន្ធមួយណាចុះទៅធ្វើការហាមឃាត់ ឬ មានវិធានការទៅតាមផ្លូវច្បាប់នៅឡើយទេ។
លោក ប្រាក់ ប្រាកដ ប្រធានមន្ទីរឧស្សាហកម្ម និង សិប្បកម្មខេត្តព្រះសីហនុ បានអោយដឹងថា សកម្មភាពនៃការចាក់លុបដីបឹងទំនប់បង្ហៀរទឹកសម្តេចហ៊ុនសែន ខាងលើ ពិតជាមានមែន ប៉ុន្តែត្រង់ថាការចាក់ដីនោះ ឬ ការជីកស្រះសំរាប់ចិញ្ចឹមត្រីទាំងនោះ វាប៉ះពាល់ទៅលើដីបឹងឬដីចំណីបឹងក្នុងកំរិតណានោះទេ។ លោកប្រាក់ប្រាកដបានបន្តទៀតថា ជុំវិញបញ្ហានេះលោកបានស្នើសុំអោយអាជ្ញាធរស្រុកស្ទឹងហាវចុះធ្វើការពិនិត្យនិងមានវិធានការរួចហើយដើម្បីចាត់ការតាមផ្លូវច្បាប់។ ហើយបញ្ហានេះ លោកនឹងអោយមន្ត្រីជំនាញភូមិបាលស្រុកធ្វើការបញ្ជាក់អោយច្បាស់លាស់ពីព្រំបឹងដីចំណីបឹងដើម្បីងាយស្រួលក្នុងការគ្រប់គ្រងទៅថ្ងៃក្រោយ។
លោក ឆាយ សុគន្ធដា អភិបាលនៃគណៈអភិបាលស្រុកស្ទឹងហាវបានបញ្ជាក់ប្រាប់អោយដឹងថា ជុំវិញបាតុភាពជីកស្រះចិញ្ចឹមត្រី ឬ ចាក់លុបដីបឹងទឹកស្អាតខាងលើ លោកបានអោយមន្ត្រីជំនាញរបស់ស្រុកចុះទៅពិនិត្យមើលជាក់ស្តែងហើយ ប៉ុន្តែលទ្ធផលនៅមិនទាន់ដឹងថាអ្នកដែលចាក់ដីទាំងនោះក៏ដូចជាអ្នកជីកស្រះសំរាប់ចិញ្ចឹមត្រីគេធ្វើលើដីដែលមានកម្មសិទ្ធិរបស់គេឬលើដីចំណិបឹងនោះទេ ដូច្នេះកិច្ចការនេះរង់ចាំមន្ត្រីជំនាញភូមិបាលធ្វើការវាស់វែងកំណត់អោយបានច្បាស់ជាមុនសិនពាក់ព័ន្ធនឹងព្រំទឹកបឹង ហើយបើពិនិត្យឃើញថា ការចាក់ដី ក៏ដូចជាការជីកស្រះសំរាប់ចិញ្ចឹមត្រីទាំងនោះវាជាការរំលោភលើដីបឹង អាជ្ញាធរស្រុកនឹងមានវិធានការតាមផ្លូវច្បាប់ភ្លាម ។
លោក សិន សឿន មន្ត្រីភូមិបាលស្រុកស្ទឹងហាវ ជុំវិញបញ្ហាបឹងខាងលើនេះ លោកបានធ្វើការបញ្ជាក់ថា ដីនៅជុំវិញបឹងមួយចំនួនមានប្លង់កម្មសិទ្ធិឯកជនអស់ទៅហើយ និងមួយចំនួនទៀតនៅមិនទាន់មាននៅឡើយទេ ។ ចំពោះការចេញប្លង់នៅលើដីតំបន់បឹងទឹកស្អាតខាងលើ ប្លង់នីមួយៗបានទុកគំលាតចំណីបឹងប្រវែងពី៨ម៉ែត្រទៅ១០ម៉ែត្រដោយចំណីបឹងដែលទុកនោះបច្ចុប្បន្នកន្លែងខ្លះបានធ្វើជាទំនប់រួចហើយ រួចហើយដើម្បី ខណ្ឌព្រំដីផងដែរ។
