ភ្នំពេញ ៖ រថយន្តដឹកឥដ្ឋ ចំណុះ៥តោន បើកបរដោយ យុវជនម្នាក់ កាលពីវេលាម៉ោង ៩និង១០ នាទី ថ្ងៃអង្គារ ទី១៣ ខែឧសភា ឆ្នាំ២០១៤ នេះ ពេលបើកចុះពីលើស្ពានព្រះ មុនីវង្សថ្មី ដោយហ្វ្រាំមិនសុី បានជ្រុលទៅបុករះម៉ូតូចំនួន ៣គ្រឿង និងរថយន្ត២គ្រឿង បណ្តាលឲ្យមនុស្ស៥នាក់រង របួសស្រាល ។ ចំណែកអ្នកបើករថយន្ត បានភៀសខ្លួនបាត់ភ្លាមៗផងដែរ ។
សមត្ថកិច្ចនៅកន្លែងកើត ហេតុ បានឲ្យដឹងថា ដំបូងឡើយគេបានឃើញរថយន្តបង្កហេតុ បានបើកចុះ ស្ពាន ពី លិចមកកើត ដោយឆ្លងស្ពានព្រះមុនីវង្សថ្មី ឆ្ពោះទៅផ្លូវជាតិលេខ១ ប៉ុន្តែពេលចុះពីស្ពាន ក្នុងល្បឿនយ៉ាងលឿនស្លេវ ហើយហ្វ្រាំងមិនសុី ស្របមានអ្នកដំណើរ នៅខាងមុខនោះ បណ្តាលឲ្យបុករះ ម៉ូតូ ៣គ្រឿង ហើយក្នុងចំណោម ម៉ូតូទាំ៣គ្រឿងនោះ មាន១គ្រឿង ត្រូវរងការខូចខាតធ្ងន់ធ្ងរ ២គ្រឿង ខូចខាតបន្តិចបន្តួច ចំណែករថយន្តមួយគ្រឿង ខូចខាតផ្នែកខាងក្រោយធ្ង់ផងដែរ
ប៉ុន្តែមិនមានអ្នករងបួសធ្ងន់ធ្ងរនោះទេ ដោយហេតុថា ខណ:រថយន្តកំពុងចុះពីលើស្ពានបានបន្តិច អ្នកបើកបររថយន្ត បានស្រែកប្រាប់អ្នកធ្វើដំណើរ និងព្រូ ថារថយន្តហ្វ្រាំងមិនស៊ី ជួយចុះរកកំណល់កលផង ។ សាក្សីបន្តថា ខណ:កំពុងស្រែកផង និងមានអ្នកលោតចុះរក ដុំឈើកលផងនោះ រថយន្តក៏បានជ្រុលបុករះម៉ូតូ ៣គ្រឿង និងរថយន្ត ២គ្រឿង ដែលកំពុងធ្វើដំណើរ នៅខាងមុខរថយន្តបង្កនោះ បណ្តាលដួលរណូករណែល ពេញលើស្ពានតែម្តង ។
សាក្សីបានរៀបរាប់ទៀតថា ខណ:អ្នកបើកបររថយន្តបង្ក ស្រែកប្រាប់ឲ្យអ្នកដំណើរ ចៀស និងអែបខាងនោះ មានម្ចាស់ម៉ូតូ ដែលរថយន្ត បុកនោះ បានលោតចេញពី លើម៉ូតូព្រមគ្នាដែរ ជាហេតុ រថយន្តបានកិនម៉ូតូ និងបានរថយន្ត១គ្រឿង ដែលនៅពីមុខជួយរង ទប់ល្បឿនរថយន្តដឹកឥដ្ឋផងនោះ ទើបរថយន្តបង្កអស់ល្បឿន នៅលើស្ពាន ដោយមិនជ្រុល ទៅមុខទៀត ទើបមិនបណ្តាលឲ្យរងគ្រោះថ្នាក់ច្រើនជាងនេះ ។
យោងតាមការនិយាយប្រាប់ របស់កម្មករជញ្ជូនឥដ្ឋ ដែលរួមដំណើរនៅលើរថយន្តដឹកឥដ្ឋ បានឲ្យដឹងថា អ្នកបើកបររថយន្ត មាន ឈ្មោះ ឌិន អាយុជាង២០ឆ្នាំ ស្នាក់នៅភូមិព្រែកអញ្ចាញ ហើយរថយន្តនេះ ក៏ដឹកឥដ្ឋពី ព្រែកអញ្ចាញ យកមកដាក់ ដេប៉ូេបស់ឈ្មោះ ហៃ សុគន្ឋ នៅច្បារអំពៅ ។ ក្រោយកើតហេតុ គេសង្កេតឃើញសមត្ថកិច្ចជាច្រើននាក់ រួមទាំងលោក ពៅ ហួត ចៅសង្កាត់ច្បារអំពៅទី១ លោកនាយប៉ូស្តិ៍ច្បារអំពៅទី១ បាននាំគ្នាចុះទៅជួយ អន្តរាគមន៍ នៅកន្លែងកើតហេតុ និងបញ្ជូនរថយន្តបង្កទៅទុក នៅអធិការខណ្ឌនគរបាល ខណ្ឌមានជ័យ ដើម្បីដោះការខូចខាត ជាក្រោយ។
ក្នុងករណីគ្រោះថ្នាក់ ដ៏រន្ឋត់ញាប់ញ័រ បង្កឲ្យម៉ូតូ ខាតខាត ៣គ្រឿង និងរថយន្ត ២គ្រឿងនេះ ក្នុងនោះ ទី១-ម៉ូតូសង់សេ១២៥ ពណ៌ខ្មៅ ពាក់ស្លាកលេខ ភ្នំពេញ 1CI-2916 បើកបរដោយបុរសម្នាក់ ឈ្មោះ ស៊ត់ សុឃីម អាយុ ៣៨ឆ្នាំ ជាងជួសជុលរថយន្ត ស្នាក់នៅផ្ទះជួល ភូមិបឹងឈូក សង្កាត់និរោធ, ទី២-ម៉ូតូម៉ាកវ៉េវ ពណ៌ត្រួយចេក ពាក់ស្លាកលេខ ភ្នំពេញ 1M-9771 បើកដោយយិវជន ឈ្មោះ មុត សានិត អាយុ ២៤ឆ្នាំ ជាបុគ្គលិករោងចក្រទឹកសុទ្ឋៀនៅចំការដូង ស្នាក់នៅសង្កាត់បឹងត្របែក
ខណ្ឌចំការមន និងទី៣-ឈ្មោះ សុិន រដ្ឋា អាយុ ២៦ឆ្នាំ ជាងបាញ់ថ្នាំ ស្នាក់នៅភូមិអូរអណ្តូង សង្កាត់ព្រែកប្រា ខណ្ឌមានជ័យ ។ ចំណែករថយន្ត រងគ្រោះ ម៉ាកមីតស៊ុយមីតស៊ី ជារថយន្តក្រុមហ៊ុនកូប៊ូតា បើកបរដោយបុរសម្នាក់ ឈ្មោះ យឹម ដារា អាយុ ៣០ឆ្នាំ ស្នាក់នៅសង្កាត់ ព្រែកលៀប ខណ្ឌជ្រោយចង្វា និងរថយន្ត តួរីស ១គ្រឿងទៀត ខូចខាត ផ្នែកខាងក្រោយទាំង២គ្រឿងប៉ុន្តែមិនបណ្តាលឲ្យមនុស្ស រងគ្រោះថ្នាក់ដល់អាយុជីវិត នរណាម្នាក់ទេ ។
សមត្ថកិច្ចបន្តទៀតថា ចំពោះរថយន្តបង្ក ម៉ាកគា ពាក់ស្លាលេខ ព្រៃវែង 3A-0228 បើកបរដោយឈ្មោះ ឌិន ។ ក្រោយកើតហេតុ រថយន្តបង្ក និងម៉ូតូ រថយន្តរងគ្រោះ នគរបាលមូលដ្ឋាន យកទៅរក្សាទុកនៅអធិការដ្ឋាននគរបាលខណ្ឌមានជ័យ ដើម្បីដោះស្រាយសំណង ដល់ជនរងគ្រោះជាក្រោយ ។
