ខេត្តស្ទឹងត្រែង៖ជនសង្ស័យម្នាក់ត្រូវបានសមត្ថកិច្ចឃាត់ខ្លួនតាមដីការបង្គាប់លេខ៥៧៧ចុះថ្ងៃទី២១ខែមករាឆ្នាំ២០១៥របស់លោកស្រីបេ គឹមយាង ចៅករមស៊ើបសួរនៃសាលាដំបូងខេត្តស្ទឹងត្រែង ពាក់ព័ន្ធនិងករណីជួញដូរគ្រឿងញៀនជាង១គីឡូក្រាម ដែលសមត្ថកិច្ចបានឃាត់
ខ្លួនមនុស្ស៣នាក់ កាលពីខែមករាឆ្នាំ២០១៥កន្លងទៅ។ករណីឃាត់ខ្លួនជនសង្ស័យតាមដីការបង្គាប់របស់តុលាការ បានធ្វើឡើងកាលរសៀលថ្ងៃទី២៧មករា២០១៦ត្រង់ចំណុចផ្លូវក្នុងក្រុងមួយកន្លែង ខណៈជនសង្ស័យ កំពុងបើកបររថយន្ត ស្ថិតក្នុងភូមិស្រែពោធិ៍សង្កាត់ស្រះឬស្សី ក្រុង ខេត្តស្ទឹងត្រែង។សមត្ថកិច្ចការិយាល័យប្រឆាំងគ្រឿងញៀនខេត្តបានអោយដឹងថាជនសង្ស័យដែលសមត្ថកិច្ចឃាត់ខ្លួនតាមដីការនោះមានឈ្មោះលឿង ហៅ ខុងលឿង ហៅ លឿង ចៃ ភេទប្រុសអាយុ៥៦ឆ្នាំរស់នៅភូមិវ៉ើនខាំ ស្រុកខូង ខេត្តចម្ប៉ាសាក់ ប្រទេសឡាវ។
គួររំលឹកផងដែរថាកាលពីថ្ងៃទី២៣មករា២០១៥កម្លាំងនគរបាលការិយាល័យ ប្រឆាំងគ្រឿងញៀនខេត្តបានបើកប្រតិបត្តិការចាប់ខ្លួនជនសង្ស័យចំនួន៣នាក់ដែល មាន១ឈ្មោះ លីវ ហ្វែន ភេទប្រុស អាយុ៦៤ឆ្នាំ ជនជាតិចិនមុខរបរមេការភោជនីដ្ឋានចិន(ស៊ឺ ហាយ) មានទីលំនៅភូមិលើ សង្កាត់ស្រះឬស្សី ក្រុងស្ទឹងត្រែង២ ឈ្មោះស៊ីម សាវឿន ភេទប្រុសអាយុ៥២ឆ្នាំមានមុខរបរ យោធិន យោធភូមិភាគ១ ទីលំនៅភូមិលើ សង្កាត់ស្រះឬស្សី ក្រុងស្ទឹងត្រែង និងទី៣ ឈ្មោះ ចែវ ស៊ីនអាន ភេទប្រុសជនជាតិចិនកាត់ខ្មែរ អាយុ៥៩ឆ្នាំមានទីលំនៅភូមិលើ សង្កាត់ស្រះឬស្សី ក្រុងស្ទឹងត្រែង។
ជនសង្ស័យទាំង៣នាក់ខាងលើនេះ ត្រូវបានលោកស្រី បេ គឹមយាង ចៅក្រមស៊ើបសួរនៃសាលាដំបូងខេត្តស្ទឹងត្រែង បានចោទពីបទរក្សាទុក ដឹកជញ្ជូន ឬជួញដូរដោយខុសច្បាប់នូវសារធាតុញៀន ប្រព្រឹត្តនៅភូមិថ្មលាត សង្កាត់ស្រះឬស្សី ក្រុងស្ទឹងត្រែង កាលពី២៣មករា២០១៥ ជាមួយគ្រឿងញៀនប្រភេទមេតំហ្វេតាមីន(ICE)ចំនួន១១៩១,២ក្រាមដែលបានឆ្លើយថា បានទិញពីឈ្មោះលឿង ក្រោយពីតុលាការចេញដីការបង្គាប់អោយចាប់ខ្លួនជនសង្ស័យខាងលើអស់រយះពេល១ឆ្នាំ៧ថ្ងៃ ជនសង្ស័យខាងលើត្រូវបានចាប់ឃាត់ខ្លួននៅចំណុចខាងលើនោះតែម្តង។នៅព្រឹកថ្ងៃទី២៨មករានេះ ជនសង្ស័យដែលត្រូវបានសមត្ថកិច្ចចាប់ឃាត់ខ្លួនតាមដីការនោះ ត្រូវបានកម្លាំងជំនាញបញ្ជូនទៅតុលាការដើម្បីចាត់ការបន្តតាមនីតិវិធី៕
