ភ្នំពេញ ៖ បុរសម្នាក់ក្នុងចំណោម២នាក់ត្រូវបាននគរបាលប៉ុស្ដិ៍ចោមចៅចាប់ឃាត់ខ្លួនបានភ្លាមៗបន្ទាប់ពីបង្ក ហិង្សាវាយបំផ្លាញទ្រព្យសម្បត្ដិអ្នកដទៃបណ្ដាលឱ្យខូចខាតយ៉ាងដំណំ ខណៈដែលបុរសទាំង២នាក់នេះខឹងជនរងគ្រោះដែល ជិះម៉ូតូរ៉ឺម៉កចូលក្នុងផ្ទះហើយមិនព្រម បិទទ្វារឱ្យបានត្រឹមត្រូវ ។ ហេតុការណ៍នេះបានកើតឡើងនៅ វេលាម៉ោង១០យប់ថ្ងៃទី១១ ខែឧសភា ឆ្នាំ២០១៤ នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ ។ ជនសង្ស័យដែលត្រូវនគរបាលឃាត់ខ្លួននេះមានឈ្មោះ សាន់ យូចិត្ដ ភេទប្រុស អាយុ៤០ឆ្នាំ មុខរបរកម្មករសំណង់ ស្នាក់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ និងឈ្មោះ ឡុង វណ្ណៈ អាយុ៣៧ឆ្នាំ នគរ បាលនាយកដ្ឋានបេតិកភ័ណ្ឌជាតិរស់នៅភូមិព្រៃព្រីងខាងជើង សង្កាត់ចោមចៅ ខណ្ឌពោធិ៍សែនជ័យ(គេចខ្លួន) ។
រីឯជនរងគ្រោះឈ្មោះ គង់ សាវង្ស ភេទប្រុស អាយុ៣៥ឆ្នាំ មុខរបររត់ម៉ូតូ រ៉ឺម៉ក មានទីលំនៅផ្ទះជួល ភូមិព្រៃព្រីង ខាងជើង សង្កាត់ចោមចៅខណ្ឌពោធិ៍សែនជ័យ ។ ប្រភពព័ត៌មានពីជនរងគ្រោះបានឱ្យដឹងថា មុនពេលកើតហេតុជនសង្ស័យ ទាំង២នាក់កំពុងអង្គុយផឹកស្រាជាមួយ មិត្ដភក្ដិ ស្ថិតនៅផ្ទះជួលចំណុចកើត ហេតុខាងលើ ។
លុះមួយសន្ទុះក្រោយ មករូបគាត់បានវិលត្រឡប់ពីរកស៊ីរត់ ម៉ូតូរ៉ឺម៉ក ហើយបានជិះចូលទៅផ្ទះជួល ខាងលើដោយភ្លេចចុះទៅបិទទ្វាររបងផ្ទះ។ពេលនោះស្រាប់តែជនសង្ស័យ២នាក់ បានស្រែកជេរបញ្ចោរនិងស្ដីបន្ទោសថា គាត់ចេញចូលផ្ទះមិនព្រមបិទទ្វាររបង ព្រមទាំងឱ្យគាត់ទៅសូមទោសពួកគេទៀត ផង ។ ដោយយល់ឃើញថា កុំឱ្យមាន រឿងវែងឆ្ងាយក៏ចូលទៅសុំទោសជន សង្ស័យខាងលើរួចក៏ដើរទៅជជែកគ្នាលេង ជាមួយអ្នកជិតខាងក្បែរនោះ ។
មួយ សន្ទុះក្រោយមកស្រាប់តែបក្ខពួកម្នាក់ ទៀតបានកាន់ដាវកែច្នៃមកគំរាមកាប់សម្លាប់រូបគាត់រួចចូលទៅដេកបាត់ទៅ ។ ចំណែកជនសង្ស័យម្នាក់ទៀតជាកូនម្ចាស់ផ្ទះបានយកដាវកែច្នៃមកកាប់រ៉ឺម៉ក និងម៉ូតូរបស់គាត់បណ្ដាលឱ្យខូចខាតបែក ក្បាល ចង្កៀងម៉ូតូ និងបែកស្លាកយីហោខាងក្រោយរ៉ឺម៉កព្រមទាំងចាក់ទម្លុះដំបូល រ៉ឺម៉កខូចខ្ទេចខ្ទីទើបពួកគេគេចខ្លួនបាត់ទៅ ។
ជនរងគ្រោះបានឱ្យដឹងទៀតថា បន្ទាប់ ពីជនសង្ស័យបំផ្លាញទ្រព្យសម្បត្ដិរបស់ គាត់និងបាននាំគ្នាគេចខ្លួនអស់ទៅ ទើប រូបគាត់ទៅដាក់ពាក្យបណ្ដឹងនៅនគរបាល ប៉ុស្ដិ៍ហើយមកដល់ថ្ងៃទី១២ ខែឧសភា ឆ្នាំ២០១៤ រូបគាត់បានឃើញជនសង្ស័យ ម្នាក់ឈ្មោះ សាន់ យូចិត្ដ ដើរមកបន្ទប់ ជួលត្រង់កន្លែងកើតហេតុក៏ឃាត់ខ្លួនឱ្យនគរបាលតែម្ដងទៅរួមទាំងដកហូតបាន វត្ថុតាងមានដាវកែចៃមួយដើមផង ។ បច្ចុប្បន្នជនសង្ស័យត្រូវបាននគរបាល ប៉ុស្ដិ៍ចោមចៅកសាងសំណុំរឿងបញ្ជូនទៅ អធិការដ្ឋាននគរបាលខណ្ឌពោធិ៍សែនជ័យ ដើម្បីចាត់ការបន្ដ ៕
