ភ្នំពេញ ៖ រណ្តៅដីមួយកន្លែងដែលនៅក្បែរនឹងវត្តភ្នៀតសិម្មលី នៅក្នុងភូមិស្រែអំពិល សង្កាត់ស្នោរ ខណ្ឌពោធិ៍សែនជ័យ បាននឹងកំពុងតែអាជីវកម្មជីកយ៉ាងគគ្រឹកគគ្រេង ដោយមានរថយន្តធនធំៗដឹកបន្តកន្ទុយគ្នា ប៉ុន្តែបែរជាអាជ្ញារខណ្ឌមើលមិនឃើញទៅវិញ ។ បើតាមប្រភពពត៌មានមួយចំនួនបានលួចបង្ហើបថា ម្ចាស់រណ្តៅដីដ៏ធំខាងលើនេះមានឈ្មោះ ទី និងជាអ្នកកាងនៅទីនោះតែម្តង ដោយបាននឹងកំពុងតែជីកមានទំហំធំល្វើងល្វើយ និងមានជម្រៅជ្រៅគួរឱ្យកត់សម្គាល់ ដែលមើលទៅគួរឱ្យខ្លាច ហើយមិនខ្លាចញញើត និងអាជ្ញាធរបន្តិចណាឡើយ ដោយត្រូវបានគេសង្ស័យថា ទំនងជាត្រូវរ៉ូវគ្នាជាមួយអាជ្ញាធរមូលដ្ឋាន បានជាបណ្តែតបណ្តោយដូច្នេះ ។
ប្រជាពលរដ្ឋដែលធ្វើដំណើរ រស់នៅក្បែរនោះ មានការព្រួយបារម្ភយ៉ាងខ្លាំងចំពោះរថយន្តដឹកដីធនធំ ដែលសព្វថ្ងៃបាននឹងកំពុងតែបំផ្លាញផ្លូវ ជាពិសេសគ្រោះថ្នាក់ចរាចរណ៍តែម្តង ដោយសារតែរថយន្តទាំងនោះបើកលឿនៗ អាចបង្កជាគ្រោះថ្នាក់ចរាចរណ៍ផ្សេងៗ ជាពិសេសគឺកូនតូចៗរបស់ពួកគាត់តែម្តង ហើយប្រជាពលរដ្ឋបានស្នើរឱ្យអាជ្ញាធរខណ្ឌ មេត្តាគិតគូរពីបញ្ហាខាងលើនេះផង ជាពិសេសលោក ហែម ដារិទ្ឋ អភិបាលខណ្ឌ តែម្តង ។
សូមបញ្ជាក់ថា នៅក្នុងមូលដ្ឋានខណ្ឌពោធិ៍សែនជ័យ មិនត្រឹមតែមានរណ្តៅដីមួយនេះនោះទេ គឺនៅមានរណ្តៅដីធំៗជាច្រើនទៀត ដែលកំពុងតែបើកអាជីវកម្មជីកយកដីលក់ ប៉ុន្តែអាជ្ញាធរមិនមានចំណាត់ការទាល់តែសោះ ៕
