ខេត្តសៀមរាប នៅរដ្ឋបាលសាលាខេត្តសៀមរាបនាព្រឹកថ្ងៃទី០៥ខែកុម្ភះឆ្នាំ២០១៦នេះ មានបើកកិច្ចប្រជុំត្រួតពិនិត្យលទ្ធផលការងារគណៈកម្មាធិការពិគ្រោះយោបល់កិច្ចការស្ត្រីនិងកុមារ ឆ្នាំ២០១៥ និង លើកទិសដៅបន្តឆ្នាំ២០១៦ ក្រោមអធិបតីភាបលោក ប៊ុន ថាប្ញទ្ធិ អភិបាលរងនៃគណៈអភិបាលខេត្ត លោក អ៊ឹង ហឿន សមាជិកក្រុមប្រឹក្សាខេត្ត ដោយមានការអញ្ជើញចូលរួម ពីសំណាក់ឯកឧត្តម លោកជំទាវ អស់លោក លោកស្រីជាសមាជិកគណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត ក្រុង ស្រុក និង មន្ទីរ អង្គភាពពាក់ព័ន្ធ មន្ត្រីកិច្ចការនារីនិងកុមារ ឃុំ សង្កាត់ និង អង្គការដៃគូចូលរួមផងដែរ ។ 
ក្នុងកិច្ចស្វាគមន៍របស់លោកស្រី ស៊ិន ណម ប្រធានគណៈកម្មាធិការពិគ្រោះយោបល់កិច្ចការស្ត្រីនិងកុមារនិង ជាសមាជិកក្រុមប្រឹក្សាខេត្ត ក៏បានគូសបញ្ជាក់ពីគោលបំណងនៃកិច្ចប្រជុំ គឺដើម្បីជាការឆ្លុះបញ្ចាំង ត្រួតពិនិត្យ និង វាយតម្លៃការអនុវត្តផែនការការងារនិង ផែនការថវិកាឆ្នាំ២០១៥របស់គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត ហើយក៏ជាការផ្តល់ឱកាសដល់អ្នកពាក់ព័ន្ធ សំខាន់គណៈកម្មាធិការពិគ្រោះយោបល់កិច្ចការស្ត្រីនិងកុមារក្រុង ស្រុក និងគណៈកម្មាធិការកិច្ចការនារីនិងកុមារឃុំសង្កាត់បានធ្វើការពិភាក្សាអំពីបទពិសោធន៍ការងារ បញ្ហាប្រឈមនានាដែលបានជួបប្រទះសម្រាប់ជាបទពិសោធន៍ក្នុងការគ្រប់គ្រងអនុវត្តផែនការសកម្មភាពនិង ផែនការថវិកាឆ្នាំ២០១៦ ។
មានប្រសាសន៍បើកកិច្ចប្រជុំនោះក្នុងនាមលោកបណ្ឌិត ឃឹម ប៊ុនសុង អភិបាលនៃគណៈអភិបាលខេត្ត លោក ប៊ុន ថាប្ញទ្ធិ ក៏បានធ្វើការកោតសរសើរ ពីលទ្ធផលនៃកិច្ចខិតខំប្រឹងប្រែង ក្នុងការអនុវត្តតួនាទី ភារកិច្ចរបស់ខ្លួន របស់គណៈកម្មាធិការពិគ្រោះយោបល់កិច្ចការស្ត្រីនិងកុមារខេត្ត និង អ្នកពាក់ព័ន្ធទាំងអស់ក្នុងរយៈពេលមួយឆ្នាំនេះ ដើម្បីលើកកម្ពស់នូវការយល់ដឹងពីតម្រូវការរបស់ស្ត្រី និង កុមារ ព្រមទាំងបង្កើនភាពអង់អាចដល់ស្ត្រី ក្នុងក្របខណ្ឌ នៃរដ្ឋបាលថ្នាក់ក្រោមជាតិ ។ ឯកឧត្តមបានបន្តទៀតថា ការអនុវត្តតួនាទី ភារកិច្ចទទួលបានជោគជ័យ និង មានប្រសិទ្ធភាព ក៏ដោយមានកិច្ចគាំទ្រ សហការល្អរបស់ស្ថាប័នពាក់ព័ន្ធ ដៃគូអភិវឌ្ឍន៍ និង អង្គការសង្គមស៊ីវិល។ លោក ប៊ុន ថាប្ញទ្ធិ ក៏គូសបញ្ជាក់ថា កិច្ចប្រជុំនេះនឹងឆ្លុះបញ្ចាំងនូវវឌ្ឍនភាព ក្នុងការបោះជំហានទៅមុខ លើការ អនុវត្តតួនាទី ភារកិច្ចរបស់គណៈកម្មាធិការពិគ្រោះយោបល់កិច្ចការស្ត្រីនិងកុមារ ដើម្បីសម្របសំរួល ផ្តល់យោបល់ ដល់ក្រុមប្រឹក្សាខេត្ត គណៈអភិបាលខេត្តអនុវត្តតួនាទី ភារកិច្ចចាប់តាំងពីអាណត្តិទី១ចូលដល់អាណត្តិទី២ ក្នុងការ អនុវត្តយុទ្ធសាស្ត្រចតុកោណរបស់រាជរដ្ឋាភិបាល ដំណាក់កាលទី៣ នីតិកាលទី៥ នៃរដ្ឋសភា គោលនយោបាយ កំណែទម្រង់វិមជ្ឈការ និង វិសហមជ្ឈការ កម្មវិធីជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ស្របតាមផែនការអភិវឌ្ឍន៍ខេត្តនិងកម្មវិធីវិនិយោគខេត្តបីឆ្នាំរំកិល។ ក្នុងនោះដែរឯកឧត្តមក៏បានចែករំលែកនូវព័ត៌មានពាក់ព័ន្ធ និង គោលបំណងកំណែទម្រង់នានា របស់រាជរដ្ឋាភិបាលដែលបានកំពុងយកចិត្តទុកដាក់ ក្នុងគោលបំណងលើកកម្ពស់ការផ្តល់សេវាសាធារណៈជូនប្រជាពលរដ្ឋឲ្យមានប្រសិទ្ធភាពដើម្បីលើកកម្ពស់ ការអភិវឌ្ឍន៍សេដ្ឋកិច្ចមូលដ្ឋាន ប្រកបដោយសមធម៌ មានតម្លាភាព និង គណនេយ្យភាព សំដៅកាត់បន្ថយភាព ក្រីក្ររបស់ប្រជាពលរដ្ឋ ។ 
លោកប៊ុន ថាប្ញទ្ធិ ក៏មានសង្ឃឹមជឿជាក់យ៉ាងមុតមាំថា កិច្ចប្រជុំនេះ នឹងផ្តល់ឲ្យអ្នក ចូលរួម មានការទំនាក់ទំនងគ្នាល្អ ក្នុងការលើកកម្ពស់កិច្ចសហការ និង ការជម្រុញការបញ្ជ្រាបយេនឌ័រ ក្នុងការបង្កើនភាពអងអាចដល់ស្ត្រី ដើម្បីឲ្យស្របតាមផែនការយុទ្ធសាស្ត្រនារីរតនៈទី៤ របស់ក្រសួងកិច្ចការនារី ក្នុងការ លើកកម្ពស់ប្រសិទ្ធភាព និង តម្លាភាព ក្នុងការរៀបចំផែនការសកម្មភាព ថវិកាប្រចាំឆ្នាំ ដើម្បីឆ្លើយតបទៅនឹងតម្រូវ ការជាក់ស្តែង ប្រជាពលរដ្ឋ ព្រមទាំងបានចាត់ទុក ស្ត្រីគឺជាឆ្អឹងខ្នងនៃសេដ្ឋកិច្ចជាតិ សង្គម ស្ត្រីជាមាតានៃពិភពលោក រីឯយុវវ័យ និង កុមារគឺជាទំពាំងស្នងប្ញស្សី ៕
