ខេត្តសៀមរាប បណ្តាសត្វព្រៃដ៏កម្រមួយចំនួន ដែលប្រឈមនឹងការបាត់បង់ផុតពូជ ហើយត្រូវបានគេព្រួយបារម្ភថា មនុស្សខ្មែរជំនាន់ក្រោយៗនឹងលែងបានឃើញ លែងបានស្គាល់នោះ បានប្រមូលផ្តុំជានិមិត្តសញ្ញា បង្ហាញខ្លួននៅក្នុងក្បួនដង្ហែរតុក្កតាយក្ស ឬទីងមោងយក្សប្រចាំឆ្នាំនៅក្រុងទេសចរណ៍សៀមរាប នាយប់ថ្ងៃសៅរ៍ ទី០៦ ខែកុម្ភៈ ឆ្នាំ២០១៦ ( ចុងសប្តាហ៍កន្លងមកនេះ ) ក្រោមការចូលរួម គាំទ្រ និងលើកទឹកចិត្ត ពីសំណាក់ភ្ញៀវទេសចរជាតិនិងអន្តរជាតិ រួមទាំងបងប្អូនប្រជាពលរដ្ឋ ជាម្ចាស់ផ្ទះផងដែរ ។ 
ឆ្នាំ២០១៦នេះ គឺជាជំហ៊ានឆ្នាំទី១០ នៃគម្រោងដង្ហែរតុក្កតាយក្ស ។ ជាមួយព្រឹត្តិការណ៍ដង្ហែរតុក្កតាយក្ស ឆ្នាំនេះ គឺទទួលបានជោគជ័យជាងឆ្នាំកន្លងមក ។ គេបានប៉ាន់ប្រមាណថា ៖ នាចុងខែកុម្ភៈ ឆ្នាំ២០១៥កន្លងទៅ ព្រឹត្តិការណ៍ដង្ហែរតុក្កតាយក្សលើកទី៩ មានអ្នកចូលរួមមិនតិចជាង១ម៉ឺននាក់នោះឡើយ ។ នេះគឺជាការប៉ាន់ប្រមាណ ដែលបានបង្ហាញនៅក្នុងបទសម្ភាសន៍ រវាងភ្នាក់ងារទូរទស្សន៍ BTV ជាមួយ លោក អ៊ុន សាវ៉ាន់ អ្នកគ្រប់គ្រងគម្រោងតុក្កតាយក្ស ។ 
លោកបានបន្តឲ្យដឹងថា ៖ ព្រឹត្តិការណ៍ដង្ហែរតុក្កតាយក្ស ឬ ទីងមោងយក្ស គឺស្ថិតក្នុងគោលបំណង ផ្ញើសារអប់រំជូនដល់សាធារណជនទូទៅ ឲ្យជួយផ្សព្វផ្សាយបន្ត ចលនាបំផុសមនសិការ ស្រឡាញ់ ថែរក្សាការពារ អភិរក្ស ប្រភេទសត្វកម្រ ដែលកំពុងប្រឈមទៅនឹងការបាត់បង់ ផុតពូជ ។ លោកបានបង្ហាញឲ្យដឹងទៀតថា ៖ តុក្កតាយក្សឆ្នាំ២០១៦នេះ ក៏មានវត្តមានទីងមោងយក្ស និមិត្តសញ្ញាក្រុមកីឡាបាល់ទាត់ចូលរួមផងដែរ ដែលតុក្កតាកីឡាករយក្សទាំងនេះ បង្ហាញថា ៖ កីឡាគឺជាស៊ីមងត៍រស់ផ្សារភ្ជាប់ចំណងមិត្តភាព សាមគ្គីភាព និងជាឋាមពលនៃសុខភាព ( លេងកីឡាឲ្យបានច្រើន ចៀងវាងការខ្ជះខ្ជាយពេលវេលា ទៅសេពគ្រឿងញៀន ) ដែលលើកទី៩ ឆ្នាំ២០១៥កន្លងទៅ តុក្កតាយក្សបានបង្ហាញអំពីការថែរក្សាសិល្បៈវប្បធម៌ជាតិ ។ 
នៅក្នុងបទសម្ភាសន៍នោះ លោក អ៊ុន សាវ៉ាន់ បានឲ្យដឹងថា ៖ មានវិចត្រករ និងសិល្បករមកពីខេត្តបាត់ដំបង បានផ្តល់កិច្ចសហការផលិតតុក្កតាយក្សនេះ និងមានក្រុមកុមារដែលកំពុងទទួលការចិញ្ចឹមបីបាច់ថែរក្សានៅក្នុងមណ្ឌលកុមារកំព្រាសិស្សានុសិស្ស ប្រមាណជា៥០០នាក់បានជួយតម្លើងតុក្កតាយក្ស។សាលាគរុកោសល្យខេត្ត បានចូលរួមយ៉ាងសកម្មជាមួយគម្រោងតុក្កតាយក្សនេះ។រីឯថវិកាទ្រទ្រង់គម្រោងនេះ គឺបានមកពីការឧបត្ថម្ភដោយ សណ្ឋាគារ ផ្ទះសំណាក់ ភោជនីយ៍ដ្ឋាន និងសប្បុរសជនជាតិ អន្តរជាតិ បណ្តាអង្គការអន្តរជាតិ ដែលកំពុងធ្វើសកម្មភាពមនុស្សធម៌ក្នុងប្រទេសកម្ពុជា អង្គការក្រៅរដ្ឋាភិបាល ជាដៃគូអភិវឌ្ឍន៍ក្នុងវិស័យអប់រំក៏បានចូលរួមផងដែរ។ក្រុមការងារ និងបណ្តាអង្គការក្រៅរដ្ឋាភិបាលដែលបានចូលរួមមានបំណងចង់ឲ្យសកម្មភាពនេះ បានក្លាយជាព្រឹត្តិការណ៍ប្រចាំរដូវកាល ចូលរួមលើកស្ទួយវិស័យទេសចរណ៍កម្ពុជា ៕
