មណ្ឌលគិរី៖ មជ្ឈដ្ឋាននានាក្នុងខេត្តមណ្ឌលគិរី កំពុងសម្ដែងភាពព្រួយបារម្ភយ៉ាងខ្លាំងពីការវិនាសហិនហោចនូវព្រៃឈើដ៏មានតម្លៃរបស់ប្រទេសកម្ពុជា ខណៈមន្ត្រីបរិដ្ឋាននៃដែនជម្រកសត្វព្រៃភ្នំណាំលៀ បានសហការជាមួយនិងកម្លាំងសមត្ថកិច្ចព្រំដែន ព្រមទាំងមន្ត្រីអាវុធហត្ថបើកប្រតិបត្តិការរុករកប្រទះឃើញឈើប្រណិត និងឈើប្រភេទលេខ១ ដែលមានមុខកាត់ធំៗជិត៧០០កំណាត់ នៅតាមបន្ទាត់ព្រំដែនកម្ពុជា-វៀតណាម ត្រង់ចំណុចប៉ុស្តិ៍នគរបាល និងប៉ុស្តិ៍យោធាដាក់ចូរ ហៅប៉ុស្តិ៍ប្រាំមួយ ដែលស្ថិតក្នុងភូមិឡឥដ្ឋ ឃុំប៊ូស្រា ស្រុកពេជ្រាដា ខេត្តមណ្ឌលគិរី ។ ដោយប្រតិបត្តិការណ៍នេះបានធ្វើ ឡើងតាំងពីអំឡុងចុងខែមករា ២០១៦ រហូតមកដល់ពេលនេះ នៅពុំទាន់បញ្ចប់នៅឡើយ ។
លោក ឌិន ប៊ុនធឿន នាយរងដែនជម្រកសត្វព្រៃណាំលៀបានឲ្យដឹងថា ក្នុងប្រតិបត្តិការរុករកជាច្រើនថ្ងៃមន្ត្រីជំនា ញ បានរកឃើញឈើប្រណិតប្រភេទបេង ឈើខ្មៅ ផ្ចឹក គគីរ ឈើទាល សុក្រម ខ្វាវ និងឈើស្រឡៅ សរុបចំនួន៦៨៨កំណាត់ នៅត្រង់ចំណុចប៉ុស្តិ៍ដាក់ចូរ ហៅប៉ុស្តិ៍ប្រាំមួយនោះ ។ លោកបន្តថា បច្ចុប្បន្នមន្ត្រីបរិស្ថានរួម និងកម្លាំងអាវុធហត្ថកំពុងយាមនៅទីតាំងគំនរឈើនោះរងចាំបទបញ្ជាពីថ្នាក់លើថាត្រូវធ្វើយ៉ាងណា និងកំពុងបន្តស្វែងរកទីតាំងលាក់ឈើផ្សេង ទៀត ។
សូមបញ្ជាក់ថា បើយោងតាមប្រភពពីប្រជាសហគមន៍ជនជាតិដើមភាគតិចក្នុងឃុំប៊ូស្រាបានឲ្យដឹងថា មុនពេល កម្លាំងសមត្ថកិច្ចចុះទៅបង្ក្រាបទីតាំងលាក់ឈើនៅតំបន់ច្រករបៀងប៉ុស្តិ៍ប្រាំមួយនោះ គឺតំបន់នោះបានកើតមានបទល្មើសព្រៃឈើយ៉ាងពេញបន្ទុក ដោយជនជាតិវៀតណាមបាននាំយកត្រាក់ទ័ររាប់សិបគ្រឿង ព្រមទាំងរណាយន្ត ចូលមកអាររលំដើមឈើយ៉ាងរង្គាលពេញព្រៃ និងដឹកជញ្ជូនទៅប្រទេសពួកគេវិញយ៉ាងរលូនតាមច្រករបៀងដាក់ចូរហៅ ប៉ុស្តិ៍ប្រាំមួយ ដែលគ្រប់គ្រងដោយលោក យិន ចាន់ទី មេបញ្ជាការយោធាវរៈការពារព្រំដែនលេខ១០៣ និងលោក សៀង ស៊ីវន មេបញ្ជេការវរៈនគរបាលការពារព្រំដែនគោកលេខ៣០៣ ។
ប្រភពដដែលបន្តថា ឈើខុសច្បាប់យ៉ាងច្រើនសន្ធឹកសន្ទាប់ ដែលមន្ត្រីជំនាញបង្ក្រាបបានទាំងនេះ ត្រូវបានគេដឹថា ជារបស់លោក សារិន គឹមអាត មេបញ្ជាការយោធាស្រុកពេជ្រាដា និងលោក ខន សុខខឿន នាយស៊ើបការនៃវរៈនគរ បាលការពារព្រំដែនគោកលេខ៣០៣ ហើយក្រោមការសម្របសម្រួលពីមន្ត្រីយោធា និងនគបាលនៅតំបន់នោះ ទើបឈើអាចចរាចរណ៍ចូលដីវៀតណាមបានយ៉ាងរលូនតាមច្រករបៀងដាក់ចូរ ហៅប៉ុស្តិ៍ប្រាំមួយនេះ ។
ទាក់ទិននិងបញ្ហានេះ លោក សារិន គឹមអាត មេបញ្ជាការយោធាស្រុកពេជ្រាដា និងលោក ខន សុខខឿន នាយស៊ើបការនៃវរៈនគរបាលការពារព្រំដែនគោកលេខ៣០៣ ព្រមទាំងមន្ត្រីយោធា និងនគរបាលនៅប៉ុស្តិ៍ព្រំដែនដាក់ចូរ ហៅប៉ុស្តិ៍ប្រាំមួយ យើងពុំអាចទំនាក់ទំនងសុំការបំភ្លឺបានទេ ។
ចំណែកលោក តូច យ៉ុន ស្នងការនគរបាលខេត្តមណ្ឌលគិរី អ្នកព័ត៌មានយើងបានព្យាយាមទំនាក់ទំនងសុំការបំភ្លឺ តាមទូរស័ព្ទជាច្រើនលើក តែពុំមានអ្នកទទួល ។ រីឯលោក ឃិន ម៉េងស្រេង មេបញ្ជាការយោធាខេត្តមណ្ឌលគិរីបានឲ្យថា នៅច្រករបៀងដាក់ចូរ ហៅប៉ុស្តិ៍៦ គឺមិនមានការនាំឈើចេញទៅប្រទេសវៀតណាមនោះទេ ហើយឈើដែលកម្លាំងសមត្ថរួមមានការសហការពីមន្ត្រីយោធាបង្ក្រាបបាននោះ គឺមិនមានការជាប់ពាក់ព័ន្ធជាមួយលោក សារិន គឹមអាត មេបញ្ជាការយោធាស្រុកពេជ្រាដានោះទេ ។ លោកបញ្ជាក់ថា បច្ចុប្បន្ននេះមន្ត្រីជំនាញ ក៏កំពុងស៊ើបអង្កេតរកម្ចាស់ឈើដ៏ច្រើនសន្ធឹកសន្ធាប់ខាងលើនេះ មកចាត់ការតាមផ្លូវច្បាប់ផងដែរ ៕ ម៉ារ៉េត
