ខេត្តព្រះវិហារប្រជាសហគមន៍ព្រៃទ្បង់ដ៍ជាច្រើននាក់សហការជាមួយមន្ដ្រីរដ្ឋបាលព្រៃឈើឆែបចុះល្បាតការពារព្រៃឈើរយះពេល៦ថ្ងៃចាប់ពីថ្ងៃទី០១ដល់ថ្ងៃទី០៦កុម្ភះស្ថិតនៅភូមិភ្ញាក់រលឹកភូមិស្រែវាលឃុំធ្មារស្រុកជ័យសែនជាលទ្ធផលរឹបអូសបានរណាយន្តមួយចំនួនធំ។
សេចក្តីរាយការណ៍ក្រៅផ្លូវការពីប្រជាសហគមន៍បានអោយដឹងថាបេសកកម្មចុះល្បាតការពារព្រៃទ្បង់ដ៍នោះធ្វើដំណើរតាមម៉ូតូចំនួន៨០គ្រឿងជាលទ្ធផលរឹបអូសបានគ្រឿងឈើអារលេខ១មួយចំនួនធំរណាយន្ត៤គ្រឿងនិងកាំភ្លើងកែច្នៃចំនួន៣ដើម។ឃាត់គោយន្តកន្ត្រៃយ៍ដឹកបទល្មើសព្រៃឈើជាក់ស្តែងចំនួន១គ្រឿងរីឯជនល្មើសរត់គេចខ្លួនមុនកំលាំងល្បាតទៅដល់កន្លែងកាប់បំផ្លាញព្រៃឈើ។
លោកគឹមជេតថាវីនាយផ្នែករដ្ឋបាលព្រៃឈើឆែបបានអោយអ្នកសារព័ត៌មានដឹងនៅព្រឹកថ្ងៃទី០៩កុម្ភះ២០១៦ថាបេសកកម្មដើរល្បាតការពារព្រៃឈើក្នុងព្រៃឈើទ្បង់ដ៍ប្រព្រឹត្តទៅរយះពេល៦ថ្ងៃចាប់ពីថ្ងៃទី០១ដល់០៦កុម្ភះ២០១៦ដោយដេកស្នាក់នៅតាមភូមិ។បេសកកម្មនេះសហការគ្នាជាមួយប្រជាសហគមន៍ព្រៃទ្បង់ដ៍ចំនួន៤០នាក់ជាលទ្ធផលជំនាញរដ្ឋបាលព្រៃឈើរឹបអូសបានរណាយន្តចំនួន០៨គ្រឿង។
លោកនាយផ្នែករដ្ឋបាលព្រៃឈើឆែបបានបញ្ជាក់ថាការចុះល្បាតនោះជំនាញរដ្ឋបាលព្រៃឈើរឹបអូសបានតែរណាយន្តប៉ុណ្ណោះរីឯជនល្មើសបានរត់គេចខ្លួនអស់មុនកំលាំងល្បាតទៅដល់។លោកបានរាយការណ៍លទ្ធផលការងារចុះល្បាតខាងលើជូនលោកនាយខណ្ឌរដ្ឋបាលព្រៃឈើរួចហើយចំពោះលទ្ធផលរបស់ប្រជាសហគមន៍ខាងលើថារឹបអូសបានឈើអារមួយចំនួននិងកាំភ្លើងកែច្នៃ៣ដើមសង្ស័យជាព័ត៌មានបំប៉ោងខុសការពិត។
ប្រភពព័ត៌មានផ្សេងទៀតបានអោយដឹងថាមានឈ្មួញឈើជាច្រើននាក់បានចុះទៅប្រមូលទិញគ្រឿងឈើអារមានក្តារនិងឈើផ្ទោងដឹកជញ្ជូនតាមរថយន្តយីឌុបនិងសាំយ៉ុងចេញពីស្រុកជ័យសែនឆ្ពោះទៅកាន់ខេត្តកំពង់ធំដោយរលូន។ស្ដ្រីឈ្មួញឈើដុះស្លែម្នាក់ឈ្មោះទ្បែមបានដឹកជញ្ជូនឈើក្តារប្រវែង៤ម៉ែត្រៗតាមរថយន្តសាំយ៉ុងចំនួន០២គ្រឿងរាល់ថ្ងៃចេញពីស្រុកជ័យសែនយកទៅលក់នៅខេត្តកំពង់ធំយ៉ាងរលូនដោយមិនមានការបង្ក្រាបពីកំលាំងសមត្ថកិច្ចអ្វីទ្បើយ៕
