ភ្នំពេញ៖ ភ្នាក់ងារឆ្លើយឆ្លងព័ត៌មានទូរទស្សន៍ប៉ុស្តិ៍លេខ៩ ប្រចាំខេត្តមណ្ឌលគិរី លោកវ៉ាន់ ទិត ត្រូវបានអាវុធហត្ថខេត្តមណ្ឌលគិរីឃាត់ខ្លួននៅស្រុកកែវសីម៉ា ខេត្តមណ្ឌលគិរី រួចនាំខ្លួនទៅសាកសួរបន្តនៅទីបញ្ជាការអាវុធហត្ថខេត្តបណ្ឌលគិរី នៅព្រឹកថ្ងៃទី១១ ខែកុម្ភៈ ឆ្នាំ២០១៦នេះ។
គេមិនទាន់ដឹងពីមូលហេតុនៃការកោះហៅអ្នកសារព័ត៌មានទៅសាកសួរ ដែលជាភ្នាក់ងារឆ្លើយឆ្លងព័ត៌មានទូរទស្សន៍ប៉ុស្តិ៍លេខ៩ ប្រចាំខេត្តមណ្ឌលគិរី នៅឡើយទេ។
តាមការបញ្ជាក់ ភ្នាក់ងារឆ្លើយឆ្លងព័ត៌មានទូរទស្សន៍ប៉ុស្តិ៍លេខ៩ ប្រចាំខេត្តមណ្ឌលគិរី រូបនោះ បានរាយការណ៍លម្អិតពីកម្មភាពកាប់បំផ្លាញព្រៃឈើនៅក្នុងមណ្ឌលគិរីនេះ ជាពិសេសក្រុមហ៊ុនសម្បទានដីសេដ្ឋកិច្ចប៊ិញហ្វឿក១ នៅស្រុកកែវសីម៉ា ខេត្តមណ្ឌលគិរី ដែលបានកាប់បំផ្លាញព្រៃឈើ និងគរដុតកម្ទេចចោលឈើប្រណិតរាប់រយកំណាត់ មុនពេលកម្លាំងបង្ក្រាប និងទប់ស្កាត់បទល្មើសព្រៃឈើថ្នាក់ជាតិចូលទៅដល់។
បន្ថែមលើនោះ ពិធីករប៉ុស្តិ៍លេខ៩ ក៏បានអត្ថាធិប្បាយបន្ថែមថា ឈើទាំងនោះ គឺពាក់ព័ន្ធនឹងលោកសាក់ សារ៉ាង មេបញ្ជាការអាវុធហត្ថខេត្តមណ្ឌលគិរីផងដែរ។
លោកសាក់ សារ៉ាង បានប្រាប់តាមទូរស័ព្ទថា មិនមែនឃាត់ខ្លួនអ្វីទេ គ្រាន់ឃាត់ទុកដើម្បីសួរនាំប៉ុណ្ណោះ៕
រហូតមកដល់ពេលនេះ លោក វ៉ាន់ ទិត បានចេញមកវិញហើយ ក្រោយពីកងរាជអាវុធហត្ថ បានធ្វើការសាកសួរអស់រយះពេលជាង ២ម៉ោង នៅវេលាម៉ោង១០ ព្រឹកថ្ងៃទី ១១ ខែ កុម្ភះ ឆ្នាំ ២០១៦ នេះ ។
