ឧត្តរមានជ័យ៖ ប្រជាពលរដ្ឋក្នុងស្រុកអន្លង់វែង បានសំដែងការព្រួយបារម្ភពីបញ្ហាអសន្តិសុខ ជាប្រចាំថ្ងៃរបស់ពួកគាត់។ ចំពោះបញ្ហាសំកបកាំជ្រួច ដែលគេបាញ់ភ្នាល់ចាក់លុយ បានធ្លាក់ទៅលើលំនៅដ្ឋាន និងស្រែចំការរបស់ពួកគាត់។ការព្រួយបារម្មនេះ ប្រជាពលរដ្ឋដែលរស់នៅ
តាមភូមិជាប់ជើងភ្នំដងរែក ក្នុងឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ ហើយក៏ស្ថិតនៅក្បែរមាត់ច្រកអន្តរជាតិជាំសាង៉ាំ។
ដោយចំពោះបញ្ហានេះ កន្លងមកប្រជាពលរដ្ឋធ្លាប់បានស្នើរដល់អាជ្ញាធរ និងថ្នាក់ដឹកនាំរាជរដ្ឋាភិបាល ដើម្បីអន្តរាគមន៍ទៅក្រុមហ៊ុន ដែលមានសិទ្ធិអាជ្ញាប័ណ្ណ បើកលេងល្បែងបាញ់កាំជ្រួចភ្នាល់គ្នាចាក់លុយ។ ប្រជាពលរដ្ឋបាននិយាយថា បើពុំនោះទេ ពួកគាត់ដែលរស់នៅជាប់ជើងភ្នំដងរែក ជារៀងរាល់ថ្ងៃបាញ់ គឺថ្ងៃសុក្រ ថ្ងៃសៅរ៍ និងថ្ងៃអាទិត្យ ពួកគាត់មិនបានចេញប្រមូលផលដំណាំ ឬទៅរកស៊ីជួញដូរអ្វី ឱ្យបាននោះទេ។ ព្រោះនៅពេលគេបាញ់កាំជ្រួចម្តងៗ សំបកកាំជ្រួចបានធ្លាក់ទៅឆេះព្រៃ និងឆេះផ្ទះ អ្នកភូមិ។ ហើយមិនតែប៉ុណ្ណោះពួកគាត់មិនហ៊ានចេញពីក្នុងផ្ទះឡើយ ដោយខ្លាចសំបកកាំជ្រួចធ្លាក់ត្រូវ ហើយទោះបីមិនរងរបួស ក៏អាចស្លាប់បាត់បង់ជីវិតដែរ។ ព្រោះគ្រាន់តែសំបកកាំជ្រួច មានប្រវែង ៦ម៉ែត្រ ឯណោះ។
ប្រជាពលរដ្ឋបាននិយាយទៀតថា កាំជ្រួចដែលគេបាញ់នោះ មានបានឆ្ងាយៗណាស់ សូម្បីតែភូមិរបស់ពួកគាត់ដែលនៅតាមផ្លូវយុទ្ធសាស្ត្រ ក្បែរជើងភ្នំដងរែក ហើយក៏ជាភូមិទល់មុខ សំបកកាំជ្រួចបាញ់ ដែលមានចំងាយពី ៣គីឡូម៉ែត្រ ទៅ ៥គីឡូម៉ែត្រប៉ុណ្ណោះ ហើយនៅតែមានសំបកកាំជ្រួចធ្លាក់ត្រូវចំដំបូលផ្ទះ និងដីស្រែចំការរបស់ពួកគាត់។
ប្រជាពលរដ្ឋបានបន្ថែមទៀតថា កន្លងមកពួកគាត់ពួកគាត់បានរាយការណ៍ទៅអាជ្ញាធរ និងសមត្ថកិច្ចជំនាញជាច្រើនលើកច្រើនសារមកហើយដែរ ក៏ប៉ុន្តែពុំឃើញមានចំណាត់ការនោះទេ។ ហើយសកម្មភាពការបាញ់កាំជ្រួចក៏កាន់តែកើនឡើង បាញ់ជាច្រើនគ្រាប់ ក្នុងមួយថ្ងៃៗ។ ព្រមទាំងមានការនាំចូលនូវគ្រឿងរំសេវ និងសំបកកាំជ្រួច ពីប្រទេសថៃ ឆ្លងកាត់តាមច្រកអន្តរជាតិជាំសាង៉ាំ។ ដោយពុំឃើញមានអ្នកណាម្នាក់យកចិត្តទុកដាក់ពីបញ្ហាការប៉ះពាល់ដល់ស្ថានភាពរស់នៅរបស់ប្រជាពលរដ្ឋប្រចាំថ្ងៃ។
ប្រជាពលរដ្ឋស្នើរសុំដល់ឯកឧត្តម គន់ គីម ប្រធានក្រុមការងារថ្នាក់ជាតិជុះជួយខេត្តឧត្តរមានជ័យ និងឯកឧត្តម ស ថាវី អភិបាលខេត្តឧត្តរមានជ័យ មេត្តាជួយអន្តរាគមន៍ ចំពោះក្រុមហ៊ុនដែលមសនអាជ្ញាប័ណ្ណ ឱ្យមានការបាញ់កាំជ្រួចភ្នាល់គ្នាចាក់លុយ ដែលបានប៉ះពាល់ស្ថានភាពរស់នៅរបស់ប្រជាពលរដ្ឋនៅតាមខ្សែរបន្ទាត់ព្រំដែន ជាប់ជើងភ្នំដងរែក ដែលនៅក្បែរច្រកអន្តរជាតិជាំសាង៉ាំ៕
