ខេត្តព្រះវិហារ សេចក្តីរាយការណ៍បានអោយដឹងថាក្រុមហ៊ុនរ័ត្នសម្បត្តិរកស៊ីដឹកឈើអារលេខ១លេខ២តាមរថយន្តយីឌុបចេញពីតំបន់គូលែនព្រហ្មទេពក្នុងដែនបរិស្ថានស្ថិតនៅឃុំយាងស្រុកជាំក្សាន្តត្រូវបានឆ្មាំឃ្លាំមើលបទល្មើសព្រៃនិយាយថាដឹកចេញជាហូរហែរនៅពេលយប់ចេញពីខេត្តព្រះវិហារឆ្ពោះទៅកាន់ខេត្តកំពង់ធំ។ប្រភពព័ត៌មានពីសមត្ថកិច្ចដែលស្និតស្នាលជាមួយអ្នកសារព័ត៌មានបានអោយដឹងថាក្នុងច្បាប់អនុញាតិអោយក្រុមហ៊ុនដឹកជញ្ជូនឈើចាប់ពី១៥ដល់២៥ម៉ែត្រគូបប៉ុណ្ណោះ។ប៉ុន្តែជាក់ស្តែងក្រុមហ៊ុនប្រព្រឹត្តល្មើសហ៊ានដឹកជញ្ជូនផលអនុផលព្រៃឈើចាប់ពី៤០ទៅ៥០ម៉ែត្រគូបឯណោះដោយគ្រាន់តែបង់លុយក្បាលទ្បានអោយស្ថាប័នសមត្ថកិច្ចតាមដងផ្លូវជាតិលេខ៦២ជាការស្រេចចង់ស្រុតផ្លូវនិងបាក់ស្ពានតាមតែម៉ែវាទៅ។
ប្រភពព័ត៌មានបន្តថាក្រុមហ៊ុនរ័ត្នសម្បត្តិដឹកឈើចេញក្នុង១យប់ចាប់ពី២ទៅ៣គ្រឿងយ៉ាងរលូនចេញពីទឹកដីខេត្តព្រះវិហារហើយសង្ស័យក្រុមហ៊ុនមួយនេះដឹកឈើលើសចំណុះចាប់ពី៤០ទៅ៥០ម៉ែត្រគូបឯណោះដោយគ្របតង់បិទជិតហើយឈើពេញៗណែនរីឯម៉ាស៊ីនរថយន្តប្រឹងរោទិ៍បើកបរសឹងតែមិនទៅមុខ។
តាមបទបញ្ជារដ្ឋបាលព្រៃឈើតម្រូវអោយរថយន្តយីឌុបដឹកឈើដែលមានច្បាប់អនុញាតិទាំងអស់ត្រូវចេញដំណើរពីព្រឹកហើយទៅដល់គោលដៅនៅពេលថ្ងៃគឺមិនអនុញាតិអោយដឹកឈើចេញនៅពេលយប់ព្រលប់នោះទេព្រោះបង្កការលំបាកដល់សមត្ថកិច្ចជំនាញឃាត់ត្រួតពិនិត្យ។តំណាងក្រុមហ៊ុនរ័ត្នសម្បត្តិម្នាក់បានអោយដឹងថាពិតជាបានដឹកឈើនៅពេលយប់ចេញពីឃុំយាងប្រាកដមែនដោយបានបង់លុយអោយភ្នាក់ងារទូរទស្សន៍ល្បីឈ្មោះម្នាក់ដើម្បីសម្រួលបើកផ្លូវ។
មន្ដ្រីរដ្ឋបាលព្រៃឈើមូលដ្ឋានបានអោយដឹងថាក្រុមហ៊ុនរ័ត្នសម្បត្តិរកស៊ីដឹកឈើចាប់តាំងពីឆ្នាំ២០១១មកម្លេះបន្តរហូតមកដល់ឆ្នាំ២០១៦នេះដែលប្រភពឈើផ្គត់ផ្គង់ស្ថិតនៅដែនបរិស្ថានគូលែនព្រហ្មទេពក្នុងឃុំយាងស្រុកជាំក្សាន្តខេត្តព្រះវិហារ។
ប្រភពព័ត៌មានពីឆ្មាំឃ្លាំមើលបទល្មើសព្រៃឈើបានអោយដឹងថាមានក្រុមហ៊ុនរកស៊ីដឹកឈើអារលេខ១លេខ២យ៉ាងសកម្មចំនួន២ក្រុមហ៊ុនទៀតឈ្មោះក្រុមហ៊ុនលឹមសុគន្ធនិងក្រុមហ៊ុនហៀកអេងទ្បាយមកពីខេត្តស្ទឹងត្រែងតាមផ្លូវជាតិលេខ៩ឆ្លងកាត់ខេត្តព្រះវិហារឆ្ពោះទៅកាន់ខេត្តកំពង់ធំយ៉ាងរលូនតាមផ្លូវជាតិលេខ៦២។ក្រុមហ៊ុនដឹកជញ្ជូនឈើចេញអស់រយះពេល៣ឆ្នាំមកហើយមិនដែលឃើញសមត្ថកិច្ចណាម្នាក់ចេញមុខឃាត់ត្រួតពិនិត្យដើម្បីផ្ទៀងផ្ទាត់ចំនួនបរិមាណឈើនោះទេបើទោះបីដឹងថាក្រុមហ៊ុនទាំង២នេះដឹកឈើតាមរថយន្តយីឌុបលើសចំណុះចង់បាក់ស្ពាននិងស្រុតផ្លូវជាតិក៍ដោយ។
រីឯថ្នាក់ដឹកនាំមន្ទីរសាធារណការនិងដឹកជញ្ជូនខេត្តព្រះវិហារងាប់ត្រកៀកស្តូកដូចទីងមោងចាំស្រែចំការប៉ុណ្ណោះដោយសារទប់ស្កាត់មិនមានប្រសិទ្ធភាពនូវការដឹកជញ្ជូនឈើលើសចំណុះធ្ងន់ធ្ងរឈានទៅបំផ្លាញផ្លូវជាតិលេខ៩និងលេខ៦២ក៍ដោយ។នៅពេលថ្ងៃក៍ដូចជាពេលយប់។សមត្ថកិច្ចតែងតែនិយាយថាជាប់រវល់ទៅណាមិនរួចរឺមិនព្រមលើកទទួលទូរស័ព្ទតែម្តងនៅពេលដឹងខ្លួនថាអ្នកសារព័ត៌មានរាយការណ៍អោយគាត់ចុះមកពិនិត្យមើលឈ្មួញកំពុងដឹកឈើតាមរថយន្តយីឌុបដែលបើកបរកើមៗដូចក្តាមវារដោយសារដឹកលើសចំណុះធ្ងន់ធ្ងរពេក។មានភ្នាក់ងារទូរទស្សន៍ខិលខូចខ្លះនៅខេត្តព្រះវិហារត្រូវបានឈ្មួញឈើជាច្រើននាក់រាយការណ៍អោយដឹងថាបានបង់លុយប្រចាំខែនិងក្បាលទ្បានដូចសមត្ថកិច្ចដែរជាថ្នូរមិនផ្សព្វផ្សាយព័ត៌មានតាមកញ្ជក់ទូរទស្សន៍ហើយនិយាយថាគេជាបុគ្គលិកទូរទស្សន៍ធំជាងគេម៉ាស្រុកខ្មែរអោយតែបង់លុយអោយគេចាយច្រើនៗហើយអាចរកស៊ីដឹកឈើយ៉ាងស្រួល។ឈ្មួញឈើនិយាយចំអកថាភ្នាក់ងារទូរទស្សន៍ខ្លះនៅខេត្តព្រះវិហារមិនដែលដេកយប់នោះទេគឺដើរទល់ៗយប់ជ្រៅគ្រប់ច្រកល្ហកដើម្បីប្រមូលលុយក្បាលទ្បានពីឈ្មួញដឹកឈើតាមរថយន្តតូចធំមិនដឹងថាមេរបស់គេតម្រូវអោយធ្វើអញ្ចឹងឬមួយក៍ធ្វើដោយបុគ្គលខ្លួនឯងនោះទេ៕
