ប្រជាពលរដ្ឋចំនួន ២៧គ្រួសារ នៅក្នុងស្រុកអន្លង់វែង ដោយចាន់ ធី ខេត្តឧត្តរមានជ័យ៖. ប្រជាពលរដ្ឋ បានសំដែងការសប្បាយរីករាយ ចំពោះអាជ្ញាធរខេត្ត បានកាត់ឃ្វាលដីធ្លីពីក្រុមហ៊ុន ទុំរីងរ៉ាប់ប័រ ដែលវិនិយោគដីសម្បទាន ប៉ះពាល់លើដីស្រែ និងដីលំនៅដ្ឋានរបស់ប្រជាពលរដ្ឋ ដែលបានអូសបន្លាយអស់រយៈពេលប្រមាណ ៥ឆ្នាំ មកហើយ។បញ្ហាទំនាស់ដីធ្លីរវាងប្រជាពលរដ្ឋ ២៧គ្រួសារ និងក្រុមហ៊ុនទុំរីងរ៉ាប់ប័រ បានកើតមាន ជាទំនាស់ដីរ៉ាំរ៉ៃមួយ ចាប់តាំងពីឆ្នាំ ២០១០ នៅពេលដែលក្រុមហ៊ុនទទួលបានសិទ្ធិ វិនិយោគលើដីសម្បទានសេដ្ឋកិច្ចពីរាជរដ្ឋាភិបាល។ ដោយចំពោះបញ្ហានេះ ក្រុមហ៊ុនមិនបានគោរពទៅតាមបទបញ្ជា ០០១នោះទេ នៅពេលដែលក្រុមយុវជន ស្ម័គ្រចិត្ត បានចុះធ្វើការវាស់វែង និងកាត់ឃ្វាលឱ្យប្រជាពលរដ្ឋ តែបែរភាគីក្រុមហ៊ុន ប្តឹងជំទាស់មិនឱ្យចេញប័ណ្ណកម្មសិទ្ធិ ទៅឱ្យប្រជាពលរដ្ឋនោះឡើយ។
សូមជម្រាបថា កាលពីថ្ងៃទី១២ ខែកុម្ភៈ ឆ្នាំ២០១៦ ក្រុមការងារគណៈកម្មការ ដោះស្រាយដីធ្លី ដឹកនាំដោយ ឯកឧត្តម ស ថាវី អភិបាលខេត្តឧត្តរមានជ័យ បានកោះហៅប្រជាពលរដ្ឋ និងភាគីក្រុមហ៊ុន មកជួបតទល់មុខគ្នា និង ឡើងបកស្រាយរៀងៗខ្លួន ដើម្បីចង់ដឹងមូលហេតុ ដែលមិនអាចដោះស្រាយចេញ។
ក្រោយពីបានស្តាប់ការបកស្រាយពីគ្រប់ភាគីមានវិវាទ ឯកឧត្តម ស ថាវី បានផ្តល់ជា យន្តការ ចំនួន ៤ចំណុច ដើម្បី ធ្វើការពិភាក្សាដោះស្រាយ។ ដោយចំណុចទី១.សុំឱ្យមន្ត្រីជំនាញ ចុះសិក្សាពិនិត្យមើលទីតាំងដី បើមិនមានការពាក់ព័ន្ធទេ ត្រូវកាត់ដីនេះជូនប្រជាពលរដ្ឋ។ ទី២. ពាក់ពន្ធ័នឹងចុងសន្លឹកក្បាលដីដែលក្រុមនិស្សិតបានវាស់វែង ជូនប្រជាពលរដ្ឋ ចំនួន ៣៧០គ្រួសារ ហើយត្រូវក្រុមហ៊ុនប្តឹងទាស់មិនឲ្យចេញបណ្ណ័កម្មសិទ្ធនោះ អាជ្ញាធរខេត្ត បានបញ្ជាឱ្យមន្ត្រីជំនាញធ្វើបណ្ណ័កម្មសិទ្ធជូនប្រជាពលរដ្ឋ។ ទី៣. ស្នើសុំឱ្យបញ្ឈប់ រាល់ការបញ្ជូនអ្នកតំណាង ដើម្បីសោះស្រាយបញ្ហា ព្រោះរាល់បញ្ហាទំនាស់ដីធ្លី គឺអាស្រ័យទៅលើ ការកាន់កាប់ជាក់ស្តែង និងឯកសារភស្តុតាងមកបញ្ជាក់ជំពោះការកាន់កាប់ដីធ្លី។ចំណែកឯទី៤. ស្នើឲ្យប្រជាពលរដ្ឋ ត្រូវធ្វើការគាំទ្រ ចំពោះក្រុមហ៊ុន ដែលគេបានដាក់ទុនវិនិយោគ ហើយក្រុមហ៊ុនមិនត្រូវប៉ះពាល់ចំពោះដំណាំ ឬលំនៅដ្ឋានរបស់ ប្រជាពលរដ្ឋតទៅទៀតឡើយ។
ប្រជាពលរដ្ឋ បានសំដែងការអបអរសាទជាខ្លាំង ដែលពួកគាត់បាន ទៅសង់លំនៅដ្ឋាន និងបានអាស្រ័យផល លើដីស្រែរបស់ពួកគាត់វិញ។ ហើយរយៈពេល ៥ឆ្នាំមកហើយ ដែលពួកគាត់បានប្រឈមមុខដាក់គ្នាជាមួយក្រុមហ៊ុន រារាំងមិនឱ្យពួកគាត់អាស្រ័យផល និងសង់លំនៅដ្ឋាន ។ ដោយពួកគាត់បានរស់ នៅលំបាក វេទនាអស់រយៈពេល ៥ឆ្នាំមកហើយ។ ក្នុងនោះដែរ ប្រជាពលរដ្ឋសង្ឃឹម យ៉ាងមុតមាំថា ភាគីក្រុមហ៊ុន នឹងគោរពតាមបទបញ្ជារបស់អភិបាលខេត្ត ដោយមិនត្រូវទៅ រំខានប្រជាពលរដ្ឋតទៅទៀតនោះទេ។ ព្រោះដំណោះស្រាយមុនៗ ភាគីក្រុមហ៊ុននៅតែរំលោភបំពានកិច្ចសន្យាទៅលើ ប្រជាពលរដ្ឋម្តងហើយ ម្តងទៀត. ធ្វើឱ្យប្រជាពលរដ្ឋអស់ជំនឿទុកចិត្តទៅលើអាជ្ញាធរ ហើយបានប្តឹងទៅគ្រប់ស្ថាប័ននានា ដើម្បីជួយអន្តរាគមន៍ដោះស្រាយដល់ពួកគាត់៕
