សៀមរាប៖ បន្ទាប់ពីបានបើកសម្ពោធស្នាក់ការធំរបស់ខ្លួននៅរាជធានីភ្នំពេញ នាព្រឹកថ្ងៃទី១៤ ខែកុម្ភៈ ឆ្នាំ២០១៦ ក្រុមហ៊ុន Terra Motors បានបើកសម្ពោធដាក់ឲ្យដំណើរការ ការិយាល័យលក់ម៉ូតូអគ្គីសនី ផលិតផលនាំចូលពីប្រទេសជប៉ុន ក្រោមសិទ្ធផ្តាច់មុខរបស់ក្រុមហ៊ុនចែកចាយ លី ប្រាឌឺ ម៉ូធ័រ ( Ly Brothers” Motors ។ នេះគឺជាការពង្រីកសាខាថ្មីមួយទៀតនៅក្រុងសៀមរាប បន្ទាប់ពីបានសិក្សាឃើញថា ខេត្តសៀមរាប ដែលជាខេត្តទេសចរណ៍ដ៏សំខាន់នៃព្រះរាជាណាចក្រកម្ពុជា គឺជាទីផ្សារដ៏មានសក្តានុពលរបស់ខ្លួន ។
កញ្ញា សាហាកុ ហ្គូហ៊ីរ៉ា ប្រធានក្រុមហ៊ុន Terra Motors Corporation នៃប្រទេសជប៉ុន ប្រចាំប្រទេសកម្ពុជា បានលើកឡើងយ៉ាងដូច្នេះ នៅក្នុងពិធីបើកសម្ពោធនោះ។កញ្ញា សាហាកុ ហ្គូហ៊ីរ៉ា បញ្ជាក់ថា ក្រុមហ៊ុន Terra Motors ផ្តោតជាសំខាន់ទៅលើ៣ចំណុច គឺបរិស្ថាន សេដ្ឋកិច្ច និង បច្ចេកទេស ។ លោក ឃឹម ប៊ុនសុង អភិបាលខេត្តសៀមរាប ផ្តល់កិត្តិយស ចូលរួមក្នុងពិធីបើកសម្ពោធនោះ ។
យានយន្តអគ្គីសនីម៉ាក TERRA ដំណើរការដោយអាគុយ ភ្ជាប់ជាមួយម៉ូទ័រ មិនបាច់ប្រើសាំង ប្រេងម៉ាស៊ីន ច្រវ៉ាក់ មីញ៉ុង សន្សំសំចៃថវិការហូត៩០% ។ ក្នុងពេលបញ្ចូលអាគុយម្តង យានយន្តអគ្គីសនីនេះ អាចធ្វើដំណើរបានពី ៤០ ទៅ ៨០ គីឡូម៉ែត្រ តាមប្រភេទនៃយាននីមួយៗ ដោយឡែកត្រីចក្រយានយន្តអគ្គីសនី ប្រភេទ Y6 អាចផ្ទុកឲ្យមនុស្សជិះបានចំនួន៦នាក់ និងអាចធ្វើដំណើរបាន ១២០ គីឡូម៉ែត្រ ។ ប្រើប្រាស់យានអគ្គីសនីនេះ មិនប៉ះពាល់បរិស្ថាន ដែលសមស្របជាមួយនឹងតំបន់ទេសចរណ៍វប្បធម៌ បេតិកភ័ណ្ឌប្រវត្តិសាស្ត្រ ។
ផ្អែកលើគុណភាព និងការប្រើប្រាស់យានយន្តអគ្គីសនីមិនប៉ះពាល់បរិសា្ថន ! ក្រុមហ៊ុន Terra Motors បានស្រូបទាញចំណែកទីផ្សារបស់ខ្លួននៅប្រទេសជប៉ុនរហូតដល់ ៤០% និងបានពង្រីកទីផ្សារនៅអ៊ឺរ៉ុប និងអាស៊ី បន្ថែមទៀត ៕
