ខេត្តសៀមរាប៖ ជនសង្ស័យដែលជាឃាតករសម្លាប់អារកស្ត្រីរងគ្រោះ ជាបុគ្គលិកភូមិវប្បធម៌កាលពីថ្ងៃទី១២ខែកុម្ភៈឆ្នាំ២០១៦ស្ថិតក្នុងផ្ទះសំណាក់យីហោ ប្រាសាទកែវនៅតាមបណ្តោយផ្លូវផ្សាញ៉ែ ភូមិតាភុល សង្កាត់ស្វាយដង្គំ ក្រុងសៀមរាប ដែលត្រូវបានសមត្ថកិច្ចនាំយកទៅតុលាការតាំងពីព្រឹករហូតដល់ម៉ោង៨និង៣០នាទីយប់ថ្ងៃទី១៥ខែកុម្ភៈឆ្នាំ២០១៦ ត្រូវបានតុលាការចេញដេការសម្រេចឱ្យឃុំខ្លួនលេខ២៣៦និង២៣៧ចុះថ្ងៃទី១៥ខែកុម្ភៈឆ្នាំ២០១៦ដោយចៅក្រមស៊ើបសួរ ឈុន ច័ន្ទ សីហា ចោទពីបទឃាតកម្មគិតទុកជាមុន ទៅលើជនសង្ស័យទាំង២នាក់ ដែលបានចែងឱ្យផ្តន្ទាទោសតាមបញ្ញមាត្រា២០០នៃក្រមព្រហ្មទណ្ឌ។
លោក ថង សាគុណ ស្នងការរងទទួលបន្ទុកបទល្មើសព្រហ្មទណ្ឌ នៃស្នងការដ្ឋាននគរបាលខេត្តសៀមរាប បានប្រាប់កោះសន្តិភាពនៅល្ងាចថ្ងៃទី១៥ខែកុម្ភៈ ឱ្យដឹងផងដែរថា ជនសង្ស័យមានប្រពន្ធ និងកូន៣-៤នាក់ទៅហើយ។ មិនតែប៉ុណ្ណោះបច្ចុប្បន្ន គេកំពុងមានបញ្ហាជាមួយប្រពន្ធដើម និង កំពុងលែងលះគ្នាផងដែរ តែមិនទាន់ដាច់ស្រេចនៅឡើយ។
គួររំលឹកផងដែរថា នៅវេលាម៉ោង៩ព្រឹកថ្ងៃទី១៣ខែកុម្ភៈឆ្នាំ២០១៦នៅក្នុងផ្ទះសំណាក់យី ហោ ប្រាសាទកែវ មានការភ្ញាក់ផ្អើលយ៉ាងខ្លាំង បន្ទាប់ពីស្ត្រីរងគ្រោះម្នាក់ ត្រូវបានឃាតកសម្លាប់អារកយ៉ាងសាហាវព្រៃផ្សៃ ដោយបានល្បួង រងគ្រោះ មកចូលដេកផ្ទះសំណាក់ដែលស្ថិតនៅតាមបណ្តោយផ្លូវផ្សារញ៉ែ ភូមិតាភុល សង្កាត់ស្វាយដង្គំ ក្រុងសៀមរាបហើយ កាត់ក្បាលយកទៅបាត់។ ក្រោយពីបានទទួលព័ត៌មាន ដ៏សែនរន្ធត់នេះ កម្លាំងសមត្ថកិច្ចបានប្រឹងប្រែងយ៉ាងសស្រាក់សស្រាំ រហូតឈានដល់ការឃាត់ខ្លួនបានជនសង្ស័យម្នាក់ មានឈ្មោះ ចាន់ ឆាយយ៉ា ហៅ សារ៉ាត់ ភេទប្រុសអាយុ៤០ មុខរបរមគ្គុទេស ទេសចរថៃ មានស្រុកកំណើត នៅខេត្តបាត់ដំបង បច្ចប្បន្នរស់នៅភូមិគោកដូង សង្កាត់ទឹកវិល ក្រុងសៀមរាប ដែលជាឃាតកដែដល់ បានត្រូវបានសមត្ថិកិច្ចចម្រុះចាប់បាននៅវេលាម៉ោង៥និង៤០នាទីល្ងាចថ្ងៃទី១៣ខែកុម្ភៈនៅផ្ទះរបស់ជនល្មើសនិងម្នាក់ទៀតឈ្មោះ ណិប សិទ្ធ ភេទប្រុសអាយុ២៤ឆ្នាំមុខរបរបើកឡានឱ្យក្រុមហ៊ុនចិន មានស្រុកកំណើតភូមិស្នំប្រាំពីរ ឃុំម៉ាក់ប្រាង្គ ស្រុកទឹកឈូរ ខេត្តកំពត ខាងកម្លាំងប៉េអឹមឃាត់ខ្លួន។ចំណែកសពស្ត្រីរងគ្រោះមានឈ្មោះ ឡេន សិលា អាយុ២៤ឆ្នាំបុគ្គលិក បម្រើការនៅភូមិវប្បធម៌ មានទីលំនៅក្នុងភូមិខ្នាត ឃុំខ្នាត ស្រុកពួក ខេត្តសៀមរាប។ 
បច្ចុប្បន្នជនសង្ស័យដៃដល់និងអ្នកបើកឡានឱ្យក្រុមហ៊ុន ចិនត្រូវបានកម្លាំងជំនាញ បញ្ជូនទៅដាក់ពន្ធនាគារនៅវេលាម៉ោង៨និង៣០នាទីយប់ថ្ងៃទី១៥ខែកុម្ភៈឆ្នាំ២០១៦ តាមបញ្ជារបស់ចៅក្រមស៊ើបសួរ ឈុន ច័ន្ទ សីហា ដែលបានចេញដេការសម្រេចឱ្យឃុំខ្លួនទាំង២នាក់ពីបទ ឃាតកម្មគិតទុកជាមុន៕
