ភ្នំពេញ ៖ រថយន្តដឹកត្រីមួយគ្រឿងដឹកត្រីពេញបានផ្ទុះកង់ក្រឡាប់ផ្អៀងចំហៀងចាក់ត្រីរាយប៉ាយពេញផ្លូវ។ហេតុការណ៏នេះកើតឡើងនៅវេលាម៉ោង២រំលងអធ្រាត្រឈានចូលថ្ងៃ ទី១៥ ឧសភា ២០១៤ នៅចំណុចមុខផ្ទះលេខ១៩៦៤ តាមផ្លូវជាតិលេខ៥ ស្ថិតក្នុងសង្កាត់គីឡូម៉ែត្រលេខ៧ ខណ្ឌឬស្សីកែវ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុគេបានឃើញរថយន្តកូរ៉េមួយតោនកន្លះ ពណ៌ស អត់មានស្លាកលេខ ដឹកត្រីពេញរថយន្តចេញពីកន្លែងយឿត្រីគីឡូម៉ែត្រលេខ៩ ធ្វើដំណើរពីត្បូងទៅជើងតាមផ្លូវជាតិលេខ៥ មកដល់ចំណុចកើតហេតុ រថយន្តក៏បានផ្ទុះកង់ឆ្វេងក្រោយ បណ្តាលឱ្យក្រឡាប់ផ្អៀងកង់ទៅចំហៀងចាក់ត្រីរាយប៉ាយពេញផ្លូវចំណែកអ្នកបើកបរនិងអ្នករួមដំណើរអត់មានរងរបួសទេ។
ក្រោយពេលកើតហេតុប្រជាពលរដ្ឋនាំគ្នាជួយចាប់ត្រីដាក់ទៅក្នុងកញ្ច្រែងវិញ ហើយសមត្ថកិច្ចក៏បានមកពិនិត្យកន្លែងកើតហេតុដោយឃើញថា ពុំមានប៉ះពាល់ទ្រព្យសម្បត្តិ ប្រជាពលរដ្ឋដូច្នេះសមត្ថកិច្ចបានប្រាប់ទៅម្ចាស់រថយន្តដែលក្រឡាប់ឱ្យរកវិធីស្ទូចរថយន្តឱ្យដូចដើមនិងបើកចេញបន្តទៀតចុះ៕ 
