ខេត្តសៀមរាប៖ នាព្រឹកថ្ងៃទី១៦ ខែកុម្ភះ ឆ្នាំ២០១៦នេះ មានបើកវគ្គបណ្តុះ បណ្តាល ស្តីពី ភាពជាអ្នកដឹកនាំ និង គ្រប់គ្រងដល់ស្ត្រីជាអ្នកដឹកនាំ នៅថ្នាក់ក្រសួង មន្ទីរកិច្ចការនារី រាជធានី ខេត្ត ក្រោមអធិបតីភាពរបស់លោកស្រី ជុត លាងវ៉ាន់នី អគ្គនាយករង អគ្គនាយកដ្ឋានសមភាព
យេនឌ័រ និង អភិវឌ្ឍ សេដ្ឋកិច្ច និង លោកស្រី យូ សុភា អភិបាលរងនៃគណៈអភិបាលខេត្ត លោកស្រី ស៊ិន ណម សមាជិកាក្រុម ប្រឹក្សាខេត្តសៀមរាប ដោយមានការអញ្ជើញចូលរួមពីសំណាក់អស់លោក លោកស្រីជាប្រធាន អនុប្រធាន មន្ទីរ ការិយាល័យ មកពីបណ្តាខេត្តចំនួន ០៨ សរុបចំនួន ៤៨នាក់ ដែលបានចូលរួមជាសិក្ខាកាមក្នុងរយៈពេល២ថ្ងៃ ។
ក្នុងកិច្ចស្វាគមន៍របស់លោកស្រី យូ សុភាក៏បានបញ្ជាក់ថា ក្នុងការកំណែទម្រង់តាមបែបវិមជ្ឈការ និង វិសហមជ្ឈការ របស់រាជរដ្ឋាភិបាល ក្រោមកិច្ចដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី ក្នុងការអនុវត្ត កំណែទម្រង់នៅថ្នាក់ក្រោមជាតិ ដោយបានដាក់ចេញនូវវិធានការជាក់លាក់ ដើម្បីលើកកម្ពស់សមភាពយេនឌ័រ ដោយបានធ្វើការតែងតាំងស្ត្រីជាអ្នកដឹកនាំចាប់ពីថ្នាក់ជាតិ ដល់ថ្នាក់ក្រោមជាតិ នៅគ្រប់ក្រសួង មន្ទីរស្ថាប័ន និង អង្គភាព ព្រមទាំងបង្កើតភាពអង់អាចដល់ស្ត្រីទៀតផង ។ លោកជំទាវបានបន្តទៀតថា ដើម្បីបង្កើនការគាំទ្រ និង ចូលរួមចំណែកពីសហគមន៍ ក្នុងការធ្វើសេចក្តីសម្រេចសិទ្ធិភាព លើគ្រប់វិស័យរវាងស្ត្រី និង បុរស និង បន្តការអប់រំ បណ្តុះបណ្តាល កសាងសមត្ថភាព ធនធានមនុស្សជាស្ត្រី និង លើកកម្ពស់ប្រសិទ្ធភាពនៃការអនុវត្តការងារ របស់ អង្គភាព ក្នុងការធានាសម្រេចនូវភារកិច្ច សម្រាប់ជាឧត្តមប្រយោជន៍ជាតិ និង ប្រជាពលរដ្ឋកម្ពុជា ។
មានប្រសាសន៍បើកវគ្គបណ្តុះបណ្តាលនោះដែរ លោកស្រី ជុត លាងវ៉ាន់នី ក៏បានធ្វើការគូសបញ្ជាក់ថា ក្រោមការយកចិត្តទុកដាក់របស់ប្រមុខរាជរដ្ឋាភិបាលកម្ពុជា បានកំពុងលើកកម្ពស់លើវិស័យយេនឌ័រ និង បានធ្វើ ឲ្យនារីយើង ក្លាយខ្លួនជាភាពអ្នកដឹកនាំ និង អ្នកគ្រប់គ្រងនៅតាមគ្រប់ក្រសួង មន្ទីរ ស្ថាប័ន អង្គភាព ចាប់ពីថ្នាក់ ជាតិដល់ថ្នាក់ក្រោមជាតិ និង ដោយមានការចូលរួមគាំទ្រ ពីសំណាក់អស់លោកដែលជាបុរស ទើបធ្វើឲ្យនារីយើង មានថ្ងៃនេះទាំងអស់គ្នា ។ លោកស្រីក៏បានបញ្ជាក់យ៉ាងស៊ីជម្រៅផងដែរ អំពីការបន្តវេនរបស់ស្ត្រី ដោយពឹងផ្អែក ទៅលើនារីវ័យក្មេងៗ គឺត្រូវធ្វើការពង្រឹងនូវសមត្ថភាពនៃការយល់ដឹងរបស់ខ្លួន ក្នុងការកង្កើននូវចំណេះដឹង ដើម្បី បន្តវេនពីសំណាក់រៀបច្បងនៃយើង ។ ម្យ៉ាងទៀត ថ្នាក់ដឹកនាំជាស្ត្រីគ្រប់លំដាប់ថ្នាក់ ត្រូវបន្តពង្រឹងសមត្ថភាព របស់ខ្លួន ដើម្បីអនុវត្តនូវតួនាទី ភារកិច្ចរបស់ខ្លួន ដែលរាជរដ្ឋាភិបាលបានប្រគល់ជូន ឲ្យកាន់តែមានប្រសិទ្ធភាព ។ ក្នុងនោះដែរលោកស្រី ជុត លាងវ៉ាន់នី ក៏បានបន្តទៀតថា ទោះបីមានស្ត្រីយើងបានបម្រើការងារនៅគ្រប់ ក្រសួង មន្ទីរ ស្ថាប័ន អង្គភាពក៏ពិតមែន ក៏ប៉ុន្តែចំនួនស្ត្រីជាថ្នាក់ដឹកនាំទាំងនេះ ក៏នៅមិនទាន់បានបំពេញនូវតម្រូវ ការការងារនៅឡើយ ដែលធ្វើឲ្យទាមទាបន្ថែម និង ធ្វើការពង្រឹងសមត្ថភាព ក្នុងភាពជាអ្នកដឹកនាំ និង ជាអ្នកគ្រប់ គ្រង ក្នុងការអនុវត្តគោលនយោបាយយុទ្ធសាស្ត្រចតុកោណ ដំណាក់កាលទី៣ នៃរដ្ឋសភា នីតិកាលទី៥ និង ការ អនុវត្តសកម្មភាពការងារ នៅតាមក្រសួង មន្ទីរ ស្ថាប័ន អង្គភាព ដោយមានការគាំទ្រពីថ្នាក់ដឹកនាំជាបុរស និង ស្ត្រី ខ្លួនឯកផងដែរ ។ លោកស្រីក៏បានផ្តាំផ្ញើដល់សិក្ខាកាមទាំងអស់ ត្រូវយកចិត្តទុកដាក់ទៅលើប្រធានបទ ដែលគ្រូ ឧទ្ទេសធ្វើការបង្ហាញ ដើម្បីបានជាទុនយកទៅធ្វើការអនុវត្ត ដើម្បីឲ្យក្លាយខ្លួនជាអ្នកដឹកនាំដ៏ឈ្លាសវៃ ពោពេញទៅ ដោយជំនាញគ្រប់គ្រងទៀតផង ៕
