កំពត៖ កម្លាំងជំនាញនរគបាលព្រហ្មទណ្ឌ ដឹកនាំដោយលោកឧត្តមសេនីយ៏ត្រី ម៉ៅ ច័ន្ទមធុរិទ្ធស្នងការនគរបាលខេត្តបានបើកប្រតិបត្តិការស្រាវជ្រាវ ជាបន្តបន្ទាប់ រហូតឃាត់ខ្លួន ជនសង្ស័យបានចំនួន២នាក់ ក្នុងករណីផ្សេងគ្នា ដោយជនសង្ស័យម្នាក់ ជាប់ពាក់ព័ន្ធនឹងការបាញ់
ប្រហារ ប៉ងសម្លាប់ជនរងគ្រោះ ព្រោះតែខឹងដណ្តើមប្រពន្ធពេលខ្លួនជាប់គុក និងម្នាក់ទៀត ជាប់ពាក់ព័ន្ធសកម្មភាពចូលទៅបាញ់ប្លន់យកទ្រព្យសម្បត្តិរបស់ជនរងគ្រោះ នៅស្រុកកំពង់ត្រាច បណ្តាលឲ្យស្លាប់ម្នាក់ជាឪពុក និងកូនស្រីរងរបួសធ្ងន់ ។ជនសង្ស័យទី១-ឈ្មោះទង វុទ្ធី ហៅដុក អាយុ៤៩ឆ្នាំ រស់នៅក្នុងភូមិកំពង់ចិន ឃុំស្ទឹងកែវ ស្រុកទឹកឈូ ខេត្តកំពតឃាត់ខ្លួនបាន នៅរសៀលថ្ងៃទី១០ ខែកុម្ភៈ ឆ្នាំ២០១៦ នៅភូមិកំពង់ចិនខាងលើ ដែលជាប់ចោទពីបទ «ប៉ុនប៉ងឃាតកម្ម» លើជនរងគ្រោះ ឈ្មោះ ខាត់ តាប់ ភេទប្រុស អាយុ៣៦ឆ្នាំ រស់នៅភូមិព្រៃពាយ ឃុំត្រពាំងភ្លាំង ស្រុកឈូក ខេត្តកំពត។ជនសង្ស័យទី២-ឈ្មោះ លឹម ភី អាយុ៣៣ឆ្នាំ រស់នៅភូមិឈើទាលរាំ ឃុំស្វាយទងខាងជើង ស្រុកកំពង់ត្រាច ខេត្តកំពត។ ជនសង្ស័យរូបនេះត្រូវឃាត់ខ្លួន នៅរសៀល ថ្ងៃទី៩ ខែកុម្ភៈ ឆ្នាំ២០១៦ នៅ ភូមិព្រែកត្នោត ឃុំព្រែកត្នោត ស្រុកទឹកឈូ ខេត្តកំពត ដោយអនុវត្តតាមដីការរបស់សាលាដំបូងខេត្តកំពត ។លោក លក ញ៉ាវ នាយរងការិយាល័យព្រហ្មទ័ណ្ឌកំម្រិតធ្ងន់ខេត្តបានឲដឹងថា ជនសង្ស័យទី១ បានប្រើកាំភ្លើង AK បាញ់ចំនួន៤គ្រាប់ ប៉ងសម្លាប់ជនរងគ្រោះ តែមិនបានសម្រេច ដោយគ្រាន់តែបាញ់១គ្រាប់ ត្រូវចំដាច់ម្រាមដៃ១ខាងឆ្វេង នៅយប់ថ្ងៃទី២៧ ខែមករាឆ្នាំ២០១៦ ។ ជនសង្ស័យបានសារភាពថាខ្លួនគេពិតជាបាន ប្រព្រឹត្តមែន ដោយមានបំណងសម្លាប់ជនរងគ្រោះពិតប្រាកដ ព្រោះតែមានគំនុំជាមួយជនរងគ្រោះ បានយកប្រពន្ធខ្លួនខណៈខ្លួនកំពុង ជាប់ក្នុងគុក អំឡុងឆ្នាំ២០១៥ ។
ដោយឡែកជនសង្ស័យទី២ រួមនិងបក្ខពួក២នាក់ផ្សេងទៀត បានប្រើកាំភ្លើងធុន AK កាត់ស្នូក១ដើម ចូលប្ល្នន់ផ្ទះជនរងគ្រោះ ជាជនពិកាជើង ហើយក្រុមជនល្មើសបានព្រួតគ្នាវាយលើជនរងគ្រោះ នឹងឈើច្រត់រហូតដល់ស្លាប់នៅក្នុង ផ្ទះតែម្តង រួចហើយក្រុមជនសង្ស័យបន្តវាយ លើកូនស្រីរបស់ជនរងគ្រោះ បណ្តាលឲ្យរងរបួសធ្ងន់ថែមទៀត នៅយប់ថ្ងៃទី១៥ ខែធ្នូ ឆ្នាំ២០១៥ នៅភូមិអង្ក្រង ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។បច្ចុប្បន្នជនសង្ស័យទាំង២នាក់ រួមនឹងវត្ថុតាងត្រូវបានកម្លាំងសមត្ថកិច្ច ជំនាញបញ្ជូនខ្លួនឡើងតុលាការ ដើម្បីចាត់ការតាមច្បាប់៕
