ខេត្តព្រះសីហនុ៖ នៅម៉ោង៩ព្រឹកថ្ងៃទី១៧កុម្ភ:នេះនាវាកងទ័ពជើងទឹកជប៉ុនចំនួន ០៣គ្រឿង បានចូលចតនៅកំពង់ផែអន្តរជាតិខេត្តព្រះសីហនុក្នុងដំណើរបំពេញទស្សនកិច្ចចំនួន៤ថ្ងៃនៅព្រះរាជាណាចក្រកម្ពុជាគឺចាប់ពីថ្ងៃទី១៧ រហូតដល់ថ្ងៃទី២០ ខែកុម្ភៈខាងមុខនេះ 
ក្នុងឪកាសចូលចតរបស់នាវាចម្បាំងនៅកំពង់ផែអន្តរជាតិខេត្តព្រះសីហនុនេះដែរមានការទទួលស្វាគមន៌យ៉ាងកក់ក្តៅពីនាយ នាយរង និងពលទាហានកងទ័ពជើងទឹកមូលដ្ឋានសមុទ្ររាម ដឹកនាំដោយលោកឧត្តមនាវីទោ រស់ វាសនា មេបញ្ជាការរងមូលដ្ឋានសមុទ្ររាម ។
នាវាកងទ័ពជើងទឹកជប៉ុនទាំងបីគ្រឿងនេះទី១ មានឈ្មោះ HATAKAZE (DDGAI) មានបណ្តោយ ១៤៩.៩៩មែត្រ ទទឹង ១៦.៤៣ម៉ែត្រ ជម្រៅទឹក ៤.៨២ម៉ែត្រ ទម្ងន់ផ្ទុក ៤.៦៧៥តោន និងមាននាវិកសរុបចំនួន២០០នាក់ ដឹកនាំដោយមេបញ្ជាការវរនាវីឯក YOSHIHIKO SHIMONO និងមានឧទ្ឬម្ភភេចក្រ ម៉ាក (SH-60J)មួយគ្រឿង Spead 30Kmts ។ នាវាទី២ មានឈ្មោះ YAMAYUKI (DD129) មានបណ្តោយ ១៣០ម៉ែត្រ ទទឹង១៣.៦ម៉ែត្រ ជម្រៅទឹក ៤.២០ម៉ែត្រ ទម្ងន់ផ្ទុក៣០៥០តោន មាននាវិក ២៣១នាក់ ដឹកនាំដោយលោកមេបញ្ជាការវរនារីឯក KAZUHIKO MIZOE ។ នាវាទី៣ មានឈ្មោះ AKEBONO (DE 201) មានបណ្តាយ ៩១.៨០ម៉ែត្រទទឹង ៨.៥០ម៉ែត្រ ជម្រៅទឹក ៣.៤០ម៉ែត្រ ទម្ងន់ផ្ទុក ១០៧៥តោន មាននាវិកសរុបចំនួន ២០៤នាក់ ។
មន្ត្រីកងទ័ពជើងទឹកកម្ពុជាម្នាក់ដែលបានចូលរួមទទួលស្វាគមន៌គណ:ប្រតិភូកងទ័ពជើងទឹកជប៉ុនដែរនោះបាននិយាយថា គោលបំណងនៃការចូលសំចតរបស់ក្រុមនាវាកងទ័ពជើងទឹកជប៉ុននៅពេលនេះគឺដើម្បីពង្រឹងនិងពង្រីកទំនាក់ទំនងមិត្តភាព សាមគ្គីភាពរវាងប្រទេសទាំងពីរជប៉ុន និងកម្ពុជា ព្រមទាំងផ្តល់ឪកាសឪ្យនាវិកនៃកងនាវាចរណ៌ជើងទឹកជប៉ុនបានស្វែងយល់អំពីវប្បធម៌ ទំនៀមទំលាប់ប្រពៃណី និងវិស័យយោងធានៃប្រទេសទាំងពីរផងដែរ តាមរយ:ដំណើរទស្សនកិច្ចនៅលើទឹកដីនៃព្រះរាជាណាចក្រកម្ពុជាចំនួនពេល៤ថ្ងៃ ។
មន្ត្រីដដែលបាននិយាយប្រាប់ទៀតថាតាមការគ្រោងទុក គណ:ប្រតិភូកងទ័ពជើងទឹកជប៉ុន និងមានគម្រោងចូលជួបសំដែងការគួសមជាមួយអភិបាលខេត្តព្រះសីហនុ ស្នងការដ្ឋាននគរបាលខេត្តព្រះសីហនុ កងរាជអាវុធហត្ថខេត្ត មេបញ្ជាការកងទ័ពជើងទឹកមូលដ្ឋានសមុទ្ររាម ទស្សន:កិច្ចនៅទីបញ្ជាការជួរមុខលំហរសមុទ្ររាមក្នុងនោះក៌មានកាហ្វឹកហ្វឺនលើនាវា និងដំណើរទស្សន:កិច្ចនៅក្នុងព្រះបរមរាជវាំង វិមានឯករាជ្យ ទស្សនកិច្ចមជ្ឍមណ្ឌលកំចាត់មីន (ស៊ីម៉ាក) បើកឪ្យសិស្សានុសិស្ស និស្សិតខេត្តព្រះសីហនុចូលទស្សនះកិច្ចលើនាវា ប្រកួតកីឡាមិត្តភាពជាមួយកងទ័ពជើងទឹកមូលដ្ឋានសមុទ្ររាម និងចូលរួមលំហាត់លាគ្នា ជាមួយកងទ័ពជើងទឹកកម្ពុជា ។
មន្ត្រីដដែលបានឲ្យដឹងទៀតថាបន្ទាប់ពីនាវាចម្បាំងកងទ័ពជើងទឹកជប៉ុនទាំង៣គ្រឿងនេះចាកចេញពីកំពង់ផែអន្តរជាតិខេត្តព្រះសីហនុនៅថ្ងៃទី២០កុម្ភ:នោះនៅថ្ងៃទី២១កុម្ភ:នាវាកងទ័ពជើងទឹកប្រទេសចិននិងចូលចតនៅកំពង់ផែអន្តរ:ជាតិខេត្តព្រះសីហនុ ៕
