សៀមរាបៈ ប្រជាពលរដ្ឋក្នុងសហគមន៍ជាង៥០នាក់ មានការងារធ្វើ និងអាចរកចំណូលពីការបំរើសេវាកម្ម ភ្ញៀវទេសចរណ៍ ជិះរទេះក្របីកំសាន្ត ដោយក្នុងមួយខែអាចរកចំណូលបានពី១៥០ដុល្លាទៅ ២០០ដុល្លា ក្នុងមួយគ្រួសារ ក្នុងមុខរបរសហការជាមួយក្រុមហ៊ុនទេសចរណ៍ ដើម្បីរកចំណូលពីភ្ញៀវទេសចរណ៍ជិះរទេះក្របី។
ប្រជាពលរដ្ឋមានចិត្តសប្បាយរីករាយ ខណៈពេលដែល ពួកគាត់អាចរកចំណូលបានដោយងាយស្រួល ពីក្របីរបស់ពួកគាត់ ខណៈពេលដែលមាន ក្រុមហ៊ុនទេសចរណ៍មួយ បានបង្កើតនៅក្នុងភូមិរបស់គាត់ ក្នុងការ បំរើសេវាកម្មដឹកភ្ញៀវទេសចរណ៍ តាមរយះរទេះក្របីរបស់ពួកគាត់ គឺគ្រាន់តែពួកគាត់ឲ្យបានយកប្របីរបស់ ពួកគាត់មកសហការដឹកភ្ញៀវទេសចរណ៍ ក្រុមហ៊ុននឹងបានជូនសេវាកម្មថ្លៃជួលក្របី ក្នុងមួយក្បាល៥០ដុល្លា ក្នុងមួយក្បាល មិនតែប៉ុណ្ណោះ ប្រជាពលរដ្ឋដែលជាម្ចាស់ក្របី ត្រូវបានក្រុមហ៊ុនឲ្យបំរើការងារដោយគិតប្រាក់ខែក្នុងម្នាក់៩០ដុល្លា សម្រាប់ការដើរដឹករទេះក្របីនាំភ្ញៀវទស្សនា បើគិតទៅក្នុងមួយគ្រួសារ មានក្របី រហូតដល់ទៅ៣ទៅ៤ក្បាល ពួកគាត់អាចរកចំណូលបានយ៉ាងកាកកប។
សម្រាប់ការថែរក្សាក្របីសម្រាប់ ដឹកភ្ញៀវទេសចរណ៍នេះ គឺម្ចាស់ក្របីខ្លួនឯងជាអ្នកថែរក្សា លាងសំអាត ទាំងការឲ្យស្មៅ ទាំងអស់ដោយខ្លួនឯង ដែលមានក្របីទាំងអស់ ជិត៣៧ក្បាល ត្រូវបានក្រុមហ៊ុនធ្វើជារោងសម្រាប់ ការត្រៀម ដឹកភ្ញៀវនៅពេលដែលត្រូវការ ក្នុងនោះក៏មានរទេះជាច្រើនគ្រឿង តំរៀបជួរមានលក្ខណៈដូចរទេះក្របីឯទៀតដែល មិនខុសពីរទេះដែលប្រជាពលរដ្ឋប្រើប្រាស់សម្រាប់ ដឹកជញ្ជូនកសិផល ប៉ុន្តែប្លែកខុសគ្នាត្រង់ទឹមក្របី គឺមានតែក្របី មួយសម្រាប់ការទឹមឲ្យអូស ចំណែកអ្នកបំរើសេវាកម្មនាំភ្ញៀវ មិនអនុញ្ញាតិឲ្យជិះជាមួយភ្ញៀវនោះទេ គឺមានតួនាទីដើរ ដឹកមុខក្របីចាប់តាំងពីចេញដំណើររហូតដល់គោលដៅបញ្ចប់ក្នុងរយះពេល ៣០នាទី តាមបណ្តោយផ្លូវក្នុងភូមិ ដើម្បី ឲ្យភ្ញៀវបានទស្សនាកសិករ ដាំដំណាំ និងបង្ករបង្កើនផល ដែលមានតួនាទីជាហ្គាយផង ជាអ្នកនាំរទេះផង ក្នុងការចង្អុលបង្ហាញនូវសមិទ្ធផលដែលភ្ញៀវមានចម្ងល់ ។
លោក ឆេង ឆោម អាយុ ៣៥ អ្នកគ្រប់គ្រងអជីកម្មបំរើសេវាកម្មរទេះក្របី លោករស់នៅភូមិគ្រួស ឃុំស្វាយដង្គម ក្រុងសៀមរាប ខេត្តសៀមរាប លោកបានបញ្ជាក់ថានេះក្រុមហ៊ុន មេជិកវិលិចកម្ពុជា ដែលមានម្ចាស់ប្រធានក្រុមហ៊ុន ឈ្មោះឆេ ឆាស៊ូ ជាជនជាតិកូរ៉េ និងសហការជាមួយខ្មែរ បានបើកដំណើរការក្នុងឆ្នាំ ២០១៤ ខែ៩ រហូតមកដល់ពេលនេះជាង១ឆ្នាំហើយ លោកឆេង ឆោម បានបន្តថា ក្រុមហ៊ុនទេសចរណ៍នេះ ស្ថិតនៅក្នុងភូមិជ្រៃ សង្កាត់ទឹកវិល ក្រុងសៀមរាប ខេត្តសៀមរាប 
ការដំណើរការដឹកភ្ញៀវទេសចរណ៍នេះ គឺប្រើឡើងដោយកំលាំងអូសទាញដោយសត្វក្របី ដែលបានជួលពីប្រជាពលរដ្ឋនៅក្នុងតំបន់នេះផ្ទាល់តែម្តង ក្នុងមួយក្បាល៥០ដុល្លា គឺជួលទាំងក្របី ជួលទាំងម្ចាស់ ឲ្យមើលថែរបស់គាត់ ហើយទទួលបានប្រាក់ខែ ដោយមិនចាំបាច់ចំណាក់ស្រុក សម្រាប់ការដំណើរការដឹកភ្ញៀវដោយរទេះ ក្របីនេះពុំមានក្របីផ្អើលធ្វើឲ្យភ្ញៀវគ្រោះថ្នាក់នោះទេ ដោយសារម្ចាស់គាត់ផ្ទាល់ជាអ្នកមើលថែរ រទេះទាំងអស់ មានដល់ទៅ ៥៣រទេះ ចំណែកក្របីមានត្រឹមតែ៣៧ក្បាលប៉ុណ្ណោះ រទេះមួយគឺប្រើក្របីមួយ អាចដាក់ភ្ញៀវ ២ទៅ៣នាក់ ការចេញដំណើរម្តងមាន៣០នាទី
ក្រោយពីភ្ញៀវវិលមកដល់គោលដៅវិញ ក្របីទាំងនោះត្រូវបានមកបញ្ឈប់ត្រង់ កន្លែងបាញ់ទឹកស្រោចក្របី ព្រោះក្របីត្រូវការទឹក ចំណែកភ្ញៀវត្រូវបាននាំមកមើលផ្ទះគំរូ ដែលបានរចនាបទដូចផ្ទះប្រជាពលរដ្ឋខ្មែររស់នៅ ក្រៅពីនោះគឺមានការដាក់បង្ហាញនូវត្បាល់កិនស្រូវ និងត្បាល់បុក ដែលជាការបញ្ជាក់ពីការរស់ នៅរបស់ប្រជាពលរដ្ឋខ្មែរ លុះក្រោយមកភ្ញៀវទាំងអស់បានមកជួបជុំគ្នានៅក្នុងរោងសម្រាប់រៀបចំអាហារសម្រន់ លោកបានបញ្ជាក់ថា ក្នុងនោះក៏បានការចាប់អារម្មណ៍ពីសំណាក់បងប្អូនប្រជាពលរដ្ឋខ្មែរផងដែរ សម្រាប់បំរើសេវាកម្ម រទេះក្របីដែលមានតំលៃត្រឹមតែ ៣ដុល្លាក្នុងម្នាក់ តែបើតំលៃ៤ដុល្លាមានសម្រាប់អាហារសម្រន់ជូនទៀតផង ក្នុងមួយ ថ្ងៃមានភ្ញៀវមកប្រើប្រាស់សេវាកម្ម ១៥០នាក់ ក្នុងនោះមានចិន កូរ៉េ និងអ៊ឺរ៉ុប 
ជាចុងក្រោយលោកឆេង ឆោម បានសំណូមពរ ឲ្យប្រជាពលរដ្ឋខ្មែរទាំងអស់ជួយគាំទ្រផលិតផលខ្មែរ ជួយលើកស្ទួយវប្បធម៌ខ្មែរយើង ដោយមិនសំខាន់ម្ចាស់ជាជនជាតិអ្វីក៏ដោយគឺមិនសំខាន់ៗ គឺប្រជាពលរដ្ឋនៅតំបន់ហ្នឹង មនុស្សទាំង៥០នាក់មានការងារធ្វើ ពីការកែច្នៃ រទេះក្របីដឹកភ្ញៀវ មិនថាទីនេះ ឬទីណានោះទេ សូមឲ្យជួយអភិរក្សកុំឲ្យអរិយ៍ធ៌ម វប្បធ៌មខ្មែរបាត់បង់ និងសូមឲ្យមក ទស្សនាដែលមានចម្ងាយពីទីរួមខេត្តសៀមរាប ៧គ.ម ផ្លូវមកអាងបារាយណ៍ទឹកថ្លា ។
លោក មាស សុភី អ្នកបច្ចេកទេស ក្នុងការកែច្នៃបានផ្តល់បទសម្ភាសថា លោករស់នៅភូមិគោកស្នួល ឃុំខ្នាត ស្រុកពួក ខេត្តសៀមរាប បានមានសេចក្តីត្រេតអរខ្លាំងណាស់ ដែលបានមកធ្វើការជាងមួយឆ្នាំ ជាមួយនឹងក្រុមហ៊ុនទេសចរណ៍ ដែលបានបើកជាកន្លែងដឹកភ្ញៀវដោយទេសចរណ៍ដោយរទេះក្របី និងសូមស្វាគមន៍ទាំងភ្ញៀវខ្មែរ និងភ្ញៀវបរទេស ជាពិសេសពួកខ្ញុំជាម្ចាស់ក្របី ម្ចាស់ស្រុកនៅទីនេះមានការងារធ្វើ អាចចិញ្ចឹមជីវិតបាន ទាំងស្រីទាំងប្រុសក្មេងចាស់អត់រើសទេ គឺប្រជាពលរដ្ឋទីនេះឲ្យតែមានពលកម្មអាចធ្វើការងារបាន ទោះបីប្រាក់ខែតិចក្តីច្រើនក្តី ក៍អាចធ្វើបានដែរ ។
ដោយ ប៊ុន រដ្ឋា
