ខេត្តបន្ទាយមានជ័យ ៖បុរសម្នាក់ត្រូវបានស្លាប់ភ្លាមៗដោយន្ទះបាញ់ ខណៈពេលដែលកំពុងតែបើកគោយន្តភ្ជួដីមានភ្លៀងផ្គរចុះជ្រកក្រោមដើមឈើកាលពីរសៀលថ្ងៃបុណ្យវិសាខបូជាទី ១៣ ឧសភា ២០១៤ នៅចំណុចវាលស្រែគោកតាព្រហ្ម នៅក្នុងភូមិថ្មខាងត្បូង ឃុំភូមិថ្មី ស្រុកថ្មពួក
ខេត្តបន្ទាយមានជ័យ ។
អធិការស្រុកថ្មពួកបានឱ្យដឹងនៅថ្ងៃទី១៤ឩសភានេះថា ជនរងគ្រោះក្នុងហេតុការណ៍រន្ទះបាញ់ស្លាប់កាលពីម្សិលមិញមានឈ្មោះ ឡៃ លត ភេទប្រុស អាយុ២៩ឆ្នាំ ជាប្រជាកសិកររស់នៅក្នុងភូមិ ឃុំកើតហេតុខាងលើ ។ តាមការសួរនាំទៅលើអ្នកជិតខាងដែលឃើញ នៅមុនពេលកើតហេតុជនរងគ្រោះបានបើកគោយន្តទៅភ្ជួស្រែនៅកន្លែងកើតហេតុខាងលើ ដោយមានភ្លៀងធ្លាក់លាយឡំនិងខ្យល់ផ្គររន្ទះយ៉ាងខ្លាំង ធ្វើអោយជនរងគ្រោះភ័យខ្លាច ក៏ឈប់ភ្ជួរហើយបានរត់ទៅជ្រកនៅក្រោមដើមចំបក់ មួយដើមនៅក្បែរនោះក៏ត្រូវរន្ទះបាញ់ស្លាប់តែម្តង ។
តាមការត្រួតពិនិត្យរបស់សមត្តកិច្ច សពជនរងគ្រោះគឺត្រូវរន្ទះទឹកបាញ់ព្រោះនៅលើខ្លួនសពជនរងគ្រោះត្រជាក់និងមិនមានស្នាមឆេះខ្លោចនោះទេ។
សពជនរងគ្រោះក្រោយពីពិនិត្យរួចត្រូវបានប្រគល់ឱ្យទៅក្រុមគ្រួសារយកទៅធ្វើបុណ្យតតាមប្រពៃណី ។ បើតាមរបាយការណ៍របស់សាខាកាកបាទក្រហមខេត្តបន្ទាយមានជ័យ បានអោយដឹងថា ការស្លាប់ដោយសាររន្ទះបាញ់នេះគឺជាជនទី៥ហើយសម្រាប់ក្នុងខេត្តបន្ទាយមានជ័យ ៕
