បន្ទាយមានជ័យ ៖ កម្មករស៊ីឈ្នួលដកនិងដាំដំឡូងមីម្នាក់បានជាន់មីន បណ្តាលរងរបួសធ្ងន់ បន្ទាប់ពីដើរចូលក្នុងតំបន់ព្រំដែនកម្ពុជា-ថៃក្បែរច្រលរបៀងសេះងាប់ ក្នុងភូមិសាស្ត្រព្រំប្រទល់ស្រុកស្វាយចេក និងស្រុកថ្មពួក របស់ខេត្តបន្ទាយមានជ័យ កាលពីព្រឹកថ្ងៃទី២២ កុម្ភះ ២០១៦ ។លោក ជា ស្លូញ អធិការនគរបាលស្រុកស្វាយចេកបានអោយដឹងថា ជនរងគ្រោះខាងលើមានឈ្មោះ មឿន ស៊ីថា ភេទប្រុស អាយុ៤៦ឆ្នាំ មានទីលំនៅភូមិអូរតាគាំ១ ឃុំទួលតាឯក ស្រុកបាត់ដំបង ខេត្តបាត់ដំបង បានមកស្នាក់នៅក្នុងបន្ទាយកងទ័ពអភិវឌ្ព្បន៍យោធភូមិភាគទី៥ ប្រចាំនៅច្រកសេះងាប់ ដោយស៊ីឈ្នួលដក និងដាំទ្បូងមី ដំបូងឡើយជនរងគ្រោះបានដើរទៅរើសអុស នៅត្រង់ចំណុចខាងជើងផ្លូវចូលច្រកសេះងាប់ មានចម្ងាយប្រមាណជា ៥០០ ម៉ែត្រ ខាងលិចផ្លូវលេខ៥៨ ក្រវ៉ាត់ព្រំដែនចម្ងាយប្រមាណជា៨០០ម៉ែត្រ បានរងគ្រោះថ្នាក់ដោយផ្ទះមីន បណ្តាលអោយរងរបួល ត្រង់ក្បាល ពេញដងខ្លួន និងដាច់ដៃខាងឆ្វេង ។
បច្ចុប្បន្ន ជនរងគ្រោះ កំពុងត្រូវបានសង្គ្រោះនៅមន្ទីរពេទ្យបង្អែកមិត្តភាពកម្ពុជា-ជប៉ុនស្រុកមង្គលបូរី ។
គួររំលឹកថា បញ្ហាផ្ទុះគ្រាប់មីន ឬគ្រាប់មិនទាន់ផ្ទុះ តែងបង្ករទុកទោសដល់ប្រជាពលរដ្ឋដែលរស់នៅជាប់បន្ទាប់ព្រំដែនកម្ពុជា-ថៃ នៃខេត្តបន្ទាយមានជ័យ ដែលតែងចូលព្រៃកាប់អុស ឬប្រកបរបរចិញ្ចឹមជីវិញដោយចូលព្រៃបះបន្លែព្រៃលក់ ៕ អ.ពៅ ២២ កុម្ភះ ២០១៦
