ខេត្តកណ្តាល៖ នៅព្រឹកថ្ងៃទី១៥ ខែឧសភា ឆ្នាំ២០១៤នេះសមត្ថកិច្ចនគរបាលស្រុកកោះធំសហការជាមួយនគរបាលមូលដ្ឋានចុះទៅធ្វើការត្រួតពិនិត្យសាកសពបុរសម្នាក់ ដែលបានចង.កធ្វើអត្តឃាតសម្លាប់ខ្លួននៅលើដើមស្វាយ បង្ករឲ្យមានការភ្ញាក់ផ្អើលកាលពីវេលាម៉ោង៤ និង
៣០នាទីព្រឹក ថ្ងៃទី១៥ ខែឧសភា ឆ្នាំ២០១៤ ចំណុចដើមស្វាយខាងក្រោយផ្ទះជនរងគ្រោះ ស្ថិតក្នុងភូមិសំរោង ឃុំលើកដែក ស្រុកកោះធំ ខេត្តកណ្តាល ។
មន្ត្រីនគរបាលមូលដ្ឋានបានឲ្យដឹងថា ជនរងគ្រោះដែលគិតខ្លីចង.កធ្វើអត្តឃាតសម្លាប់ខ្លួននោះមានឈ្មោះ ហេង សុខគា ភេទប្រុស អាយុ៥៤ឆ្នាំ (ជាមនុស្សមានជម្ងឺសសៃប្រាសាទ) មានប្រពន្ធនិងកូននៅក្នុងបន្ទុក បច្ចុប្បន្នរស់នៅក្នុងភូមិសំរោង ឃុំលើកដែក ស្រុកកោះធំ ។
មន្ត្រីនគរបាលជំនាញបច្ចេកទេស និងវិទ្យាសាស្ត្រស្រុកកោះធំបានបញ្ជាក់ថា ជនរងគ្រោះពិតជាបានចង.កធ្វើអត្តឃាតសម្លាប់ខ្លួនឯងប្រាកដមែន ពុំមែនជាករណីឃាតកម្មអ្វីទេ ។
បច្ចុប្បន្នសាកសពជនរងគ្រោះត្រូវបានសមត្ថកិច្ចនគរបាលប្រគល់ទៅឲ្យប្រពន្ធនិងកូនយកទៅធ្វើបុណ្យតាមប្រពៃណី ។
ដោយឡែកនៅស្រុកកៀនស្វាយក៍មានយុវជនម្នាក់ឈ្មោះ ធន់ សុផេង ភេទប្រុស អាយុ២០ឆ្នាំ រស់នៅភូមិស្តៅកន្លែង៣ ឃុំដីឥដ្ឋ ស្រុកកៀនស្វាយ ខេត្តកណ្តាល ចង.កធ្វើអត្តឃាតសម្លាប់ខ្លួនផងដែរ ដោយសាមានទំនាស់ពាក្យសំដីបន្តិចបន្ទួចជាមួយបងប្អូន និងឪពុកម្តាយ ៕
