ភ្នំពេញ៖ បុរស២នាក់បានរងរបួសធ្ងន់និង២នាក់របួសស្រាលដោយសាតែពួកគេជិះម៉ូតូ២គ្រឿងបុកគ្នាពេញទំហឹង កាលពីវេលាម៉ោង២២និង២០នាទីយប់ថ្ងៃទី១៥ខែឧសភា ឆ្នាំ២០១៤ នៅចំណុចមុខផ្សារស្ទឹងមានជ័យតាមបណ្ដោយផ្លូវមុនីរ៉េត សង្កាត់ស្ទឹងមានជ័យ ខណ្ឌមានជ័យ។
តាមសាក្សីនៅកន្លែងកើតហេតុបានឲ្យដឹងថា មុនពេលកើតហេតុគេបានឃើញបុរសម្នាក់ជិះម៉ូតូមួយគ្រឿងម៉ាកសេ១០០(សងកូរ៉េ)ពណ៌ខៀវ ពាក់ស្លាកលេខភ្នំពេញ1CB-9075 ធ្វើដំណើរតាមបណ្ដោយផ្លូវមុនីរ៉េត ក្នុងទិសដៅពីលិចទៅកើតលុះមកដល់ចំណុចកើតហេតុស្រាប់តែមានម៉ូតូម៉ាកសេ១២៥ ពណ៌ខ្មៅពាក់ស្លាកលេខស្វាយរៀង 1B-5553 ជិះគ្នា៣នាក់ធ្វើដំណើរបញ្ច្រាស់ទិសគ្នាក្នុងល្បឿនលឿនបានបុកគ្នាយ៉ាងពេញទំហឹងបណ្ដាលឲ្យរងរបួសធ្ងន់២នាក់ស្រាល២នាក់។
ក្រោយពេលកើតហេតុជនរងគ្រោះត្រូវបានរថយន្តសង្គ្រោះដឹកទៅសង្គ្រោះនៅមុន្ទីរពេទ្យភ្លាមៗចំណែកម៉ូតូត្រូវបានសមត្ថកិច្ចធ្វើការវាស់វែងយកទៅរក្សាទុកនៅអធិការដ្ឋាននរគបាលខណ្ឌមានជ័យដើម្បីរងចាំដោះស្រាយពេលក្រោយ៕
