ខេត្តកំពង់ឆ្នាំង៖ ឈើសុក្រំ និងឈើរាជថ្កុលចំនួន៨៨ដុំ ដែលជនល្មើសបានកាប់ចេញពីដែនអភិរក្សជម្រកសត្វព្រៃភ្នំឱរ៉ាល់ យកមកលាក់ទុកក្នុងភូមិ ត្រូវបានក្រុមអ្នកសារព័ត៌មានរកឃើញរាយការណ៍ជូន លោក យូ ទិត្យវឌ្ឍនៈ ព្រះរាជអាជ្ញាអមសាលាដំបូងខេត្តកំពង់ឆ្នាំង ហើយបានបញ្ជារអោយកម្លាំងសមត្ថកិច្ចចំរុះចុះបង្ក្រាប និងដកហូតឈើទាំងអស់នោះយកទៅទុកនៅទីស្នាក់ការដែនជម្រកសត្វព្រៃភ្នំឱរ៉ាល់ ដើម្បីកសាងសំណុំរឿងតាមនិតិវិធីបញ្ជូនទៅតុលាការ។ ការបង្ក្រាបនេះបានធ្វើឡើងនៅវេលាម៉ោង១២និង១៥នាទីថ្ងៃទី២៣ ខែកុម្ភៈ ឆ្នាំ២០១៦ នៅក្នុងភូមិម៉ាក់ ភូមិមោង ឃុំក្បាលទឹក ស្រុកទឹកផុស ខេត្តកំពង់ឆ្នាំង។
នៅព្រឹកថ្ងៃទី២៣ ខែកុម្ភះ នៅក្នុងភូមិម៉ាក់ ភូមិមោងនេះ ក្រុមអ្នកសារព័ត៌មានបានប្រទះឃើញគំនរឈើសុក្រំ និងឈើរាជថ្កុលចំនួន៣៣កន្លែង ស្មើនឹង៨៨ដុំ ដែលមានស្នាមកាប់ជ្រៀកថ្មីៗ ត្រូវជនល្មើសលួចលាក់ទុកនៅតាមភូមិ ដើម្បីបញ្ចេញលក់អោយពួកឈ្មួញ។
តាមប្រភពពីអ្នកភូមិជាអ្នកស៊ីឈ្នួលដឹកឈើ និងអ្នកឡើងទៅកាប់ឈើនៅលើភ្នំបានអោយដឹងថា៖ បើពួកគេចង់ឡើងទៅកាប់ឈើនៅលើភ្នំស្ថិតក្នុងដែនជម្រកសត្វព្រៃភ្នំឱរ៉ាល់ គេត្រូវបង់លុយអោយមន្ត្រីបរិស្ថានការពារដែនជម្រកសត្វព្រៃភ្នំឱរ៉ាល់នៅចំណុចនោះ ក្នុងរណាយន្តត្រង់ស៊ីន័រ១គ្រឿង២០ម៉ឺនរៀល និងប្រេងសាំងក្នុង១កាន៣០លីត្របង់២០ម៉ឺនរៀល តែបើអស់ប្រេងចុះមកយក១កានទៀតត្រូវបង់២០ម៉ឺនរៀលបន្ថែមទៀត។ដោយឡែកនៅពេលដឹកឈើចេញពីដែនជម្រកសត្វព្រៃត្រូវបង់១រទេះ ឬ១គោយន្ត១០ម៉ឺនអោយមន្ត្រីបរិស្ថាន និង៨ម៉ឺនរៀល តៀតអោយមន្ត្រីរដ្ឋបាលព្រៃឈើ ទើបដឹកឈើយកមកលក់សិប្បកម្មឬឈ្មួញបាន។ ពួកគេបានអោយដឹងទៀតថា ក្រោយពេលកាប់បានឈើហើយ ពួកគេបានអូសឈើទាំងនោះមកដាក់នៅចំណុចចិនយំ ឬចំណុចរង្វង់មូលនៅលើភ្នំឱរ៉ាល់ ទើបហៅរទេះដឹកឈើចុះមកទុកក្នុងភូមិ។
លោក បឿ ប៊ុនថន នាយកការពារដែនជម្រកសត្វព្រៃភ្នំឱរ៉ាល់បានបញ្ជាក់ថា៖ ទាក់ទងការចោទប្រកាន់របស់អ្នកឡើងទៅកាប់ឈើនេះ និងអ្នកភូមិ លោកមិនបានដឹងនោះឡើយ តែលោកនឹងធ្វើការស្រាវជ្រាវទៅលើមន្ត្រីចាកូនចៅរបស់លោក ថាតើបានប្តព្រឹត្តដូចអ្វីដែលគេបានចោទប្រកាន់ឬអត់។ ដោយឡែកការជ្រៀតចូលលួចលាក់ឡើងទៅកាប់ឈើនៅលើភ្នំវិញលោកបានអោយដឹងដែរថា វាអាចជាការចន្លោះប្រហោងរបស់មន្ត្រីថ្នាក់ក្រោមរបស់លោក ព្រោះថាក្នុងដែនជម្រកសត្វព្រៃជិត៤ម៉ឺនហិកតា លោកមានមន្ត្រីការពារដែនជម្រកសត្វព្រៃតែ១៥នាក់ប៉ុណ្ណោះ។ ពេលខ្លះកិច្ចការពារពិតជាមានចន្លោះប្រហោង គឺការពារខាងមុខលួចចូលខាងក្រោយ ការពារខាងក្រោយលួចចូលខាងមុខ ព្រោះតែផ្លូវឡើងទៅលើភ្នំឱរ៉ាល់ដែនជម្រកសត្វព្រៃ មានច្រកឡើងច្រើន។ ចំណែកឈើដែលរឹបអូសបានចំនួន៨៨ដុំនេះ សមត្ថកិច្ចកំពុងកសាងសំណុំរឿងតាមនិតិវិធីបញ្ជូនទៅកាន់តុលាការខេត្តកំពង់ឆ្នាំង៕
