ខេត្តកណ្តាល៖ គ្រោះថ្នាក់ចរាចរណ៍ដ៏រន្ធត់មួយរវាងម៉ូតូបុកម៉ូតូនៅលើកំណាត់ផ្លូវជាតិលេខ២១បេ បានស៣នាក់ជាកម្មករសំណង់កាលពីវេលាម៉ោង១៨ និង១០នាទី ថ្ងៃទី១៤ ខែឧសភា ឆ្នាំ២០១៤ ត្រង់ចំណុចចន្លោះស្ពានលេខ៥៣-៥៤ ស្ថិតក្នុងភូមិព្រែកធន់ ឃុំព្រែកថ្មី ស្រុកកោះធំ ។
លោកវរសេនីយ៍ត្រី មុយ ចាន់ពេជ្រ អធិការនគរបាលស្រុកកោះធំបានឲ្យដឹងថា មនុស្ស៣នាក់ដែលស្លាប់បាត់បង់ជិវិតក្នុងករណីគ្រោះថ្នាក់ចរាចរណ៍នេះមានឈ្មោះ ខន នឿន ភេទប្រុស អាយុ២៥ឆ្នាំ មុខរបរជាកម្មករសំណង់ មានទីលំនៅក្នុងភូមិព្រែកម្រិញ ឃុំពោធិបាន ស្រុកកោះធំ(ស្លាប់បន្ទាប់ពីបញ្ជូនដល់មន្ទីរពេទ្យ) ជាអ្នកបើកបរនិងឈ្មោះ ខេន ខន ភេទប្រុស អាយុ២៦ឆ្នាំ មុខរបរជាកម្មករសំណង់ មានទីលំនៅក្នុងភូមិព្រែកគង់ ឃុំសំពៅពូន ស្រុកកោះធំ (ស្លាប់ភ្លាមៗនៅកន្លែងកើតហេតុ) ។
លោកអធិការបានបន្តថា ជនរងគ្រោះទាំង២នាក់ខាងលើបានជិះម៉ូតូហុងដាឌ្រីម ធុនសេ១២៥ ស៊េរីឆ្នាំ២០១៤ គ្មានស្លាកលេខ ឌុបគ្នាតាមបណ្តោយផ្លូវជាតិលេខ២១បេ ក្នុងទិសដៅពីត្បូងទៅជើង ខណៈបើកដល់ចំណុចកើតហេតុក៍បានបន្ថែមល្បឿនឡើងវ៉ារថយន្តមួយគ្រឿង ដែលបើកបរនៅខាងមុខ តែវ៉ាមិនផុតក៍ជ្រុលទៅបុកជាមួយម៉ូតូម៉ាកហុងដាឌ្រីម ធុនសេ១២៥ ស៊េរីឆ្នាំ២០១១ ពណ៌ខ្មៅ ពាក់ស្លាកលេខ រតនៈគីរី 1A-7658បើកបរដោយឈ្មោះ ហ៊ួ ស៊ីថា ភេទប្រុស អាយុ២០ឆ្នាំ មុខរបរជាកម្មករសំណង់ មានទីលំនៅក្នុងភូមិកំពង់ស្វាយកណ្តាល ឃុំព្រែកថ្មី ស្រុកកោះធំ (ស្លាប់ភ្លាមៗនៅកន្លែងកើតហេតុ) ។
លោកវរសេនីយ៍ត្រី មុយ ចាន់ពេជ្រ អធិការនគរបាលស្រុកកោះធំបានបញ្ជាក់ថា ក្រោយពីមានហេតុការណ៍កើតឡើងសមត្ថកិច្ចនគរបាលស្រុកកោះធំ បានប្រគល់ទៅឲ្យក្រុមគ្រួសារយកទៅធ្វើបុណ្យតាមប្រពៃណី។ចំណែកឯម៉ូតូទាំង២គ្រឿងត្រូវបានសមត្ថកិច្ចនគរបាលជំនាញចរាចរណ៍ធ្វើការវាស់វែង និង ធ្វើកំណត់ហេតុដកហូតនាំយកទៅរក្សាទុកនៅអធិការនគរបាលស្រុកកោះធំ ដើម្បីចាត់ការតាមច្បាប់ ៕
