កំពង់ស្ពឺ=ដីបឹងអូរក្រាំងអំបិលដែលជាអាងស្តុបទឹកដ៏ធំរបស់ខេត្តកំពង់ស្ពឺត្រូវបានមតិមហាជនលើកឡើងកប់ៗមាត់ថាបានបាត់បងយ៉ាងច្រើននេះបើគិតពីជំនាន់ដូនតាដែលមានទំហំជាង ៣០០ហិតា ហើយពេលនេះសល់ជាង១០០ហិតា ។ចំពោះការបាត់បង់ដីចំណីបឹងនេះមន្ទីរពាក់ពន្ធ័បានប្រាប់ថា ដីដែលគេកំពង់សាងសង់និងមួយចំនួនបានចាក់ហើយគឺធ្វើឡើងស្របច្បាប់ទាំងអស់ ។
ដីបឹងអូរក្រាំងអំបិលស្ថិតក្នុង ឃុំវល្លស មួយផ្នែកនិងឃុំត្រពាំងគងមួយផ្នែកក្នុងស្រុកសំរោងទង ខេត្តកំពង់ស្ពឺដែលមានចំនួនជាង ២០០ហិតានេះគិតតាំងពីឆ្នាំ២០០០ តែមកដល់ពេលនេះមន្ទីរពាក់ពន្ធ័បានប្រាប់ថានៅសល់ជា ១០០ហិតា ឯការបាត់បង់អាជ្ញាធរថាអ្នកយកសុទ្ធតែស្របច្បាប់ទាំងអស់ ។
មានការរំលោភយកដីចំណីបឹងយ៉ាងគឃ្លើនពីសំណាក់ឈ្មួញរកស៊ីដី រួមទាំងមានការឃុបឃិត ពីអាជ្ញាធរតាំងពីក្រោមរហូតដល់ថ្នាក់លើ បានសម្របសម្រួលឲ្យដីចំណីបឹងដ៏ធំល្វឹងល្វើយក្លាយជាដីឯជនយ៉ាងស្របច្បាប់ ហើយមួយចំនួនបានក្លាយជារបស់ក្រុមហ៊ុនយ៉ាងរំភើយ ខណៈដែលមន្ទីរពាក់ពន្ធ័កំពង់តែឆ្លើយយកត្រូវរៀងៗខ្លួនដោយមិនគិតពីផលប្រយោជន៏ជាតិជារួម ។
បច្ចុប្បន្នគេបានឃើញយ៉ាងច្បាស់ថាដីបឹងអូរក្រាំងអំបិល កំពង់រួមតូចគួរឲ្យបារម្មណ៏យ៉ាងខ្លាំងពីព្រោះបឹងមួយនេះវាបានបំរើផលប្រយោជន៏ដល់ពលរដ្ឋរហូតចំនួន ៣ខេត្តក្នុងនោះមាន ខេត្តកំពង់ស្ពឺ ខេត្តកណ្តាល និងមួយផ្នែកទៀតរាជធានីភ្នំពេញដែរ តាមរយៈប្រឡាយមេ តាហោ និងបានស្រោចស្រប់ស្រូវប្រាំង វស្សារាប់ម៉ឺនហិតា រួមទាំងការប្រើប្រាស់របស់មនុស្ស និងសត្វពាហនៈជាច្រើន ។ មានប្រជាពលរដ្ឋជាច្រើនបានលើឡើងថា ផ្ទៃបឹងបើគិតតាំងពីជំនាន់ដូនតាគាត់មកមានមិនតិចជាង ៣០០ហិតាទេ ហើយពួកគាត់ជាអ្នកភូមិបានអាស្រយ័ផលនេសាទ និងផលបន្លែផ្សេងៗរាល់ឆ្នាំ ។ពួកគាត់បានបន្តថាមកដល់ពេលនេះគាត់ទើបតែដឹងថាផ្ទៃរួមតូចនៅសល់ត្រឹមជាង ១០០ហិតាជាចំនួនមួយគួរព្រួយបារម្មណ៏យ៉ាងខ្លាំង ។ពួកគាត់បាននិយាយថាអាជ្ញាធរគួរតែរកវិធានការទប់ស្កាត់ឲ្យខានតែបានកុំឲ្យមានការរំលោភបំពានដីចំណីបឹងនេះ បន្តទៀត។ដោយបច្ចុប្បន្នកំពង់មានរោងចក្រមួយបានសាងសង់ដល់ពាក់កណ្តាលបឹងហើយនេះបើមើលពីលើស្ពានមក ។
បើតាមការឲ្យដឹងពីលោក អ៊ៀ ពិសិដ្ឋ ប្រធានមន្ទីរធនធានទឹកបានឲ្យដឹងថា តាមលោកដឹងដីផ្ទៃបឹងសរុបមានត្រឹមតែជាង ២០០ហិតាទេ តែមកទល់និងពេលនេះផ្ទៃបឹងនៅសល់តែជាង១០០ ហិតាតែប៉ុណ្ណោះ ។លោកប្រធានមន្ទីរបានបន្តថា កាលពីឆ្នាំ២០០០ ក្រសួងបានចេញសេចក្តីជូនដំណឹងមួយ ដោយឲ្យរក្សាទុកដីចំណីបឹង២៥ម៉ែត្រពីកម្ពស់ទឹកបឹងដែរ ក្រោយមកទៀតក៏មានចេញអនុក្រិត ដោយបានកំណត់ដីចំណី ១០០ម៉ែត្រចាប់ពីផ្ទៃបឹងពទ្ធ័ជុំវិញ ។
លោកពិសិដ្ឋ ប្រធានមន្ទីរបានលើកឡើងថាការព្រួយបារម្មណ៏របស់ពលរដ្ឋត្រឹមត្រូវណាស់តែខាងមន្ទីរក៏មិនបានទទួលការជូនដំណឹង និងឲ្យចុះត្រួតពិនិត្យការដ្ឋានចាក់ដីនៅជុំវិញណាមួយឡើយ ។
ដោយឡែកលោក តាប់ ម៉ាឡៃ ប្រធានមន្ទីរដែនដី នគររួបណីកម្មនិងសំណង់(សុរិយោដី)ខេត្តកំពង់ស្ពឹបានឲ្យដឹងថា ការចាក់នានាកន្លងមកបានធ្វើឡើងស្របតាមបណ្ណ័គ្រប់គ្រងអចលនៈវត្ថុ របស់ពលរដ្ឋត្រឹមត្រូវ ហើយពួកគាត់ក៏មានបណ្ណ័ជាលក្ខណៈប្រពន្ធ័ដែរ ។ ប្រធានមន្ទីរបន្តទៀតថា ការកាន់កាប់ដីរបស់បលរដ្ឋទាំងអស់មានលក្ខណៈជាប្រពន្ធ័ និងមានការបិទផ្សាយត្រឹមត្រូវតាមបច្ចេកទេសនិងស្របតាមច្បាប់កំណត់ ។
ក្រុមអ្នកវិភាគបានលើកឡើងថា បើសិនការបាត់ដីបឹងនោះពិតជាការអភិវឌ្ឍន៏នោះវាមិនអីទេ ហើយបើការបាត់ដីចំណីបឹងនោះបានចំណូលចូលរដ្ឋនោះក៏មិនអីដែរ តែប្រយត្ន័បាត់ដីចំណីបឹងរាប់រយហិតាបែជាបានលុយចូលហោប៉ៅបុគ្គលនោះជាការខាតបង់យ៉ាងធ្ងន់ធ្ងរដែលទាមទារឲ្យអង្គភាពពាក់ពន្ធ័ធ្វើការស៊ើបអង្កេតឲ្យបានត្រឹមត្រូវបំផុត ៕ដោយ ភ្នំស្រួច
