ខេត្តកំពង់ធំ ៖ ដោយមានការយកចិត្តទុកដាក់ ពីសំណាក់ថ្នាក់ដឹកនាំ បានយល់ពីសុខទុក្ខរបស់មន្ត្រីថ្នាក់ក្រោមដែលបាន ខិតខំបំពេញតួនាទីភារៈកិច្ចការពារសន្តិសុខ និងសុវត្តិភាពជូនប្រជាពលរដ្ឋ ទើបឯកឧត្តម ស្នងការ បានរៀបចំតម្លើងឋានន្តរសក្កិ ដល់មន្ត្រីក្រោមឳវាទ គ្រប់អធិការ ចំណុះឲ្យស្នងការនគរបាលខេត្ត កំពង់ធំ ។
ជាក់ស្តែង នៅក្នុងបរិវេណអធិការដ្ឋាននគរបាលស្រុកស្ទោង មានរៀបចំពិធីបំពាក់ឋានន្តរសក្កិមន្ត្រីនគរបាល ជាតិ ក្រោមអធិបតីភាព ឯកឧត្តម ឧត្តមសេនីយ៍ត្រី ផាន់ សុផេង ស្នងការនៃស្នងការដ្ឋាននគរបាល ខេត្តកំពង់ធំ និងជាទីប្រឹក្សាឯកឧត្តម បណ្ឌិត ងួន ញ៉ិល អនុប្រធានទី១ នៃរដ្ឋសភា និងលោក ព្រឹម រដ្ឋា អភិបាល ស្រុកស្ទោង ព្រមទាំងស្នងការង និងមន្ត្រីប៉ូលិសនៃអធិការស្រុកស្ទោងជាច្រើនរូប ។ បន្ទាប់ពីលោក វរៈសេនីយ៍ត្រី សួស សាកុល នាយការិយាល័យបុគ្គលិក បានអានសេចក្តីសម្រេច របស់ អគ្គស្នងការនគរបាលជាតិ ស្តីពីការតំម្លើងឋានន្តរសក្កិដល់មន្ត្រីនគរបាល ស្រុកស្ទោងរួចមក ឯកឧត្តម ឧត្តមសេនីយ៍ត្រី ផាន់ សុផេង បានបំពាក់ឋានន្តរសក្កិដល់មន្ត្រីនគរបាល ដែលមាន ថ្នាក់អនុសេនីយ៍ឯកចំនួន៥រូប ថ្នាក់អនុសេនីយ៍ទោ ចំនួន ៥រូប អនុសេនីយ៍ត្រី ៩ រូប ថ្នាក់ព្រិន្ទបាលឯក ៤០រូប ពលបាលឯក ៥ រូប ។
តំណាងនគរបាលស្រុកស្ទោង បានប្តេជ្ញាចិត្តខិតខំ អនុវត្តនូវបទបញ្ជាលេខ០០៦ របស់អគ្គស្នងការនគរបាល ជាតិ និងអនុវត្តន៍បំពេញតាមតួនាទី ភារៈកិច្ច ដែលថ្នាក់លើប្រគលជូន ប្តេជ្ញាការពាររដ្ឋាភិបាលស្របច្បាប់ ដែលកើតឡើងពីការបោះឆ្នោត និងការពារព្រះមហាក្សត្រ ហ៊ានលះបង់គ្រប់ឧបស័គ្គដើម្បីបុព្វហេតុប្រទេស ជាតិ និងធ្វើជាគំរូល្អ សម្រាប់យុវ័យ មិនឲ្យមានការពាក់ព័ន្ឋទៅនឹងគ្រឿងញៀន ល្បែងស៊ីសង មិនជឿលើ ការញ៉ុះញ៉ងពីសំណាក់ការឃោសនារបស់បក្សដ៏ទៃ។
លោក ព្រឹម រដ្ឋា អភិបាលស្រុកស្ទោង បានកោតសសើរ និងវាយតំលៃខ្ពស់ ចំពោះអធិការស្រុកស្ទោង ដែល បានចូលរួមសហការគ្រប់ ការងារចាំបាច់ ទាំងផ្នែកសន្តិសុខ និងសណ្តាប់ធ្នាប់សាធារណៈ ការពារសន្តិសុខ ជូនប្រជាពលរដ្ឋ ឲ្យទទួលបាននូវសុវត្តិភាពខ្ពស់ ជាពិសេសអធិការ ស្រុកស្ទោងតែងតែចូលរួមយ៉ាងសកម្ម ក្នុងការបង្ក្រាបបទល្មើស នេសាទ បទល្មើសព្រៃឈើ និងបទល្មើសផ្សេងៗ នៅតាមមូលដ្ឋាន ប្រកាន់ភ្ជាប់ នូវគោលនយោបាយ ភូមិឃុំសុវត្តិភាពទាំង ៩ ចំនុច ទទួលបានលទ្ធផលល្អប្រសើរ ។
ឯកឧត្តម ឧត្តមសេនីយ៍ត្រី ផាន់ សុផេង បានមានប្រសាសន៍ណែនាំ ឲ្យមន្ត្រីនគរបាលអធិការនគរបាលស្រុកស្ទោង ទាំងអស់ខិតខំបំពេញតាមតួនាទីភារៈកិច្ច ឲ្យបានខ្ជាប់ខ្ជួន សិក្សារៀនសូត្របន្ថែមស្រាវជ្រាវ រកចំណេះដឹង ពីចំណេះវិជ្ជា ច្បាប់ ក្រមសីលធម៌របស់កងកម្លាំងដើម្បីឲ្យសមជាមន្ត្រីនគរបាលជាតិ ដែលមានគុណភាព និងត្រូវចេះសាមគ្គីគ្នាផ្ទៃក្នុង ចូលរួមរក្សានូវសេចក្តីថ្លៃថ្នូររបស់អង្គភាព មិនបទ្ទាបខ្លួនឲ្យធ្លាក់ ទៅកន្លែងល្បែងស៊ីសង គ្រឿងញៀន និងអំពើល្មើសច្បាប់ទាំងពួង ក្នុងនាមយើងជាកងកម្លាំង ជាមន្ត្រីយុត្តិធម៌ ត្រូវធ្វើអ្វីជាគំរូដល់មហាជន ជាផលប្រយោជន៍ក្នុងសង្គមជាតិ ត្រូវត្រិះរិះពិចារណា កុំបីជឿងលើការ ឃោសនាញ៉ុះញ៉ងបោកបញ្ឆោតពីសំណាក់ជនដ៏ទៃ ដើម្បីបំបែកបំបាក់ផ្ទៃក្នុងនៃអង្គភាព ។ 
