ខេត្តរតនគិរី៖ នារីក្មេងៗជនជាតិវៀតណាម៥នាក់ត្រូវនគរបាលអន្តប្រវេសន៍បញ្ជូនទៅប្រទេសវៀតណាមតាមច្រកទ្វារអន្តរជាតិអូរយ៉ាដាវ កាលពីរសៀលថ្ងៃទី២៧ ខែកុម្ភៈ ឆ្នាំ២០១៦ ដោយសារនារីទាំង៥នាក់នេះមកលក់កាហ្វេហើយបំរើសេវាផ្លូវភេទទៀត។បើតាមមន្ត្រីនគរបាលអន្តោប្រវេសន៍នៃស្នងការដ្ឋាននគរបាលខេត្តរតនគិរីប្រាប់ឲ្យដឹងថានារីក្មេងជនជាតិវៀតណាមទាំង៥ខាងលើនោះមកបំរើការងារក្នុងហាងកាហ្វេនៅទីរួមស្រុកអូរយ៉ាដាវ ស្នាក់នៅគ្មានវីសា និងប័ណ្ណសំគាល់ការងារ ហើយក៏ប្រកបមុខរបរសេវាផ្លូវភេទផងដែរទើបនគរបាលអន្តោប្រវេសន៍បញ្ជូនទៅប្រទេសវៀតណាមវិញ។
រីឯម្ចាស់ហាងកាហ្វេជនជាតិវៀតណាមឈ្មោះ ង្វៀន ធីថាញ់ម៉ាយ មានលិខិតអនុញ្ញាតិប្រកអាជីវកម្មសេវាកម្ម ពាណិជ្ជកម្ម ចុះហត្ថលេខាដោយលោកភួ ធាឡុំ ប្រធានមន្ទីរពាណិជ្ជកម្មខេត្តរតនគិរីកាលពិថ្ងៃទី២៥ ខែកុម្ភៈ ឆ្នាំ២០១៦ កន្លងទៅ។
ក្រៅពីហាងកាហ្វេបង្កប់សេវាផ្លូវភេទមានម្ចាស់ហាងឈ្មោះង្វៀន ធីថាញ់ម៉ាយនេះ នៅទីរួមស្រុកអូរយ៉ាដាវគេសង្កេតឃើញមានហាងកាហ្វេបង្កប់សេវាផ្លូវភេទ៤-៥កន្លែងផ្សេងទៀត ដែលមានស្ត្រីជនជាតិវៀតណាមក្មេងៗកំពុងបំរើសេវាផ្លូវភេទ ប៉ុន្តែមិនទាន់បង្ក្រាប់។
ដោយឡែកនៅទីរួមស្រុកបរកែវ២-៣កន្លែង និងនៅទីរួមស្រុកកូនមុំ១កន្លែងផងដែរគឺជួលផ្ទះលោកភោគ បូរិទ្ធ អធិការស្រុកកូនមុំធ្វើខ្នងបង្អែក ហាងកាហ្វេខាងលើនេះលក់កាហ្វេបង្កប់សេវាផ្លូវភេទគ្រប់ៗហាងតែម្តង។ នេះហើយជាមុខរបររបស់ជនជាតិវៀតណាមដែលប្រកបរមុខរបរអាជីវកម្មយកឡេះលក់កាហ្វេតែប៉ុណ្ណោះ តែធាតុពិតបំរើផ្លូវភេទច្រើនជាង។
សកម្មភាពបើកហាងកាហ្វេបង្កប់សេវាផ្លូវនៅខេត្តរតនគិរីនេះ ដែលប្រជាពលរដ្ឋសំណូមពរអោយសមត្ថកិច្ចជំនាញនិងស្ថាប័នពាក់ព័ន្ធថ្នាក់លើមេត្តាចុះបង្ក្រាបព្រោះវាប៉ះពាល់ដល់វប្បធម៌ប្រពៃណីនិងសេចក្តីថ្លៃថ្លូររបស់ស្ត្រីខ្មែរ៕\
