ខេត្តសៀមរាប នេះគឺជាសេចក្តីបង្ហាញបញ្ជាក់របស់ លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ ក្នុងឱកាសនៃការបើកសម្ពោធទីតាំងថ្មីរបស់សាលាបាយ របស់អង្គការអន្តរជាតិក្រៅរដ្ឋាភិបាលបារាំង ដែលមានឈ្មោះថា អង្គការជួយកម្ពុជា នាព្រឹកថ្ងៃទី២៧ ខែកុម្ភៈ ឆ្នាំ២០១៦ នៅក្រុងសៀមរាប ជាមួយនឹងការវាយតម្លៃថា ៖ សាលាបាយ បានរួមចំណែកជាមួយរាជរដ្ឋាភិបាលកម្ពជា ជួយរំលែកបន្ទុក នៃការកសាងធនធានមនុស្ស ដែលជាក្តាដ៏សំខាន់បំផុត ដើម្បីអភិវឌ្ឃន៍សង្គម និង សេដ្ឋកិច្ចរបស់ប្រទេសជាតិ ។
នៅក្នុងពិធីសម្ពោធនេះ ក៏មានវត្តមានចូលរួមផងដែរ លោកឯកអគ្គរដ្ឋទូតបារាំងប្រចាំនៅកម្ពុជា ឯកឧត្តមរដ្ឋលេខាធិការក្រសួងការងារ និង ក្រសួងទេសចរណ៍ រួមទាំងភ្ញៀវបរទេសជាច្រើននាក់ ។
លោកស្រី Emmanuelle Dethomasតំណាងអង្គការជួយកម្ពុជា មានប្រសាសន៍ថា ៖ ៣២ឆ្នាំកន្លងមកហើយ ដែលអង្គការជួយកម្ពុជា មានវត្តមានជាមួយប្រជាជនកម្ពុជា ហើយឆ្នាំ២០១៦នេះ គឺជាឆ្នាំដ៏ល្អមួយ សម្រាប់កម្មវិធីបណ្តុះបណ្តាលវិជ្ជាជីវៈរបស់សាលាបាយ នៅក្នុងខេត្តសៀមរាប ។ សាលាបាយ បានបង្កើតឡើងនៅលើទីតាំងចាស់ ( ភូមិតាភុល សង្កាត់ស្វាយដង្គំ )នៅក្នុងឆ្នាំ២០០២ ជាមួយនឹងក្តីសុបិន្តជាច្រើន គឺការជួយយុវជនកម្ពុជា ឲ្យគេចផុតពីភាពក្រីក្រ និង ហានីភ័យផ្សេងៗ រួមមានការជួញដូរមនុស្សជាដើម ជាមួយនឹងការគោរពគោលការណ៍រក្សាសកម្មភាពមនុស្សធម៌ ជាមួយប្រជាជនក្រីក្របំផុត តាមរយៈការអប់រំនិងការអភិវឌ្ឍន៍ ។ លោកស្រីបន្តថា ៖ ដោយសារតែមានបំណងចង់ពង្រីកសាលាបាយ ឆ្លើយតបតាមកំណើនសិស្ស ចាប់តាំងពីឆ្នាំ២០១១មក សាលាបាយដែលទើបនឹងកសាងថ្មីនេះ គឺជាក្តីសុបិន្តលើកទី២ ដើម្បីសម្រេចបំណង រៀបចំកម្មវិធីបង្រៀនបែបសម័យទំនើប បំពេញតាមសេចក្តីត្រូវការរបស់បុគ្គលិក ដែលមានសមត្ថភាពក្នុងវិស័យឧស្សាហកម្មទេសចរណ៍ ។
លោក អ៊ិត សំហេង រដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានថ្លែងនូវការចាប់អារម្មណ៍ផងដែរ ចំពោះរបាយការណ៍របស់លោកនាយកសាលាសណ្ឋាគារនិងភោជនីយដ្ឋាន (សាលាបាយ ) ដែលបង្ហាញឲ្យដឹងថា ៖ អង្គការជួយកម្ពុជា បានទិញដីទីតាំងថ្មីនេះ និងបានកសាងអាគារ បំពាក់គ្រឿងសម្ភារៈផ្សេងៗ ចំណាយអស់ថវិកាអស់ ១លាន ៣សែន ៤ម៉ឺន ៥ពាន់ដុល្លាសហរដ្ឋអាមេរិក ។ 
លោក បានសម្តែងនូវការចាប់អារម្មណ៍ចំពោះសាលារៀនផ្នែកសណ្ឋាគារនិងភោជនីយ៍ដ្ឋាន (សាលាបាយ ) ដែលបានផ្តល់ការបណ្តុះបណ្តាលដល់សិស្សក្រីក្រដោយឥតគិតថ្លៃ ព្រមទាំងផ្តល់ សម្ភារៈសិក្សា អាហារ កន្លែងស្នាក់នៅ ឯកសណ្ឋាន ទោចក្រយាន ថ្នាំពេទ្យ ពេញ១ឆ្នាំ និងបានឧបត្ថម្ភថវិកា ក្នុងម្នាក់់ៗ ២៥ ដុល្លា សម្រាប់ការចំណាយប្រចាំខែ ។ ចំណាប់អារម្មណ៍បន្ថែមនោះគឺ សាលាបានសហការជាមួយសណ្ឋាគារលំដាប់ខ្ពស់ប្រមាណជា ១៨សណ្ឋាគារ ដើម្បីឲ្យសិស្សបានអនុវត្តជំនាញ ពិត ជារៀងរាល់ខែ ហើយក្រោយពីបានបញ្ចប់ការសិក្សា សិស្សទាំងនោះទទួលបានការងារធ្វើ ១០០% ៕ 
