ខេត្តសៀមរាប ព្រឹកថ្ងៃទី២៩ ខែកុម្ភៈ ឆ្នាំ២០១៦ នៅទីបញ្ជាការវរសេនាតូចនគរបាលការពារព្រំដែនគោកលេខ១០៥ លោកអូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ បានថ្លែងថា ៖ នៅក្នុងខែមេសាខាងមុខនេះ រាជរដ្ឋាភិបាលកម្ពុជា នឹងពិនិត្យពិចារណាលទ្ធភាព ដើម្បីតម្លើងប្រាក់បៀវត្សរ៍មន្ត្រី-រាជការ កងកម្លាំងប្រដាប់អាវុធបន្ថែមទៀត ដែលយ៉ាងហោចណាស់ ប្រាក់បៀវត្សរ៍មន្ត្រីរាជការ កងកម្លាំងប្រដាប់អាវុធ ដែលស្ថិតក្នុងតម្រឹតទាបបំផុត ត្រូវទទួលបានជាង៧០ម៉ឺនរៀល ។
ឯកឧត្តម បានថ្លែងឲ្យដឹងយ៉ាងដូច្នេះ នៅក្នុងពិធីជួបសំណោះសំណាល និងនាំយកអំណោយ រួមមានសម្ភារៈសំណង់ ស្បៀងអាហារ និងថវិកា មួយចំនួនទៀត ឧបត្ថម្ភជូដល់ កងកម្លាំងនគរបាលការពារព្រំដែនគោកវរៈសេនាតូចលេខ១០៥ និងកងកម្លាំងវរសេនាតូចអន្តរាគមន៍លេខ ៣៩៥ ដែលកំពុងឈរជើង បំពេញភារកិច្ចនៅតំបន់មុម៣ ព្រំដែន៣ប្រទេស ( កម្ពុជា ឡាវ ថៃ ) ដែនភូមិសាស្ត្រសមរភូមិមុខទិសទី១ យោធភូមិភាគទី៤។ អង្គភាពប្រដាប់អាវុធទាំង២នេះ ជាអង្គភាពសម្ព័ន្ធមេត្រីភាពជាមួយក្រសួងសេដ្ឋកិច្ចនិងហិរញ្ញវត្ថុ អស់រយៈកាលជាច្រើនឆ្នាំមកហើយ ដែលបានបង្កើតឡើង ក្រោមអនុសាសន៍ដ៏ខ្ពង់ខ្ពស់ សម្តេចតេជោ ហ៊ុន សែន ប្រមុខនៃរាជរដ្ឋាភិបាលកម្ពុជា ដើម្បីបំរើឲ្យចលនាពង្រឹងខឿនការពារជាតិរបស់ប្រជាជន ក្នុងពាក្យស្លោកដែលថា សមរភូមិក្រោយឧបត្ថម្ភសមរភូមិមុខ ។
នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសភូមិភាគទី៤ និងទី៥ រាយការណ៍ថា ៖ សភាពការណ៍ព្រំដែននាពេលបច្ចុប្បន្ន ស្ថិតក្នុងស្ថានភាពល្អប្រសើរ ហើយកំពុងតែឈានឆ្ពោះទៅរកការអភិវឌ្ឍន៍ ទាំងក្នុងដែនគ្រប់គ្រងរដ្ឋបាល និងការកសាងអង្គភាពប្រដាប់អាវុធ ។ កងកម្លាំងនគរបាលជាតិ បានសម្រេចភារកិច្ច ដោយមានកិច្ចសហការជាមួយកងយោធពលខេមរភូមិន្ទ ។ ប្រជាពលរដ្ឋដែលរស់នៅក្នុងតំបន់ព្រំដែន មានកិច្ចសហការល្អជាមួយអាជ្ញាធរដែនដី និងសមត្ថកិច្ចពាក់ព័ន្ធ អនុវត្តគោលនយោបាយភូមិឃុំមានសុវត្ថិភាព រក្សាសន្តិសុខក្នុងមូលដ្ឋានបានល្អ ។
នាយឧត្តមសេនីយ ខេង សុមេធបានរាយការណ៍ជូនឯកឧត្តមរដ្ឋមន្ត្រីផងដែរថា កងកម្លាំប្រប្រដាប់អាវុធ ដែលកំពុងឈរជើងការពារបូរណភាពដែនដីនៃមានមាតុភូមិ បានទទួលហើយការយកចិត្តទុកដាក់ពីសំណាក់រាជរដ្ឋាភិបាល ក្នុងការតម្លើងប្រាក់បៀវត្សរ៍កន្លងមក ។ គ្រប់បណ្តាអង្គភាពទាំងអស់ ត្រូវបានក្រសួងសេដ្ឋកិច្ចនិងហិរញ្ញវត្ថុ បើប្រាក់បៀវត្សយ៉ាងទៀងទាត់ នាអំឡុងសប្តាហ៍ទី៤ ជារៀងរាល់ខែ ។
លោក អូនព័ន្ធ មុនីរ័ត្ន រដ្ឋមន្ត្រីក្រសួងសេដ្ឋកិច្ចនិងហិរញ្ញាវត្ថុ ក្នុងនាមរាជរដ្ឋាភិបាលកម្ពុជា និងក្នុងនាមជាអង្គភាពសម្ព័ន្ធមេត្រីភាព បានសម្តែងនូវក្តីសោមនស្សរីករាយជាមួយលទ្ធផលនៃការអភិវឌ្ឍន៍តំបន់ព្រំដែន ដែលជាចក្ខុវិស័យរបស់រាជរដ្ឋាភិបាល និងភាពរីកចម្រើនរឹងមាំនាំការកសាងអង្គភាពប្រដាប់អាវុធជួរមុខ ជាមួយនឹងការពាំនាំនូវក្តីនឹករលឹករបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ផងដែរ ចំពោះកម្លាំងជួរមុខទាំងអស់ ។
លោកបានលើកឡើងថា បច្ចុប្បន្ននេះ ក្រសួងសេដ្ឋកិច្ចនិងហិរញ្ញវត្ថុ បានខិតខំប្រើប្រាស់គ្រប់កម្លាំងជំនាញ អនុវត្តបទបញ្ជាដ៏ខ្ពង់ខ្ពស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការពង្រឹងប្រភពថវិកាចំណូលសេដ្ឋកិច្ចជាតិ ដើម្បីបំពេញមហិច្ឆតានៃការលើកកម្ពស់ជីវភាពរស់នៅរបស់មន្ត្រីរាជការ កងកម្លាំងប្រដាប់អាវុធ តាមរយៈនៃផែនការតម្លើងប្រាក់បៀវត្សរ៍ ហើយក៏ជាមធ្យោបាយពង្រឹងប្រព័ន្ធការងារផងដែរ។
ឯកឧត្តមបានឲ្យដឹងថា ៖ តម្រូវការក្នុងការផ្គត់ផ្គង់ប្រាក់បៀវត្សរ៍ជូនបុគ្គលិក មន្ត្រីរាជការ និងកងកម្លាំងប្រដាប់អាវុធគ្រប់ប្រភេទ គឺរាជរដ្ឋាភិបាលត្រូវបានចំណាយថវិកាជាតិ ក្នុង១ខែ ២៦០ពាន់លានរៀល ហើយនឹងត្រូវបានចំណាយប្រហែលជាជិតទ្វេរដង នៅពេលមានដែលការតម្លើងប្រាក់បៀរវត្សរ៍ នៅពេលខាងមុខ ។
ពាក់ព័ន្ធទៅនឹងអំណោយឧបត្ថម្ភសម្រាប់អង្គភាពសម័ន្ធមេត្រីភាពជួរមុខ លោកបានបញ្ជាក់ថា ៖ អំណោយទាំងអស់នេះ ក្រសួងសេដ្ឋកិច្ចនិងហិរញ្ញវត្ថុ មិនបានប្រើប្រាស់ថវិការបស់ជាតិនោះទេ ព្រោះវាជាមនសិការស្ម័គ្ររបស់សមរភូមិក្រោយ ដើម្បីសមរភូមិមុខ ។ ឯកឧត្តមបានថ្លែងអំណរគុណ ចំពោះថ្នាក់ដឹកនាំ បុគ្គលិកមន្ត្រីរាជការក្រោមឱវាទក្រសួងសេដ្ឋកិច្ចទាំងអស់ រួមទាំងនៅបណ្តាខេត្ត-រាជធានីទូទាំងប្រទេសផងដែរ ដែលបានរួបរួមគ្នាបរិច្ចាគវិភាគទាន ដើម្បីពង្រឹងខឿនការពារជាតិ ឧបត្ថម្ភសមរភូមិ តាមអនុសាសន៍ដ៏ខ្ពង់ខ្ពស់ នៃប្រមុខរាជរដ្ឋាភិបាលកម្ពុជា ។
អំណោយទាំងនោះ រួមមានសម្ភារៈសំណង់ ស្បៀងអាហារសារុបប្រមាណជិត៣០មុខ ។ ដោយឡែកថវិកាត្រូវបានឧតបត្ថម្ភជូននាយនិងពលនគរបាល នាយនិងពលទាហានក្នុងអង្គភាពទាំង២ម្នាក់ៗ៥ម៉ឺនរៀល និងបានឧបត្ថម្ភដល់អង្គភាពនគរបាល ៥លាន ៥សែនរៀល ឧបត្ថម្ភសម្រាប់អង្គភាពយោធា ៧លានរៀល ៕
