ខេត្តព្រះវិហារ សេចក្តីរាយការណ៍បង្ហើបអោយដឹងថាមកដល់ពេលនេះស្ដ្រីឈ្មួញដឹកជញ្ជូនឈើមូលម្នាក់កំពុងមមាញញឹកកើបលុយដោយសារគាត់ចេះបន្លំដឹកលើសចំណុះគ្រាន់តែបង់លុយថ្លៃបាយទឹកអោយសមត្ថកិច្ចនិងកុងត្រូលជជុះប្រមាណ៦០កន្លែងនៅតាមដងផ្លូវជាតិលេខ៦២ជាហូរហែររហូតដល់ព្រំប្រទល់ខេត្តកំពង់ធំជាការស្រេចតែម្តង។
ប្រភពព័ត៌មានពីសមត្ថកិច្ចមូលដ្ឋានបានអោយដឹងនៅល្ងាចថ្ងៃទី២៩កុម្ភះ២០១៦ថាស្ដ្រីឈ្មួញខាងលើឈ្មោះណែមរកស៊ីដឹកឈើមូលចេញពីក្រុមហ៊ុនសម្បទានសេដ្ឋកិច្ចហុងសុភាពនៅក្បែរកងពលតូចអន្តរាគមន៍លេខ៧ស្ថិតក្នុងឃុំស្រអែមស្រុកជាំក្សាន្តខេត្តព្រះវិហារ។ក្នុង១យប់អាចដឹកជញ្ចូនឈើចាប់ពី៣ទៅ៤រថយន្តយីឌុបបើសរុបក្នុង១ខែអាចដឹកចេញបានចំនួន៣០ទៅ៤០រថយន្តយីឌុប។
កម្មករលើកឈើក្នុងក្រុមហ៊ុនហុងសុភាពបានបង្ហើបអោយដឹងថាសព្វថ្ងៃនេះស្ដ្រីឈ្មួញឈើឈ្មោះណែមមកពីខេត្តកំពង់ធំនៅតែដឹកឈើមូលចេញដដែល។ក្រុមហ៊ុនហុងសុភាពរកស៊ីដឹកជញ្ជូនឈើមូលនិងឈើអារលេខ១និងលេខ២ថែមទៀត។
តាមគោលការណ៍រដ្ឋបាលព្រៃឈើមិនអនុញ្ញាតអោយក្រុមហ៊ុនណាមួយអាចដឹកជញ្ជូនផលអនុផលព្រៃឈើចេញពីគោលដៅនៅពេលយប់ព្រលប់បានទេត្រូវចេញដំណើរនៅពេលថ្ងៃដើម្បីងាយស្រួលជំនាញមេព្រៃត្រួតពិនិត្យនៅតាមដងផ្លូវ។ប៉ុន្តែស្ដ្រីឈ្មួញឈើឈ្មោះណែមនៅតែអាចដឹកឈើមូលចេញពីតំបន់ព្រំដែនប្រាសាទព្រះវិហារឆ្ពោះទៅកាន់ខេត្តកំពង់ធំយ៉ាងរលូនអស់រយះពេលជិត៣ឆ្នាំមកហើយ។
ប្រភពព័ត៌មានផ្សេងទៀតបានបង្ហើបអោយដឹងថាស្ដ្រីឈ្មួញឈើឈ្មោះណែមជាមនុស្សមានឥទ្ធិពលខ្លាំងម្នាក់ដោយសារមាននាយឧត្តមសេនីយ៍កងទ័ពម្នាក់កាងនៅពីក្រោយខ្នងយ៉ាងរឹងមាំធ្វើអោយមុខរបររកស៊ីដឹកជញ្ជូនឈើមូលរបស់គាត់ប្រព្រឹត្តទៅយ៉ាងសុខស្រួលប្រៀបដូចជិះសេះលែងដៃ។ឮថាប្តីរបស់ចែណែមជាប៉េអឹមនៅខេត្តកំពង់ធំថែមទៀត។សមត្ថកិច្ចប្រចាំដងផ្លូវតែងតែឆ្លើយថាអត់ដឹងរឺរវល់ទៅប្រជុំនៅភ្នំពេញនៅពេលដឹងខ្លួនថាអ្នកសារព័ត៌មានរាយការណ៍អោយចុះមកឆែកមើលច្បាប់និងពិនិត្យចំនួនឈើជាក់ស្តែង។
រីឯឈ្មួញឈើដុះស្លែម្នាក់ទៀតឈ្មោះគិតរស់នៅទីរួមស្រុកគូលែនក៍ល្បីល្បាញសំរុកដឹកជញ្ជូនឈើតាប់និងសន្លឹកទ្វារកែច្នៃតាមរថយន្តសាំយ៉ុងនិងយីឌុបចេញពីរោងសិប្បកម្មរបស់ខ្លួនដ៍ធំមួយកន្លែងនៅភូមិពោធិ៍ទាបឃុំម្លូរព្រៃ១ស្រុកឆែបខេត្តព្រះវិហារយ៉ាងរលូនផងដែរ។គាត់គ្រាន់តែបង់លុយតាមដងផ្លូវជាតិលេខ៩និងលេខ៦២អោយសមត្ថកិច្ចនិងកុងត្រូលជជុះប្រមាណ៣០កន្លែងរហូតដល់ព្រំប្រទល់ស្រុកស្វាយលើជាការស្រេច។
