ខេត្ដក្រចេះ ៖ ក្រុមនិស្សិតជាច្រើន នាក់ដែលធ្វើដំណើរទស្សនកិច្ចទៅកម្សាន្ដ នៅរមនីយដ្ឋានធម្មជាតិព្រែកាំពីបាន រួចផុតពីគ្រោះថ្នាក់ ខណៈខ្ចូសដែលពួក គេកំពុងអង្គុយលេងត្រូវបាក់ស្រុតធ្លាក់ ចូលទឹកយ៉ាងរប៉ាតរប៉ាយ ហើយមនុស្ស ជាច្រើននាក់បានធ្លាក់ទឹក និងហែលរួច ផុតពីគ្រោះថ្នាក់នេះ ។
លោក អ៊ុន ហយ នាយប៉ុស្ដិ៍នគរបាល សំបូរបានឱ្យដឹងថា ករណីគ្រោះថ្នាក់ ដោយសារបាក់ ខ្ចូសនៅរមនីយដ្ឋានកាំពី បានកើតឡើងនៅវេលាម៉ោង២និង៣០ នាទីរសៀល ថ្ងៃទី១៥ ខែឧសភា ឆ្នាំ២០១៤ ប៉ុន្ដែពុំមាននរណាម្នាក់គ្រោះថ្នាក់នោះ ឡើយ ដោយសារតែក្រុមនិស្សិតដែល មកទេសចរកម្សាន្ដចេះហែលទឹក និង ជួយគ្នាបានទាន់ពេលវេលា ។
លោកនាយប៉ុស្ដិ៍បន្ដថា សម្ភាររបស់ ក្រុមនិស្សិតបានបាត់បង់មួយចំនួនមាន ដូចជា ទូរស័ព្ទ២គ្រឿង អាផេត១គ្រឿង លុយមួយចំនួន ប៉ុន្ដែម្ចាស់តូបបានធ្វើ ការសម្របសម្រួលជាមួយជនរងគ្រោះ ដោយសងថ្លៃបាត់បង់គិតជាទឹកប្រាក់ ចំនួន៧៥០ដុល្លារ ។
ភ្ញៀវទេសចរដែលម្នាក់ៗភ័យលស់ ព្រលឹងបាននិយាយថា ម្ចាស់តូបក៏ដូច ជាអ្នកគ្រប់គ្រងរមនីយដ្ឋានព្រែកកាំពី ដែលរមនីយដ្ឋានធម្មជាតិ មិនគួរណាខ្វះ ការទទួលខុសត្រូវ ក្នុងនោះទាំងបញ្ហា អនាម័យ ស្ពានដែលឆ្លងកាត់មិនតុល្យ ភាពទៅនឹងចំនួនមនុស្ស អាចប្រឈម បញ្ហាគ្រោះថ្នាក់ដ៏ធ្ងន់ធ្ងរប្រសិនបើទឹកឡើងធំ ។ កាលពីរដូវចូលឆ្នាំប្រពៃណីជាតិខ្មែរ
មុននេះមានអ្នកទេសចរជាតិ អន្ដរជាតិ ជាច្រើននាក់បានទៅកម្សាន្ដនៅទីនោះ ហើយមនុស្សដ៏កកកុញបញ្ច្រៀតគ្នាលើ ស្ពានដ៏តូច ប្រឈមនឹងគ្រោះថ្នាក់បំផុត ដូចជាពេលនេះសំណាងល្អផងដែរមាន មនុស្សតិច ហើយបាក់ខ្ចូសធ្លាក់ចូលទឹក ត្រូវបានសង្គ្រោះទាន់ពេលវេលា ។
ប៉ុន្ដែ អ្នកទេសចរ រួមទាំងប្រជាពលរដ្ឋរស់នៅ ក្បែររមនីយដ្ឋាននេះសំណូមពរផងដែរ ឱ្យអាជ្ញាធរ ជាពិសេសខាងមន្ទីរទេស ចរណ៍ខេត្ដក្រចេះមេត្ដាយកចិត្ដទុកដាក់ ជួយថែរក្សាសម្អាត ក៏ដូចជាការពារជុំ វិញបញ្ហាគ្រោះថ្នាក់ដល់ប្រជាពលរដ្ឋ ក៏ដូចជាអ្នកទេសចរដែលកើតឡើងជាយថាហេតុនិងខ្វះការទទួលខុសត្រូវពីក្រុមអស់លោក ៕
