ភ្នំពេញៈ ការបង្កើតសហគមន៍កសិកម្មឱ្យបានច្រើន គឺជាការបង្កើននូវបច្ចេកទេស និងមុខរបរបន្ថែមទៀត ជាពិសេសការកាត់បន្ថយភាពក្រីក្ររបស់ប្រជាពលរដ្ឋនៅតាមមូលដ្ឋាន ម្យ៉ាងវិញទៀតជំរុញឱ្យទីផ្សារនៅក្នុងប្រទេសកម្ពុជា កាន់តែប្រសើរឡើងថែមទៀត ។ នេះជាការលើកឡើងរបស់លោក សៀន បូរិន ប្រធានមន្ទីរកសិកម្មរាជធានីភ្នំពេញ នៅក្នុងមហាសន្និបាតប្រចាំឆ្នាំលើកទី១ សហគមន៍កសិកម្មសាមគ្គីដង្កោ ដោយមានការអញ្ជើញចូលរួមពីលោក វើក សាមឿន ចៅសង្កាត់ដង្កោ ស្ថាប័នពាក់ព័ន្ឋ និងអង្គការជាដៃគូ នាព្រឹកថ្ងៃទី៤ ខែមិនា ឆ្នាំ២០១៦ ស្ថិតក្នុងភូមិម័ល សង្កាត់ដង្កោ ខណ្ឌដង្កោ ។
លោក វើក សាមឿន បានមានប្រសាសន៍ថា សហគមន៍កសិកម្មសាមគ្គីដង្កោ ត្រូវចេះរួបរួមសាមគ្គីគ្នា ទ្រទ្រង់និងបង្កើនសមាជិកសហគមន៍ឱ្យបានច្រើនបន្ថែមទៀត ដោយមិនរើសអើងនិន្នាការនយោបាយ ឬឋានៈបុណ្យស័ក្តអ្វីនោះទេ សំខាន់គឺធ្វើយ៉ាងណាបង្កើនមុខរបរកសិកម្មបន្ថែមលើការលក់អង្ករ ដូចជាបន្លែ ត្រី សាច់ ជាពិសេសទីផ្សារលក់ដូរ និងចល័ត ដើម្បីលើកស្ទួយសហគមន៍របស់យើង ។ លោកចៅសង្កាត់ក៏បានក្រើនរលឹកដល់បងប្អូននៅក្នុងសហគមន៍សាមគ្គីដង្កោ ឱ្យបង្កើនផលិតភាពដើម្បីសម្រាប់ប្រកួតប្រជែងលើទីផ្សារនៅក្នុងតំបន់ ក៏ដូចជាឆាកអន្តរជាតិ មួយវិញទៀតវិស័យកសិកម្ម គឺជាមុខរបរមួយបន្ថែមទៀត ដើម្បីទទួលបានកំរៃសម្រាប់ផ្គត់ផ្គង់ជីវភាពនៅក្នុងគ្រួសារ ។
លោក សៀន បូរិន បានបញ្ជាក់ថា ប្រជាពលរដ្ឋនៅតាមសហគមន៍គួរតែបង្កើននូវការយល់ដឹងផ្នែកបច្ចេកវិទ្យាពត៌មានផ្សេងៗ ដើម្បីងាយស្រួលក្នុងការផ្សព្វផ្សាយរាល់ផលិតផលដែលជាស្នាដៃ នៅតាមសហគមន៍នីមួយៗ ហើយនៅពេលឆាប់ខាងមុខនេះសហគមន៍ទីផ្សារ និងសមាហរណកម្មអាស៊ាន នឹងធ្វើឱ្យបងប្អូនកាន់តែងាយស្រួលក្នុងការងារកសិកម្ម និងជំរុញសេដ្ឋកិច្ចជាតិកាន់តែខ្លាំងក្លា ។
សូមបញ្ជាក់ថា សហគមន៍សាមគ្គីដង្កោ មានសមាជិកចំនួន៦១នាក់ ក្នុងនោះសមាជិកជាស្ត្រី៥៦នាក់ និងបុរស៥នាក់ គិតជាគ្រួសារមាន៥៧គ្រួសារ គិតជាភាគហ៊ុនមាន៩៦ភាគហ៊ុន ក្នុងមួយហ៊ុនតម្លៃ១២០,០០០រៀល សរុបជាទឹកប្រាក់ទាំងអស់ចំនួន ១,១៥២,០០០០រៀល និងមានប្រាក់សមាជិកភាពចំនួន៦១០,០០០រៀល ។ ជាមួយគ្នានេះលោក វើក សាមឿន ចៅសង្កាត់ដង្កោ បានចូលរួមថវិការជាមួយសហគមន៍កសិកម្មសាមគ្គីដង្កោ ១០ភាគរយ ស្មើរនឹង១,២១០,០០០រៀល និងជួយជាថវិការសម្រាប់ដាក់លូបង្ហូរទឹក៥០០ដុល្លារផងដែរ ៕
