ខេត្តកំពង់ឆ្នាំង៖ សៃវេនជល់មាន់ដ៏ធំនិងដុះស្លែមួយកន្លែងមានមនុស្សទៅលេងជាប្រចាំរាប់រយនាក់នៅស្រុកកំពង់ត្រឡាច របស់នាយទាហ៊ានសក្ក័៥ម្នាក់ជើងកាងម្នាក់ ត្រូវបានសមត្ថកិច្ចចុះបង្ក្រាបរឹបអូសបានម៉ូតូ១០គ្រឿង សៃវេនមាន់១ មនុស្ស២នាក់ មាន់ជល់១ក្បាល និងសម្ភារៈមួយចំនួនធំទៀត។ កិច្ចបង្ក្រាបនេះបានធ្វើឡើងនៅម៉ោង៣និង១៥នាទីល្ងាច ថ្ងៃទី០៤ ខែមិនា ឆ្នាំ២០១៦ នៅចំណុចវាលឥន្ទ្រី ក្នុងនៅក្នុងភូមិព្រះស្រែ ឃុំលង្វែក ស្រុកកំពង់ត្រឡាច។ ដោយឡែកមុនពេលសមត្ថកិច្ចចុះបង្ក្រាប អ្នកកា សែតមួយក្រុមក្នុងពេលចុះទៅឆ្មក់ថតសកម្មភាពសៃវេនមាន់នេះ ត្រូវបានជើងកាងគំរាមវាយនិងប្រមាថបាញ់សម្លាប់ចោល ព្រោះតែមិនព្រមទទួលលុយសំណូករបស់ពួកគេសុំកុំអោយថត។
អ្នករត់ម៉ូតូឌុបជាដឹកអ្នកទៅជល់មាន់នៅក្នុងទីតាំងខាងលើនេះរាល់ថ្ងៃបានអោយដឹងថា៖ ម្ចាស់សៃវេនមាន់ដុះស្លែជើងកាងនេះមានឈ្មោះ សូ ឆង នាយទាហ៊ានពាក់សក្ក័៥ នៅក្នុងអង្គភាពគីមីសាស្ត្រ ឈរជើងក្នុងឃុំលង្វែក ស្រុកកំពង់ត្រឡាច ជាអ្នកបើកសៃវេនជល់មាន់នេះជាយូរឆ្នាំមកហើយ ដោយគេបើកអោយលេងពីថ្ងៃព្រហស្បត្តិ៍ ដល់ថ្ងៃអាទិត្យ ពេលខ្លះគេបានចល័តលេងនៅទីតាំង ក្បែរៗគ្នាក្នុងដីខេត្តកំពង់ឆ្នាំង កំពង់ស្ពឺ និងខេត្តកណ្តាល ដែលមានពួកអ្នកមានៗមកពីខេត្តក្រុងផ្សេងៗ មកមើលនិងលេងរាប់រយនាក់ មានឡានម៉ូតូរាប់សិបគ្រឿង ដោយគេចាក់មាន់នៅក្នុងសៃវេនក្នុង១គូរៗ តែ៣០ទៅ៥០ម៉ឺនរៀលទេ តែអ្នកចាក់ក្រៅបានចាក់ចាប់ពីមួយពាន់ដុល្លារហូតទៅដល់៥ពាន់ដុល្លាក៏មានដែរ។
នៅមុនពេលសមត្ថកិច្ចនគរបាលព្រហ្មទ័ណ្ឌកំរិតស្រាលខេត្តចុះទៅបង្ក្រាប អ្នកកាសែត៥នាក់បានជិះឡានមួយគ្រឿងឆ្មក់ចូលទៅថតយករូបភាពក្បែរទីតាំងសៃវេនមាន់ ពេលនោះអ្នកជិះម៉ូតូឌុបទៅចាក់មាន់បានឃើញ ក៏បែកការហើយមេការរងសៃវេនមាន់២នាក់ក៏បានចេញមកសម្របសម្រួល សូកលុយក្រុមអ្នកកាសែតសុំកុំអោយថត តែអ្នកកាសែតមិនយក។ ខណៈនោះដែរលោក សូ ឆង ម្ចាស់សៃវេនមាន់មកដល់ បានចាប់ទាញដៃអ្នកកាសែតម្នាក់ទាញចុះពីលើរថយន្តប៉ុនប៉ងវាយ ដោយដឺអោយថតរូបពួកគេមកថតមក…ហើយនិយាយថា ការជល់មាន់នេះបើគេមិនបង់លុយអោយនគរបាល ប៉េអឹម ស្មានថាអាចលេងបានហ្អី… និងមានកូនចៅពួកគេមួយចំនួនទៀតបានឡោមព័ទ្ធរថយន្តអ្នកកាសែតជុំជិត ខ្លះប្រទាញយកម៉ាស៊ីនថតពីអ្នកកាសែតប្រុងបោកចោល ហើយអ្នកមកចាក់មាន់រាប់រយនាក់បានស្រែក គំ រាមពន្យុះទាំងអស់គ្នាថា វាយពួកវាទៅៗៗ… និងខ្លះទៀតបានប្រមាថថាបាញ់ពួកវាចោលទៅៗ…!! ។
នៅពេលកម្លាំងសមត្ថកិច្ចនគរបាលព្រហ្មទ័ណ្ឌកំរិតស្រាលខេត្តមកដល់ តាមបញ្ជាររបស់លោកស្នងការនគរបាលខេត្ត និងលោកព្រះរាជអាជ្ញាខេត្ត ពួកជើងខ្លាំងនិងកូនចៅនិងពួកអ្នកចាក់មាន់រាប់រយអ្នកបានរត់ចែកជើងគ្នាចោលទីតាំង ខ្លះរត់មិនទាន់បានយកម៉ូតូទៅលាក់ទុកក្នុងព្រៃ។ នៅក្នុងកិច្ចបង្ក្រាបនេះសម ត្ថកិច្ចរឹបអូសបាន សៃវេនមាន់១ ម៉ូតូ១០គ្រឿង មាន់ជល់១ក្បាល ស៊ុំមាន់១៥ តុចាក់អាប៉ោង១ កៅអីជ័រមួយចំនួន និងសម្ភារៈមួយចំនួនទៀត។ ដោយឡែកមនុស្ស២នាក់ដែលសមត្ថកិច្ច ចាប់ខ្លួនបាន១ឈ្មោះ កៅ ម៉ុល អាយុ៥០ឆ្នាំ រស់នៅភូមិអំពិលលើ ឃុំអំពិល ស្រុកកំពុងសៀម ខេត្តកំពង់ចាម ២ឈ្មោះ ណាង អុន អាយុ៣៧ឆ្នាំ រស់នៅភូមិស្វាយពក ឃុំស្វាយ ស្រុកសាមគ្គីមានជ័យ ខេត្តកំពង់ឆ្នាំង តែឈ្មោះនេះពេលព្រលប់ៗគេបានរត់គេចខ្លួនបាត់ ពេលសមត្ថកិច្ចជាប់រវល់លើសម្ភារៈដាក់លើរថយន្ត។
ជនសង្ស័យម្នាក់និងវត្ថុតាង ត្រូវបានសមត្ថកិច្ចបញ្ជូនមកស្នងការដ្ឋាននគរបាលខេត្ត កសាងសំ ណុំរឿងតាមនិតិវិធី និងត្រៀមបញ្ជូនទៅតុលាការខេត្តចាត់ការតាមផ្លូវច្បាប់៕ ( សហការី )
