ភ្នំពេញ៖នាយការិយាល័យនគរបាលព្រហ្មទណ្ឌកំរិតធ្ងន់នៃស្នងការនគរបាលរាជធានីភ្នំពេញ លោក អេង សោភា បានឲ្យដឹថា នាព្រឹកថ្ងៃទី ០៧ ខែ មិនា ឆ្នាំ ២០១៦នេះថា បន្ទាប់ពីមានបទបញ្ជាពីនាយឧត្ដមសេនីយ៍ លោក ជួន សុវណ្ណ អគ្គស្នងការរងនិងជាស្នងការនគរបាលរាជធានីភ្នំពេញ ព្រមទាំងមានការសម្របសម្រួលច្បាប់ពីលោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីភ្នំពេញ កម្លាំងនគរបាលព្រហ្មទណ្ឌកំរិតធ្ងន់នៃស្នងការនគរបាលរាជធានីភ្នំពេញបានធ្វើការដាក់បង្ហាញមុខបក្ខពួកក្រុមចោរដែលតែងតែធ្វើសកម្មភាពលួចរថយន្ដនៅក្នុងភូមិសាស្ត្ររាជធានីភ្នំពេញចំនួន៤នាក់ ក្នុងនោះមានម្នាក់ពាក់ព័ន្ធករណីបង្កហឹង្សាដោយចេតុនាមានស្ថានទម្ងន់ទោស បន្ទាប់ពីកម្លាំងនគរបាលព្រហ្មទណ្ឌកំរិតធ្ងន់សហការនិងកម្លាំងនៃអធិការដ្ឋាននគរបាលទាំង៣ខណ្ឌ មាននគរបាលខណ្ឌដូនពេញ នគរបាលខណ្ឌមានជ័យ និងកម្លាំងនគរបាលខណ្ឌសែនសុខ បានប្រតិបត្តិការបន្ត ស៊ើបអង្កេតស្រាវជ្រាវបង្ក្រាបនិងចាប់ខ្លួនបានជាបន្តបន្ទាប់កាលពីថ្ងៃទី៥ ខែ មិនា ឆ្នាំ ២០១៦កន្លងមកថ្មីៗនេះ ។
លោក ភី វិសាល រងការិយាល័យនគរបាលព្រហ្មទណ្ឌកំរិតធ្ងន់នៃស្នងការនគរបាលរាជធានីភ្នំពេញបានបញ្ជាក់ថា ជនត្រូវចាប់ខ្លួនពាក់ព័ន្ធករណីលួចរថយន្ដ១ឈ្មោះប៉ែន ចាន់រិទ្ឋ ហៅញ៉ាញ់ ភេទប្រុស អាយុ៣០ឆ្នាំ មានមុខរបរជាងជួសជុលម៉ូតូ ស្នាក់នៅផ្ទះជួល ផ្លូវលេខ៩២ សង្កាត់ឃ្មួញ ខណ្ឌសែនសុខ ២ឈ្មោះអ៉ិត សុខសោម ភេទប្រុស អាយុ២៧ឆ្នាំ មានមុខរបរជាងជួសជុលភ្លើង ស្នាក់នៅផ្ទះមិនចាំលេខ ផ្លូវលេខ៧ សង្កាត់ភ្នំពេញថ្មី ខណ្ឌសែនសុខ ៣ឈ្មោះជា បូរ៉ា ភេទប្រុស អាយុ២១ឆ្នាំ មានមុខរបរជាងជួសជុលរថយន្ដ ស្នាក់នៅយានដ្ឋានជួសជុលរថយន្ដ យីហោ ឥតសុខុន សង្កាត់ភ្នំពេញថ្មី ខណ្ឌសែនសុខ ៤ឈ្មោះនន់ វិចិត្រ ភេទប្រុស អាយុ៣១ឆ្នាំ លក់និងទិញរថយន្ដ ស្នាក់នៅផ្ទះជួល ផ្លូវលេខ២០៤ សង្កាត់ទឹកថ្លា ខណ្ឌសែនសុខ រាជធានីភ្នំពេញ ។រីឯជនរងគ្រោះឈ្មោះញឹម ឪវ៉ាត ភេទស្រី អាយុ៤៥ឆ្នាំ មុខរបរនៅផ្ទះ ស្នាក់នៅផ្ទះលេខ៩ ក្រុម៣ ភូមិសន្សំកុសល១ សង្កាត់បឹងទំពុន ខណ្ឌមានជ័យ រាជធានីភ្នំពេញ និងជាម្ចាស់រថយន្ដ ម៉ាកកាម៉ារីឆ្លាម ពណ៍ទឹកមាស សេរីឆ្នាំ ១៩៩៨ ដែលមានលេខតួ៤T១BG ២២KTWu ១៩៩២០៥ និងលេខម៉ាស៉ីន ៥៨៦៣៧៥៤៨៧ ។ និងម្នាក់ទៀតដែលពាក់ព័ន្ធករណីហឹង្សាដោយចេតុនាមានឈ្មោះប្រាក់ វិច្ឆិកា ហៅវីត ភេទប្រុស អាយុ១៨ឆ្នាំ មុខរបរមិនពិតប្រាកដ ស្នាក់នៅផ្ទះលេខ៦៩ ផ្លូវ៦៣ សង្កាត់បឹងរាំង ខណ្ឌដូនពេញ រាជធានីភ្នំពេញ ។ចំណែកជនរងគ្រោះឈ្មោះមុនី ពេជ្រមនោរម្យ ភេទប្រុស អាយុ១៤ឆ្នាំ មុខរបរសិស្ស ស្នាក់នៅផ្ទះលេខ១២៣ ផ្លូវលេខ៨៧ BT សង្កាត់បឹងទំពុន ខណ្ឌមានជ័យ រាជធានីភ្នំពេញ ។
គួរបញ្ជាក់ផងដែរថា ក្រោយពីការដាក់បង្ហាញមុខជនត្រូវជាប់សង្ស័យអំពើលួចនិងហឹង្សាដោយចេតុនា កម្លាំងនគរបាលព្រហ្មទណ្ឌកំរិតធ្ងន់នៃស្នងការនគរបាលរាជធានីភ្នំពេញបានសម្រេចប្រគល់រថយន្ដឲ្យជនរងគ្រោះដើម្បីយកទៅប្រើប្រាស់វិញផងដែរ។ដោយឡែកជនត្រូវជាប់សង្ស័យទាំង៥នាក់ ត្រូវបាន កម្លាំងនគរបាលព្រហ្មទណ្ឌកំរិតធ្ងន់នៃស្នងការនគរបាលរាជធានីភ្នំពេញបានកសាងសំនុំរឿងបញ្ជូនខ្លួនជនសង្ស័យទាំងនោះបន្តទៅអយ្យការសាលាដំបូងរាជធានីភ្នំពេញដើម្បីចាត់ការតាមនិតិវិធីច្បាប់នាព្រឹកថ្ងៃទី ០៧ ខែ មិនា ឆ្នាំ ២០១៦នេះ ព្រមទាំងបន្តស្រាវជ្រាវស្វែងរកចាប់ខ្លួនបក្ខពួកដែលនៅសេសសល់ដើម្បីយកមកផ្ដន្ទាទោសតាមច្បាប់ ។ហាស់ កំសាន្ដ
