ស្ទឹងត្រែង៖នគរបាលកោសលវិច្ច័យបច្ចេកទេសនិងវិទ្យាសាស្ត្រនៃស្នងការដ្ឋានខេត្តស្ទឹងត្រែង បានហសការជាមួយក្រុមគ្រូពេទ្យខេត្ត និងមានការចូលរួមពីព្រះរាជអាជ្ញារងអមសាលាដំបូងខេត្តលោកស្រីស៊ុន យ៉ឺតបានចុះពិនិត្យសពជនជាតិអីតាលីម្នាក់ កាលពីព្រឹកថ្ងៃ០៦មិនាធ្វើកោសលវិច្ច័យឃើញថាបានស្លាប់ដោយសារគាំងបេះដូង។
ជនជាតិបរទេសម្នាក់នេះបានស្លាប់កាលពីល្ងាចថ្ងៃទី០៥ខែមិនាឆ្នាំ២០១៥ ក្រោយពីរជនរងគ្រោះ បានធ្វើដំណើរពីប្រទេសឡាវ ឆ្លងតាមព្រំដែនអន្តរជាតិ ត្រពាំងគ្រៀលកម្ពុជា-ឡាវ ឆ្ពោះមកកាន់ខេត្តស្ទឹងត្រែង។
លោកនាយការិយាល័យកោសលវិច្ច័យបច្ចេកទេសនិងវិទ្យាសាស្ត្រខេត្តលោកវរសេនីយ៍ទោអ៊ុក មឿន បានអោយដឹងថាជនរងគ្រោះដែលស្លាប់នោះ មានឈ្មោះហ្វ្រីហ្គូជីអូវ៉ាននី(Frigogiovani)ភេទប្រុស អាយុ៦៥ឆ្នាំជាជនជាតិអីតាលី។
លោកនាយការិយាល័យបានបន្តអោយដឹងទៀតថាជនរងគ្រោះដែលបានស្លាប់នោះ បានធ្វើដំណើរទេសចរ ចេញពីប្រទេសឡាវចូលមកប្រទេសកម្ពុជា ឆ្លងកាត់ច្រកអន្តរជាតិត្រពាំងគ្រៀលកម្ពុជា-ឡាវ ខណៈធ្វើដំណើរមកដល់ខេត្តស្ទឹងត្រែង មានអការៈមិនស្រួលបានជនបរទេស២នាក់ផ្សេងទៀត បញ្ជូនទៅកាន់មន្ទីរពេទ្យខេត្ត តែដោយសារស្ថានភាពធ្ងន់ធ្ងរពេក ក្រុមគ្រូពេទ្យមិនអាចជួយសង្គ្រោះបាន ។
លោកនាយការិយាល័យបន្តថាសពជនរងគ្រោះនៅព្រឹកថ្ងៃទី៦មិនានេះ នគរបាលកោសលវិច្ច័យបច្ចេសកទេសនិងវិទ្យាសាស្ត្រ បានសហការជាមួយក្រុមគ្រូពេទ្យ និងមានការចូលរួមពីលោកស្រីស៊ុន យ៉ឺតព្រះរាជអាជ្ញារង បានចុះទៅពិនិត្យលើសាកសពឃើញថា ក្បាល ដងខ្លួន នៅល្អទាំងអស់ដោយសាកសពបានស្លាប់តាំងពីល្ងាច សេរីរាង្គនៃសពឈប់ធ្វើចលនា ខ្នងក្រហមគឺឈាមធ្លាក់ពីលើមកក្រោម លិង្គមានទឹកកាមសើមតិចៗ ត្រូវបានសមត្ថកិច្ចសន្និដ្ឋានថា ជនរងគ្រោះស្លាប់ដោយសារគាំងបេះដូង។
សាកសពត្រូវបានគ្រូពេទ្យចាក់ថ្នាំ ការពារកុំអោយធំក្លិន និងធ្វើកំណត់ហេតុរងចាំស្ថានទូតអគ្គកុងស៊ុលអីតាលី ប្រចាំព្រះរាជាណាចក្រម្ពុជា មកទទួលដើម្បីយកទៅប្រទេសរបស់គេវិញ៕
