ខេត្តសៀមរាប រសៀលថ្ងៃសៅរ៍ចុងសប្តាហ៍កន្លងមកនេះ (ថ្ងៃទី០៦ ខែមិនា ឆ្នាំ២០១៦) មានសេចក្តីរាយការណ៍មួយ ក្នុងចំណោមសេចក្តីរាយការណ៍ជាច្រើនទៀត ចេញពីអង្គសិក្ខាសាលាបូកសារុបការងារយោធាឆ្នាំ២០១៥ របស់កងពលធំអន្តរាគមន៍លេខ៣ ។ សេចក្តីរាយការណ៍ដែលមានអត្ថន័យជារួមនោះ បានបង្ហាញថា ៖ ក្នុងឆ្នាំ២០១៥កន្លងមកនេះ សភាពការណ៍យោធា សន្តិសុខ នៅតាមបណ្តាខ្សែបន្ទាត់ព្រំដែនកម្ពុជា-ថៃសមរភូមិមុខទិសទី១ ដែនភូមិសាស្ត្រយោធភូមិភាគទី៤ មានស្ថានភាពធូរស្រាលច្រើន ជាពិសេសនៅលើចំណុចនៃតំបន់ប្រាសាទព្រះវិហារ ។
សេចក្តីរាយការណ៍នេះ គឺត្រូវបានធ្វើឡើងដោយឧត្តមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍លេខ៣ ជាមួយនឹងវត្តមានរបស់នាយឧត្តមសេនីយ៍ គន់ គីម អគ្គមេបញ្ជាការរង នាយសេនាធិការចម្រុះនៃកងយោពលខេមរភូមិន្ទ និងជាអនុប្រធានទី១ គណបញ្ជាការសមរភូមិព្រំដែនកម្ពុជា-ថៃនិងមានវត្តមានផងដែរ នាយឧត្តមសេនីយ៍ ខេង សុមេធ អគ្គស្នងការរងនគរបាលជាតិ និងជាមេបញ្ជាការនគរបាលជាតិប្រចាំទិសទី៤ និងទី៥ ។
អង្គសិក្ខាសាលានេះ ត្រូវបានដំណើរការ នៅកងពលតូចអន្តរាគមន៍លេខ៩ ។ ឧត្តមសេនីយ៍ឯកមេបញ្ជាការយោធារូបនោះ បានបញ្ជាក់បន្ថែមថា កងទ័ពកម្ពុជា ពិតជាមានសុទិដ្ឋិនិយមក្នុងភារកិច្ចការពារបូរណភាពដែនដីនៃមាតុភូមិ បើទោះជាមានករណីមិនប្រក្រតីខ្លះៗកើតមានឡើងកន្លងមកកដោយ ក៏ប៉ុន្តែគ្រប់បញ្ហាទាំងនោះត្រូវបានធ្វើដំណោះស្រាយជាមួយភាគីទាហានប្រទេសជិតខាង ក្នុងនាមជាប្រទេសភូមិផងរបងជាមួយគ្នា ដោយភាពយោគយល់អត់ធ្មត់ សន្តិវិធី ។ ឧត្តមសេនីយ៍រូបនោះក៏បានបញ្ចាក់នៅក្នុងសេចក្តីរាយការណ៍នោះផងដែរថា ឆ្នាំ២០១៥កន្លងទៅ នៅតាមបណ្តាខ្សែបន្ទាត់ព្រំដែនកម្ពុជា-ថៃទិសទី១ សកម្មភាពមិនប្រក្រតី និងការទំនាក់ទំនងផ្សេងៗ ដែលត្រូវបានដោះស្រាយមានចំនួន ៤៩៨ លើក ។
នាយឧត្តមសេនីយ៍ ខេង សុមេធបានបង្ហាញនូវឧត្តមភាពរបស់កងកម្លាំងនគរបាលជាតិការពារព្រំដែនគោក ដែលទទួលបាននូវលទ្ធផលល្អប្រសើរជូនជាតិមាតុភូមិ ក្រោមការផ្តល់នូវកិច្ចសហការយ៉ាងរឹងមាំដោយកងយោធពលខេមរភូមិន្ទ ។ ជាមួយឱកាសនោះ ឯកឧត្តមបានបង្ហាញនូវចំណាប់អារម្មណ៍ លើការងារពង្រឹងបន្ថែមសន្តិសុខ សុវត្តិភាព ជូនប្រជាពលរដ្ឋ ដែលកំពុងរស់នៅក្នុងតំបន់ព្រំដែន ។ ឯកឧត្តមបានបញ្ជាក់បន្ថែមថា ជាការពិត ក្រោមទស្សនវិស័យរបស់រាជរដ្ឋាភិបាលកម្ពុជា ក្នុងគោលដៅកសាងព្រំដែនសន្តិភាព កិច្ចសហប្រតិបត្តិការ និងការអភិវឌ្ឍន៍ ដែលបច្ចុប្បន្ននេះយើងកំពុងធ្វើដំណើរប្រកបដោយមោទនភាពលើទស្សនវិស័យនោះ ត្រូវតែមានការយកចិត្តទុកដាក់ឲ្យបានខ្ពស់បំផុត ភារកិច្ចការពារទប់ស្កាត់រាល់ចំណុចអវិជ្ជមានទាំងឡាយ ដែលបង្ករឲ្យមានផលប៉ះពាល់ដល់សន្តិសុខតំបន់ព្រំដែន និងសន្តិសុខសង្គមជាតិទាំងមូល ដូចជាការធ្វើសកម្មភាពឆ្លងកាត់គ្រឿងញៀន និងការកើតឡើងនូវអំពើរចោរកម្មផងដែរ ។ ឯកឧត្តមសង្កត់ធ្ងន់ថា ការពារប្រសើរជាងព្យាបាល ។
នាយឧត្តមសេនីយ៍ គន់ គីម វាយតម្លៃខ្ពស់ចំពោះការបំពេញភារកិច្ចរបស់កងពលធំអន្តរាគមន៍លេខ៣ និងបណ្តាកងពលតូចចំណុះទាំងអស់ ថាគោរពបានយ៉ាងម៉ឺងម៉ាត់រាល់បទបញ្ជារបស់ប្រមុខនៃរាជរដ្ឋភិបាល និងអគ្គបញ្ជាការនៃកងយោធពលខេមរភូមិន្ទ ។ ឯកឧត្តម បានរំលឹកផងដែរ នូវរាល់បណ្តាជោគជ័យទាំងឡាយដែលសមរភូមិមុខទទួលបាន គឺដោយសារតែមានការយកចិត្តទុកដាក់ខ្ពស់បំផុត ក្នុងការជួយឧបត្ថម្ភគាំពារដ៏ថ្លៃថ្លានៃសម្តេចតេជោ ហ៊ុន សែន និង សម្តេចកិត្តិព្រឹទ្ធបណ្ឌិត ប៊ុនរ៉ានី-ហ៊ុនសែន ដែលនាយទាហានចាត់ទុកថា ជាមាតាបិតា ប្រកបដោយព្រហ្មវិហារធម៌នៃកងទ័ព កងនគរបាលជាតិ ដែលជាមួយគ្នានោះ ស្ថាប័នសម្ព័ន្ធមេត្រីភាព ក៏ជាប្រភពនៃចំណែកជួយកសាងអង្គភាពប្រដាប់អាវុធជួរមុខផងដែរ ។
តាមរយៈនាយឧត្តមសេនីយ គន់ គីម អានុសាសន៍ដ៏ខ្ពង់ខ្ពស់នៃប្រមុខរាជរដ្ឋាភិបាលកម្ពុជា បានជម្រុញឲ្យមេបញ្ជាការអង្គភាពជួរមុខទាំងអស់ បន្តអនុវត្តផែនការប្រឡងប្រណាំងកសាងអង្គភាពក្នុងសន្ទុះអភិវឌ្ឍន៍បន្ថែមទៀត ជាពិសេសនោះគឺការបំពេញភារកិច្ចការពារបូរណភាពដែនដី ការហ្វឹកហាត់ដើម្បីសុខភាពនិងសមត្ថភាពប្រយុទ្ធ ការគ្រប់គ្រងចិញ្ចឹមទ័ព ហើយកាន់តែត្រូវបានយកចិត្តទុកដាក់មិនអាចមើលរំលងបាននោះ គឺការផ្តល់លទ្ធភាពដោយច្នៃប្រឌិត បង្កើនជីវភាពរស់នៅជូនគ្រួសារកងទ័ពឲ្យកាន់តែប្រសើរឡើង តាមរយៈនៃការដោះស្រាយលំនៅដ្ឋាន និងដីធ្លីបង្ករបង្កើនផល រក្សាសុខសុវត្ថិភាព ជម្រុញសកម្មភាពនៃការកសាងតំបន់ព្រំដែន ក្នុងសន្តិភាពនិងដំណើរឆ្ពោះទៅរកការអភិវឌ្ឍន៍ ៕
ដោយគឿនវេត
