ខេត្តសៀមរាប នៅថ្ងៃទី៧ខែមិនាឆ្នាំ២០១៦ លោក ជាចន្ទ័បរិបូណ៌រដ្ឋលេខាធិការក្រសួងព័ត៌មាននិងជាប្រធានក្រុមការងារថ្នាក់ជាតិចុះជួយស្រុកក្រឡាញ់ខេត្តសៀមរាបបានដឹកនាំមន្ត្រីក្រុមការងារនៃអង្គភាពមន្ទីរពាក់ពន្ឋ័ក្នុងខេត្តរួមជាមួយអាជ្ញាធរមូលដ្ឋានស្រុកនិងបានការអញ្ជើញចូលរួមរបស់ប្រជាពលរដ្ឋក្នុងមូលដ្ឋានមកពិភូមិទាំង៨ក្នុងឃុំសំបួរសរុបជាង៣០០នាក់។នេះជាលើកទី១សម្រាប់ឆ្នាំ២០១៦ដែលវេទិកានេះធ្វើឡើងដើម្បីស្តាប់មតិយោបល់សំណូមពរនិងដោះស្រាយបញ្ហាការលំបាកក៍ដូចជាក្តីកង្វល់ផ្សេងៗដែលប្រជាពលរដ្ឋលើកឡើងចំពោះផលប៉ះពាល់ដល់ការរស់នៅប្រចាំថ្ងៃរបស់ពួកគាត់និងជាពិសេសដើម្បីត្រួតពិនិត្យលើការអនុវត្តន៍កម្មវិធីគោលនយោបាយនិងយុទ្ឋសាស្ត្រចតុកោណដំណាក់កាលទី៣របស់រាជរដ្ឋាភិបាលសម្រាប់គោលដៅស្រុកនេះថាតើការអនុវត្តកន្លងមកសម្រេចបានអ្វីខ្លះនិងនៅខ្វះខាតចំណុចអ្វីខ្លះត្រូវកែសម្រួលដែលត្រូវរួមគ្នាបំពេញបន្ថែម។
លោក ជាចន្ទ័បរិបូរណ៌បានផ្តល់ឱកាសឱ្យប្រជាពលរដ្ឋលើកពីបញ្ហាកង្វល់កត្តាប្រឈមនិងលើកជាសំណួរសួរចំៗទៅកាន់ប្រជាពលរដ្ឋអំពីសកម្មភាពការងារ របស់អាជ្ញាធរមូលដ្ឋានក្នុងការបំពេញតួនាទីការងារពាក់ពន្ឋ័ទៅនឹងសេវាសាធារណៈរបស់ឃុំនោះនិងសំណូមពរផ្សេងៗ។ពុំមានប្រជាពលរដ្ឋណាលើកជាសំណួរបង្ហាញពីបញ្ហាឬក្តីកង្វល់អ្វីឡើយ ផ្ទុយទៅវិញបានកោតសរសើរលោកមេឃុំសំបួរថាបានបំពេញការងារសេវាសាធារណៈជូនពួកគាត់បានដោយរលូននិងប្រកបដោយតម្លាភាព។ថ្វីត្បិតតែគ្មានសំណួរតែពួកគាត់បានលើកជាសំណូមពរមួយចំនួនដូចជាសំណូមពរសុំផ្លូវលំមួយខ្សែប្រវែង១៥០ម៉ែត្រនៅក្រោយសាលារៀនអំពិល សុំកសាងផ្លូវប្រថែង៣៥០០ម.នៅភូមិឱម៉ាល់សុំកែសម្រួលការធ្វើស្ពានក្នុង ភូមិដំណាក់ខ្ចាស់ដោយពួកគាត់ខ្លាចទូកចូលមិនរួចព្រោះអ្នកភូមិស្ទើរតែ១០០%ប្រើប្រាស់ទូកនៅរដូវវស្សានិងតំណាង
គណៈកម្មការវត្តព្រះពុទ្ឋអណ្តែតរង្សីហៅវត្តដំណាក់ខ្ចាស់បានសុំជួយកសាងបង្ហើយសាបាលីនិងគរុភណ្ឌមួយចំនួនក្នុងវត្ត។ពាក់ពន្ឋ័បញ្ហានេះ លោកមេឃុំបានអះអាងថា៖ស្ពានក្នុងភូមិដំណាក់ខ្ចាស់ជាគម្រោងរបស់មូលនិធិឃុំឆ្នាំ២០១៥មានកំពស់២.៥០ម.ទទឹង៤ម.ដោយឃុំបានជ្រើសរើសយកគម្រោងក្រោមការសិក្សានិងឯកភាពទៅតាមលក្ខណៈបច្ចេកទេសពុំមានសសរកណ្តាលទេ ដែលទូចតូចៗអាចធ្វើចរាចរណ៍ទៅមកបាន។ ក្រោយពីស្តាប់ការពន្យល់បកស្រាយរួចមកប្រជាពលរដ្ឋបានយល់ព្រមនិងឯកភាពពុំមានភាពថ្នាំងថ្នាក់អ្វីឡើយ។ដោយពិតទៅគម្រោងធ្វើស្ពានទោះតូចធំក្តីគេត្រូវការពេលវេលាសិក្សាដើម្បីកំណត់និងបញ្ចៀសបានពីផលប៉ះពាល់និងបញ្ហាប្រឈមជាយថាហេតុ។ការសុំចាក់គ្រួសក្រហមលើផ្លូវដែលមានស្រាប់ប្រវែង៣៥០០ម.មេឃុំថា៖ផ្លូវនោះជាគម្រោងមូលនិធិឃុំកាលពីឆ្នាំ២០១៣.២០១៤ជាផ្លូវដីស បានបញ្ចប់ហើយ ការដែលចង់បានពីដីសទៅដីក្រហមមិនទាន់បានទេដោយសារមូលនិធីរបស់ឃុំមានកំណត់។ប៉ន្តែអាជ្ញាធរឃុំនិងកត់ទុកក្នុងបញ្ជីផែនការសម្រាប់លើកគម្រោងស្នើសុំនៅឆ្នាំក្រោយទៀត។មានប្រសាសន៍បូកសរុបលទ្ឋផលវេទិកាសាធារណៈនាឱកាសនោះ លោក ជា ចន្ទ័បរិបូរណ៌បានជម្រុញដល់មន្ត្រីពាក់ពន្ឋ័បន្តសហការនិងខិតខំប្រឹងប្រែងបំពេញភារកិច្ចឆ្លើយតបទៅតាមការលើកឡើងរបស់ប្រជាពលរដ្ឋតាមរយៈការជួយសហការគ្នាទៅវិញទៅមករវាងមន្ត្រីជំនាញពាក់ពន្ឋ័ជាមួយអាជ្ញាធរមូលដ្ឋាននិងប្រជាពលរដ្ឋជាពិសេសមេភូមិគ្រប់ភូមិត្រូវស្រង់និងក្តាប់ឱ្យបានអ្វីជាសំណូមពរនិងសេចក្តីត្រូវការចាំបាច់របស់ប្រជាពលរដ្ឋក្នុងមូលដ្ឋានខ្លួនដើម្បីបញ្ជូនទៅឃុំៗចុះក្នុងបញ្ជីក្នុងគម្រោងនៅឆ្នាំជាបន្តបន្ទាប់ហើយអាជ្ញាធរឃុំក៍ត្រូវបង្ហាញឱ្យច្បាស់ពីគម្រោងដែលអាជ្ញាធរឃុំគ្រោងនឹងអនុវត្តជាបន្តក្នុងកញ្ចប់ថវិកាមូនិធិប្រចាំឆ្នាំរបស់ឃុំជូនប្រជាពលរដ្ឋដើម្បីពួកគាត់ បានយល់និងបានដឹង។ ។ លោក មានប្រសាសន៍ថា៖វេទិកានេះជាយន្តការថ្មីមួយរបស់រាជរដ្ឋាភិបាលអាណត្តិទី៥ដែលទាមទារឱ្យយើងធ្វើការរួមគ្នាដោយមិនប្រកាន់និន្នការនយោបាយពណ៌សម្បុរអ្វីឡើយ។ឯកឧត្តមបានសំណូមពរដល់ប្រជាពលរដ្ឋនៅទីនេះនៅពេលទទួលបានសមិទ្ឋផលហើយសូមមេត្តាជួយថែទាំទុកដូចជាទ្រព្យសម្បត្តិផ្ទាល់ខ្លួនថ្វីត្បិតសមិទ្ឋផលហេដ្ឋារចនាសម្ពន្ឋ័ក្នុងមូលដ្ឋានជាសម្បត្តិសាធារណៈតែក៍ជាទ្រព្យសម្បត្តិរបស់យើងទាំអស់គ្នាដែរ។ចំណុចដែលសេសសល់ក្រុមការងារនឹងយកទៅសិក្សានិងរៀបចំនិងពិនិត្យមើលឡើងវិញតាមហេតុផលដែលអាចដោះស្រាយបាន៕ដោយគឿនវេត
