ខេត្តសៀមរាប ៖ លោកស្រីAnn Lemaistreប្រធានអង្គការយូណេស្កូប្រចាំនៅកម្ពុជា មានប្រសាសន៍ថា ៖ សិក្ខាកាមវគ្គបណ្តុះបណ្តាលស្តីពីការរៀបចំផែនការអភិរក្សបេតិកភ័ណ្ឌវប្បធម៌អរូបីរយៈ នឹងត្រូវបានទៅធ្វើទស្សនកិច្ចនៅមជ្ឈមណ្ឌលផលិតសូត្រពណ៌មាស និង ផលិតកម្មផលិតស្ករត្នោត ដើម្បីធ្វើការសិក្សាប្រៀបធៀបអំពីបរិបទទាំង២នេះ ថាតើ ? នឹងមានអ្វីខ្លះ ដែលមានទំនាក់ទំនងនៅក្នុងលក្ខណៈវិនិច្ឆ័យជាបេតិកភ័ណ្ឌអរូបី ដើម្បីទុកជាលំហាត់គន្លឺះ ។
លោកស្រី Ann Lemaistreប្រធានអង្គការយូណេស្កូប្រចាំនៅកម្ពុជា បានដាក់បញ្ចូលកម្មវិធីទស្សនកិច្ចនេះ នៅក្នុងវគ្គបណ្តុះបណ្តាលស្តីពីការរៀបចំផែនការអភិរក្សបេតិកភ័ណ្ឌអរូបី ដែលរៀបចំឡើងដោយក្រសួងវប្បធម៌និងវិចិត្រសិល្បៈ ក្រោមកិច្ចសហការជាមួយអង្គការយូណេស្កូ ក្រោមគម្រោងឧបត្ថម្ភរបស់មជ្ឈមណ្ឌល CRIHAP នៃប្រទេសចិន ។ វគ្គបណ្តុះបណ្តាលនេះ ប្រព្រឹត្តិទៅនៅខេត្តសៀមរាប រយៈពេល៥ថ្ងៃ ចាប់ពីថ្ងៃទី០៨ ដល់ថ្ងៃទី១២ ខែមិនា ឆ្នាំ២០១៦ ។
លោកស្រី បានបង្ហាញឲ្យឃើញថា ៖ ព្រះរាជាណាចក្រកម្ពុជា កំពុងស្ថិតក្នុងជំហាននៃភាពរីកដុះដាលក្នុងវិស័យទេសចរណ៍ ហើយក្រសួងទេចរណ៍បានខិតខំប្រឹងប្រែងយ៉ាងខ្លាំង ដើម្បីពង្រីកគុណភាពនៃវិស័យមួយនេះ ដូច្នេះភ្ញៀវទេសចរ គេនឹងចូលចិត្តទៅទស្សនាសហគមន៍ណាមួយដែលមានបេតិកភ័ណ្ឌអរូបីនៅទីនោះ ហើយប្រជាពលរដ្ឋដែលរស់នៅក្នុងសហគមន៍មួយនោះផងដែរ នឹងទទួលបានប្រាក់ចំណូលគ្រួសារពីវិស័យ ទេសចរណ៍ដោយផ្ទាល់ ដោយសារតែសហគមន៍របស់គាត់ បានរក្សា-អភិរក្សបានគង់វង្ស នូវសម្បត្តិបេតិកភ័ណ្ឌអរូបីទាំងនោះ ។
លោកស្រីAnn Lemaistreក៏បានរំលឹកថា ៖ ក្រសួងវប្បធម៌និងវិចិត្រសិល្បៈ បានខិតខំប្រឹងប្រែងដាក់បញ្ជូលប្រដោយជោគជ័យ របាំព្រះរាជទ្រព្យ ល្ខោនស្រមោលស្បែកធំ និងប្រភេទកីឡាប្រជាប្រិយ៍ទាញព្រ័ត្រ ជាសម្បត្តិបេតិក័ណ្ឌអរូបីនៃមនុស្សជាតិ។ លោកស្រី ប្រធានអង្គការយូណេស្កូប្រចាំនៅកម្ពុជា បានបន្ថែមថា ព្រឹត្តិការណ៍អង្គរសង្ក្រាន្ត ក៏មានលក្ខណៈពិសេស ជាមួយនឹងការថែរក្សាសម្បត្តិវប្បធម៌អរូបីរបស់កម្ពុជាផងដែរ ។ ជាមួយការបើដំណើរការវគ្គបណ្តុះបណ្តាលនោះ លោកស្រី បានបញ្ជាក់ឲ្យដឹងថា ៖ ការបើកវគ្គបណ្តុះបណ្តាលនេះគឺយោងតាមអនុសញ្ញាឆ្នាំ២០០៣ ស្តីពីការអភិ
រក្សបេតិកភ័ណ្ឌអរូបីនៅក្នុងប្រទេសកម្ពុជា ។
លោក សំរាំង កំសាន្ត រដ្ឋលេខាធិការក្រសួងវប្បធម៌និងវិចិត្រសិល្បៈ ថ្លែងថា ៖ វគ្គបណ្តុះបណ្តាលនេះ គឺជាប្រធានបទថ្មី និងជាការផ្តល់នូវចំណេះដឹងដ៏មានសារសំខាន់ ក្នុងការរៀបចំផែនការមួយ ឲ្យសមស្របតាមតម្រូវការ និងបរិបទជាក់ស្តែងរបស់កម្ពុជា សំដៅធានាប្រសិទ្ធភាពនៃការការពារ និង អភិរក្សបេតិកភ័ណ្ឌអរូបី ប្រកបដោយចីរភាព ៕
ដោយគឿនវេត
