ខេត្តមណ្ឌលគិរី៖ ដើម្បីដាក់ពាក្យបណ្តឹងទៅតុលាការ លើជនដែលមានការពាក់ព័ន្ឋនឹងករណីឈើខុសច្បាប់ក្នុងខេត្តមណ្ឌលគិរី។នាយឧត្តមសេនីយ៏បានថ្លែងបែបនេះ នៅពេលលោកដឹកនាំគណៈកម្មាធិការថ្នាក់ជាតិដើម្បីទប់ស្តាត់ នឹងបង្ក្រាបបទល្មើសព្រៃឈើ ក្នុងខេត្តមណ្ឌលគិរីរយៈពេលពីរថ្ងៃ ចាប់ពីថ្ងៃទី៨ ដល់ថ្ងៃទី៩ មិនា ២០១៦។
ក្រុមហ៊ុនចំនួន៥ដែលមានផ្ទុកឈើខុសច្បាប់នឹងកំពុងប្រឈមជាមួយផ្លូវច្បាប់ ខណៈគណៈកម្មធិការថ្នាក់ជាតិក៏កំពុងរៀបចំឯកសារដើម្បីធ្វើពាក្យបណ្តឹងទៅតុលារួមមាន ក្រុមហ៊ុន ប៊ិញភ្វឿក១ ក្រុមហ៊ុនកសិកម្មខ្មែរអង្គរ ក្រុមហ៊ុនដាយថាន់ ក្រុមហ៊ុនម៉ាស្ទើខេសាន់ ក្រុមហ៊ុនយូនីហ្គ្រីន ។ប្រតិបត្តិការរចុះត្រួតពិនិត្យឈើតាមបណ្តាលក្រុមហ៊ុនដីសម្បទានរយៈពេលពីរថ្ងៃ ក្នុងខេត្តមណ្ឌលគិរី ប្រធានគណៈកម្មធិការថ្នាក់ជាតិ បានសង្កត់ធ្ងន់ចំពោះក្រុមហ៊ុនកសិកម្មខ្មែរអង្គរ ក្រុមហ៊ុនដាយថាន់ នឹងក្រុមហ៊ុនប៊ិញភ្វឿក១ ដែលមានឈើខុសច្បាប់ច្រើនជាងគេ សរុបប្រមាណជិត៣ម៉ឺនម៉ែត្រគូប។
លោក អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេសបានឲ្យដឹងថា«ទោះជាយ៉ាងណា គេនៅមិនទាន់ដឹងថាមាន បុគ្គលណា ខ្លះ នឹងត្រូវជាប់ពាក់ព័ន្ឋក្នុងបទល្មើសនេះនះទេ…គណៈកម្មធិការកំពុងធ្វើការ លើរឿងនេះហើយ ដូច្នេះលទ្ឋផលរង់ចាំពេលក្រោយ ទើបដឹងច្បាស់»។
នាយឧត្តមសេនីយ៏សៅ សុខា បានថ្លែងនៅពេលចុះទៅដល់ក្រុមហ៊ុនខ្មែរអង្គរថា «សូមមន្ត្រីជំនាញត្រូវញែកឈើដែលល្មើស នឹងឈើដែលត្រឹមត្រូវ ព្រោះទីតាំងនេះគឺជាទីតាំងដីសម្បទានសេដ្ឋកិច្ច តែត្រូវរដ្ឋាភិបាលសម្រចដកយកដីពីក្រុមហ៊ុនវិនិយោគវិញ កាលពីជាង១ឆ្នាំមុនតែរដ្ឋាភិបាលបានអនុញ្ញាតឲ្យមានក្រុមហ៊ុនផ្សេងប្រមូលឈើសេសសល់លើដីដដែលហ្នឹង…កាលហ្នុងមានចំនួនប្រមាណជាង ៧០០ម៉ែត្រគូប តែឈើឥឡូវចូលដល់ជាងម៉ឺនម៉ែត្រគូប…ចឹងរកឲ្យឃើញអាឈើចំនួន៧០០ម៉ែត្រគូបដែលឲ្យប្រមូល ចំណែកអានៅសល់ នោះហើយគឺជាឈើខុសទាំងអស់ ព្រោះកន្លែងនេះជាកន្លែងខុសធំជាងគេ»។នាយឧត្តមសេនីយ៏បានបន្តថា«មិនពិបាកទេត្រូវរកមុខក្រុមហ៊ុនណា ជាអ្នកប្រមូលឈើចឹងត្រូវរកមុខឲ្យឃើញ នេះគឺជាមុខសញ្ញានៃពាក្យបណ្តឹង…ហើយវត្ថុតាងនៅទីនេះ គឺជាវត្ថុតាងនៃបទល្មើស»។
របាយការណ៍នៃចំនួនឈើខុសច្បាប់នៅក្នុងខេត្តមណ្ឌលគិរី មិនទាន់ត្រូវបានគណៈកម្មាធិការថ្នាក់ជាតិទម្លាយឲ្យដឹងនៅឡើយទេ ប៉ុន្តែបើយោងតាមរបាយការណ៍បណ្តោះអាសន្នរបស់មន្ត្រីខណ្ឌរដ្ឋបាលព្រៃឈើ បានបញ្ជាក់ថា ក្រុមហ៊ុនឈ្មោះប៊ិញ ហ្វឿក១ មានឈើខុសច្បាប់ចំនួន ៤ ៣៨៤,៧១៤ម៉ែត្រគូប ,ឈើក្នុងក្រុមហ៊ុនកសិកម្មខ្មែរអង្គរជាង១ម៉ឺនម៉ែត្រគូប និងឈើដែល មានច្បាប់៧រយម៉ែត្រគូប ប៉ុន្តែត្រូវបានដឹកចេញអស់ពាក់កណ្តាលហើយសំរាប់ឈើមានច្បាប់នោះ ,ក្រុមហ៊ុនដាយថាន់ ឈើខុស ច្បាប់ជាង១ម៉ឺន ម៉ែត្រគូប,ក្រុមហ៊ុន យូនីគ្រីនជាង១ពាន់ម៉ែត្រគីប និងក្រុមហ៊ុនម៉ាស្ទើរខេសាន់ ជិត១ម៉ឺនម៉ែត្រគីប ។
ចំណែកការងារបន្ទាប់គឺឯកឧត្តមនាយឧត្តមសេនីយ៏បានប្រគល់ទៅជំនាញបរិស្ថានខេត្តនិងខណ្ឌរដ្ឋបាលព្រៃឈើមណ្ឌលគិរី ជា អ្នកចាត់ការ នឹងស្រាវជ្រាវវែកមុខរកជនល្មើស ក្រោមការសម្របសម្រួលពីលោកព្រះរាជអាជ្ញារអមសាលាដំបូងខេត្ត។ កន្លងមកគេ នៅចាំថា លោក សំរ៉ង់ ឌីវីចិត្រ នាយយក ដែនជម្រកសត្វព្រៃភ្នំព្រេច តែងតែ ពោលអះអាងប្រាប់អ្នកព័ត៍មានថា ឈើក្នុងក្រុមហ៊ុន
កសិកម្មខ្មែរអង្គរ និង ក្រុមហ៊ុនដាយថាន់ សុទ្ធតែមានច្បាប់ត្រឹមត្រូវ និងចោត ប្រកាន់ថា អ្នកកាសែតផ្សាយព័ត៍មានមិនពិត ប៉ុន្តែនៅពេលនេះ រឿងរ៉ាវអាថ៍កំបាំង ដែលលោក សំរ៉ង ឌីវិចិត្រ ព្យាយាមលាក់បាំង អស់ជាច្រើនឆ្នាំនោះ ត្រូវបាននាយឧត្តមសេនីយ៍ សៅ សុខា រកឃើញថា ឈើរាប់ពាន់ម៉ឺនម៉ែត្រគូប ដែលស្ថិតក្នុងដែនជម្រកសត្វ ព្រៃភ្នំព្រេច គឺសុទ្ធតែជាឈើគ្មានច្បាប់ទាំងអស់ ដែលផ្ទុយស្រឡះពីការអះអាងរបស់លោក សំរ៉ង់ ឌីវិចិត្រ កន្លងមកនោះ។ 
ដើមចមនៃការកាប់រង្គាលនិងធ្វើជំនួញឈើខុសច្បាប់នៅក្នុងខេត្តមណ្ឌលគិរី ត្រូវបានគេលើកឡើងថា ដោយសារតែមានការឃុបឃិត គ្នាជាលក្ខណះប្រព័ន្ធ ចាប់តាំងពីថ្នាក់ខេត្តរហូតដល់ថ្នាក់ភូមិ។សហគមន៍ព្រៃឈើបានឲ្យដឹងថា ពួកគេស្ទើរតែបាត់បង់របររកទទូល ទានដែលបានមកពីធម្មជាតិនោះទៅហើយ ដោយសារតែក្រុមឈ្មួញចូលកាប់យកសូម្បីតែដើមជ័រច្បោះ ដើមជ័រទឹក មិនលើក លែងផងនោះ។សូមរំលឹកថា កាលពីជាង២ឆ្នាំកន្លងទៅ ផ្លូវនានារួមទាំងផ្លូវជាតិលេខ៧៦ ត្រូវបានរថយន្តកែឆ្នៃ រថយន្តយីឌុប ផ្ទុកឈើលើសទម្ងន់ ប្រើប្រាស់បណ្តាលអោយរងការខូចខាតយ៉ាងដំណំ និងមិនត្រូវបាននណាទទូលខុសត្រូវឡើយ។
