ខេត្តសៀមរាប៖ គោលដៅជាយុទ្ធសាស្ត្រ ក្រោមចក្ខុវិស័យដ៏វែងឆ្ងាយរបស់រាជរដ្ឋាភិបាល គឺការកសាងព្រំដែនសន្តិភាព កិច្ចសហប្រតិបត្តិការ និងការអភិវឌ្ឍន៍ កំពុងបង្ហាញនូវផ្លែផ្កានៅលើកំណាត់ផ្លូវនៃគោលដៅជាយុទ្ធសាស្ត្រនោះហើយ ដែលកាលពី៨ឆ្នាំមុន តំបន់ដែលកំពុងមានការអភិវឌ្ឍន៍នេះ គឺជាសមរភូមិប្រយុទ្ធ ។អត្ថន័យខាងលើនេះ គឺបង្ហាញឡើងសំដៅទៅរកកាលពី៨ឆ្នាំមុន ដែលតំបន់ព្រំដែនកម្ពុជា-ថៃ កំពុងស្ថិតនៅជាតំបន់សមរភូមិមុខទិសយោធភូមិភាគទី៤ ។ នាយឧត្តមសេនីយ៍ ខេង សុមេធ អគ្គស្នងការរង និងជាមេបញ្ជាការនគរបាលជាតិប្រចាំភូមិភាគទី៤ និងទី៥ បានរំលឹកឡើងវិញអំពីស្ថានភាពនោះ នារសៀលថ្ងៃទី០៩ ខែមិនា ឆ្នាំ២០១៦ ក្នុងឱកាសនៃការបើកសម្ពោធដាក់ឲ្យប្រើប្រាស់ជាផ្លូវការ អាគារថ្មី របស់អធិការដ្ឋាននគរបាលរបស់ស្រុកជាំក្សាន្ត ខេត្តព្រះវិហារ ។
នាយឧត្តមសេនីយ៍ ខេង សុមេធ បានរំលឹកបន្ថែមថា ៖ ប្រមុខនៃរាជរដ្ឋាភិបាលកម្ពុជា ( សម្តេចតេជោ ហ៊ុន សែន ) បានបង្ហាញនូវមហិច្ឆតានៃការកសាងព្រំដែនមាតុភូមិដោយបេះដូងសន្តិភាព ទៅកាន់បណ្តាអង្គភាពប្រដាប់អាវុធជួរមុខ ឲ្យមានសេចក្តីក្លាហាន តស៊ូ អំណត់ព្យាយាម ដើម្បីប្រែក្លាយសម្លេងផ្ទុះអាវុធ ឲ្យទៅជាស្នូរសម្លេងព្រះធម៌និងចម្រៀង និងប្រែក្លាយតំបន់សមរភូមិ ឲ្យទៅជាទីផ្សារសេដ្ឋកិច្ច បំរើជីវភាពរស់នៅជូនប្រជាពលរដ្ឋព្រំដែន ឲ្យបានប្រសើរឡើងវិញ ។
ឯកឧត្តមមានប្រសាសន៍ថា បច្ចប្បន្ននេះ តំបន់ព្រំដែនទាំងនេះ ទទួលបាននូវការអភិវឌ្ឍន៍គួរកត់សម្គាល់ ដូចអ្វីដែលរាជរដ្ឋភិបាលកម្ពុជា បានព្យាករណ៍ទុកកាលពី៨ឆ្នាំមុន ។ ជាមួយគ្នានោះដែរ ឯកឧត្តមមានការចាប់អារម្មណ៍ចំពោះរបាយការណ៍របស់លោកស្នងការនគរបាលខេត្តព្រះវិហារដែលថា ៖ អាគារថ្មី អធិការដ្ឋាននគរបាលស្រុកជាំក្សាន្ត គឺបានកសាងឡើងក្រោមការរួបរួមសាមគ្គីរវាងថ្នាក់ដឹកនាំជាន់ខ្ពស់នៃអគ្គស្នងការដ្ឋាននគរបាលជាតិ អ្នកតំណាងរាស្ត្រ ហើយដែលជាពិសេសនោះ គឺការចូលរួមពីសំណាក់សប្បុរសជនក្នុងស្រុក ។
ជាមួយនឹងសេចក្តីថ្លែងអំណរគុណជូនចំពោះប្រជាពលរដ្ឋដែលជាសប្បុរសជននោះ ឯកឧត្តមបានវាយតម្លៃថា នោះគឺពិតជាការចូលរួមប្រកបដោយឋាមពល ដើម្បីកិច្ចដំណើការរបស់សមត្ថកិច្ចឆ្លើយតប បំរើប្រជាពលរដ្ឋក្នុងតំបន់រដ្ឋបាលមួយនេះកាន់តែប្រសើរឡើង ។ 
ឯកឧត្តមបានបន្តថា វាគឺជាកត្តាកត់សម្គាល់មួយ ដែលអាចនឹងឈានឆ្ពោះទៅរកការកសាងមូលដ្ឋានដែលមានសន្តិសុខរឹងមាំ ហើយក៏អាចនិយាយបានថា សក្ខីកម្មនេះ គឺជាដំណើរឈានទៅរកការឯកភាពគ្នារវាងសមត្ថកិច្ចជាមួយប្រជាពលរដ្ឋ រួមគ្នាអនុវត្តគោលនយោបាយភូមិឃុំមានសុវត្ថិភាព ៕
