ប្រទេសកម្ពុជាមានការអភិវឌ្ឍរីកចំរើនលើគ្រប់វិស័យដូចពេលបច្ចុប្បន្ន ប្រជាជនមានជីវភាពធូរធារនិងសំបូរសប្បាយ គឺដោយសារតែការដឹកនាំរបស់គណបក្សប្រជាជនកម្ពុជា ដូច្នេះសមាជិកសមាជិកាបក្សត្រូវចេះរួបរួមសាមគ្គីគ្នា កុំជឿតាមការញុះញ៉ុងអកុសល ដែលនាំឱ្យប្រទេសជាតិធ្លាក់ចូលក្នុងគញរោះមហន្តតាយដូចក្នុងរបរប្រល័យពូជសាសន៍ប៉ុលពត ។ នេះជាប្រសាសន៍លើកឡើងរបស់ ឯឧ ប៉ុល ពិធេយ្យ ប្រធានក្រុមការងារថ្នាក់ជាតិចុះជួយឃុំពពឺស ក្នុងពិធីផ្សព្វផ្សាយខ្លឹមសារ មហាសន្និបាតគណៈកម្មាធិការកណ្តាល លើកទី៣៩ ដោយមានការអញ្ជើញចូលរួមពីប្រជាពលរដ្ឋជាង៨០០នាក់ ស្ថិតក្នុងឃុំពពឺស ស្រុកស្វាយអន្ទរ ខេត្តព្រៃវែង កាលពីថ្ងៃទី១៣ ខែមីនា ឆ្នាំ២០១៦ ។
បន្ទាប់ពីលោកពា ហោ ប្រធានគណៈកម្មាធិការគណបក្សឃុំពពឺស ធ្វើរបាយការណ៍ស្វាគមន៍ និងលោកភោគ សុផល អនុប្រធានគណៈកម្មាធិការបក្សស្រុកស្វាយអន្ទរ ឡើងអាននូវខ្លឹមសារនៃមហាសន្និបាតរួចមក ឯឧ ប៉ុល ពិធេយ្យ មានប្រសាសន៍សំណេះសំណាលជាមួយប្រជាពលរដ្ឋក្នុងឱកាសនោះ ឯឧក៏បានផ្តាំផ្ញើរនូវការនឹករលឹក ពីសំណាក់ឯឧ នេត សាវឿន ប្រធានក្រុមការងារចុះជួយស្រុកស្វាយអន្ទរ ជាពិសេសសម្តេចក្រឡាហោមសខេង ដែលតែងតែគិតគូរពីសុខទុក្ខ និងការរស់នៅប្រចាំថ្ងៃរបស់បងប្អូនគ្រប់ពេលវេលា ។
ឯឧបន្តថា ប្រទេសកម្ពុជាក្រោមការដឹកនាំ និងនយោបាយឈ្នះៗរបស់គណបក្សប្រជាជនកម្ពុជា គឺបានធ្វើឱ្យហេដ្ឋារចនាសម្ព័ន្ឋនានានៅក្នុងប្រទេស បាននឹងកំពុងតែរីកដុះដានជាបន្តបន្ទាប់គួរជាទីមោទនៈ ប្រជាពលរដ្ឋមានជីវភាពធូរធារ មានចំណេះដឹងកាន់តែច្រើន និងដើរទន្ទឹមគ្នាជាមួយបច្ចេកវិទ្យារីកចំរើនពីមួយថ្ងៃទៅមួយថ្ងៃ ។
ជាមួយគ្នានេះ ឯឧ ប្រធានក្រុមការងារ ក៏បានលើកឡើងអំពីគ្រោះថ្នាក់ចរាចរណ៍បច្ចុប្បន្ន ដែលបានឆក់យកជីវិតយ៉ាងឆាប់រហ័ស និងធ្វើផ្តាំផ្ញើរដល់បងប្អូនប្រជាពលរដ្ឋ ត្រូវចូលរួមគោរពច្បាប់ចរាចរណ៍ទាំងអស់គ្នា ចៀសវាងគ្រោះថ្នាក់កើតឡើងជាយថាហេតុ ដែលនាំឱ្យបាត់បង់ជីវិត និងខាតបង់ថវិការ ៕
