ខេត្តប៉ៃលិន៖ រមណីយដ្ឋានភ្នំដំបង ត្រួវបានភ្លើងព្រៃឆាបឆេះយ៉ាងសន្ធោសន្ធៅ បង្កឲ្យមានការភ្ញាក់ផ្អើលដល់ប្រជាពលរដ្ឋជិតខាង នាំគ្នាជួយពន្លត់ទាន់ពេលវេលា កុំអីឆេះគ្មានសល់ កាលពីវេលាម៉ោង១៦និង៣០នាទីរសៀលថ្ងៃទី១៤ ខែមីនា ឆ្នាំ២០១៦ ស្ថិតក្នុងភូមិភ្នំដំបង សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
ប្រភពព័ត៌មានពីកន្លែងកើតហេតុ បានឲ្យដឹងថា៖ មុនពេលកើតហេតុគេឃើញប្រជាពលរដ្ឋម្នាក់ បានដុតព្រៃក្នុងចំការខ្លួន ដោយមិនបានធ្វើផ្លួវទប់ការឆ្លង ដើម្បីកុំឲ្យឆេះរាលដាលដល់អ្នកដទៃឡើយ ។ មួយសន្ទុះក្រោយមក ស្រាប់តែភ្លើងដែលពលរដ្ឋដុតនោះ បានឆាបឆេះយ៉ាងខ្លាំង ឆេះឆ្លងរាលដាលដលព្រៃជើងភ្នំរបស់រមណីយដ្ឋានភ្នំដំបង ដែលគ្រប់គ្រង់ដោយឈ្មោះជួប វុទ្ធី ឆេះអស់ចំនួន០២កញ្ជុះ ។ ប្រភពព័ត៌មានបន្តថា៖ ក្នុងពេលដែលភ្លើងកំពុងឆាបឆេះនេះដែរ គេឃើញប្រជាការពារភូមិ និងពលរដ្ឋ មកជួយពន្លត់ទាន់ពេលវេលា កុំអីត្រួវភ្លើងឆេះអស់តែម្តង ។
លោក ជួប វុទ្ធី អ្នកគ្រប់គ្រង់រមណីយដ្ឋានធម្មជាតិភ្នំដំបង បានឲ្យដឹងនៅព្រឹកថ្ងៃទី១៥ នេះថា៖ ក្នុងពេលកើតហេតុ គឺគាត់បានឃើញពលរដ្ឋម្នាក់ដុតព្រៃ ក្នុងចំការក្បែររមណីយដ្ឋានរបស់គាត់ ដោយមិនបានប្រាប់ឲ្យគាត់ដឹងជាមុននោះទេ មួយសន្ទុះស្រាប់តែគាត់ឃើញភ្លើងឆេះរាលដាលតាមកំទេចកំទីក្បែរកន្លែងរបស់គាត់ ដោយឆេះស្លឹកឬស្សី ព្រោះព្រំប្រទលដីដាំដើមឬស្សីព័ទ្ធជុំវិញ ពេលនោះកុំតែបានក្រុមប្រជាការពារភូមិ មកជួយពន្លត់កុំអីត្រួវភ្លើងឆេះទាំងអស់ ហើយរមណីយដ្ឋានធម្មជាតិភ្នំដំបង មានកញ្ចុះចំនួន៣៨ កញ្ចុះ ចំណែកការឆេះ គឺអស់ចំនួនពីរកញ្ចុះ ផងដែរ ។ លោកបន្តទៀតថា៖ពេលនេះលោកបានរាយការណ៏ប្រាប់ដល់សមត្ថកិច្ចពាក់ព័ន្ធឲ្យចុះមកត្រួតពិនិត្យហើយ ព្រមទាំងនាំខ្លួនពលរដ្ឋដែលបង្កការដុតនេះ មកសាកសួរ និងអប់រំ ហើយលោកក៏បានផ្តាំផ្ញើរដល់ពលរដ្ឋថា មុននិងធ្វើអ្វីមួយដូចជាក្នុងករណីនេះ សូមប្រាប់អ្នកជិតខាងឲ្យដឹងផង ។
ចំណែកលោក ឡុង វុទ្ធី មេភូមិភ្នំដំបង បានឲ្យដឹងថា៖ ករណីខាងលើពិតជាមានប្រាកដ៏មែន ហើយការឆេះកញ្ចុះនៅរមណីយដ្ឋានធម្មជាតិភ្នំដំបងនេះ មានចំនួនពីរកញ្ចុះ នេះព្រោះតែជនបង្កមិនបានធ្វើមុខភ្លើងទុកមុន ទើបបង្កឲ្យមានភ្លើងឆេះរាលដាលដល់អ្នកដរទៃដូច្នោះ ហើយក៏សូមផ្តាំផ្ញើរដល់ពលរដ្ឋថា ខែនេះ ជារដូវរាំងស្ងួត ដូច្នោះសូមឲ្យពលរដ្ឋមេត្តាប្រុងប្រយ័ត្នឲ្យបានខ្ពស់ ចំពោះការដុតព្រៃនេះ ៕
