កំពង់ស្ពឺ ៖ គោយន្តកន្ត្រៃសំរុកដឹងឈើចេញទាំងយប់ទាំងថ្ងៃ រាប់រយគ្រឿង ក្នុងមួយយប់ៗចេញពីតំបន់ការពារដែន ជំរកសត្វព្រៃភ្នំឱរ៉ាល់ កំពង់ស្ពឺ តាមផ្លូវជាតិ លេខ ៤៤បានយ៉ាងរលួន ដោយឆ្លងកាត់ស្នាក់ការមេព្រៃ និងប៉ូលិសសេដ្ឋកិច្ច ព្រមទាំងស្ថាប័នផ្សេងៗទៀតជាច្រើនកន្លែង ប៉ុន្តែក្រុមបន្ត្រីទាំងអស់នោះ ងងឹតភ្នែកមើលរំលងសំកុកដេកចាំតែម្រមូលលុយដាក់ចូលហោប៉ៅ មិនបានធ្វើការបង្ក្រាបឡើយ ។
សេចក្តីរាយការណ៍បានប្រាប់ថា ក្នុងមួយថ្ងៃមានគោយន្តដឹកដុលមូលធំៗ និងកូនឈើប្រភេទខ្លុង ត្បែងមិនទាន់គ្រប់អាយុ រាប់សិបគ្រឿង និងរថយន្តដឹកផលអនុផលព្រៃឈើចេញដូចគេហែរកឋិន តាមផ្លូវជាតិលេខ ៤៤ ពីស្រុកឱរាល់មកស្រុកថ្ពង ដោយពួកគេបានរត់ការបង់ប្រាក់ជួនអស់លោកជាសមត្ថកិច្ចគ្រប់ស្ថាប័នជំនាញ ។ ប្រភពន្តថា ឈើដែលកំពុងរងការកាប់បំផ្លាញ និងដឹកជញ្ជូនតាមផ្លូវជាតិលេខ ៤៤នោះ ត្រូវបានកាប់ក្នុងតំបន់ការពារដែនជំរកសត្វព្រៃភ្នំឱរ៉ាល់ខេត្តកំពង់ស្ពឺ និងពោធិសាត់ ដោយមានការបើកដៃពីមន្ត្រីអនុរក្សបរិស្ថានឈរជើងក្នុងតំបន់ការពារទាំងនោះ ។
ក្រុមអ្នកដឹកឈើដុលមូលបានលើកឡើងថា ពួកគាត់បានចូលទៅកាត់ឈើទាំងនេះលើភ្នំក្នុងព្រៃជ្រៅ ដល់ទឹកដីខេត្តពោធិសាត់ ដោយត្រូវចំណាយពេលយ៉ាងតិច ១០ទៅ ២០ថ្ងៃ ទើបបានមួយជើងៗ នឹងត្រូវចំណាយដើមទុនបង់ឱ្យសមត្ថកិច្ចតាំងពីក្នុងព្រៃរហូតដល់ផ្លូវមានគ្រប់ស្ថាប័នអង្គភាពរាប់មិនអស់ទេ ។ ប្រភពបន្តថា បន្ទាប់ដល់ផ្លូវជាតិលេខ ៤៤ ត្រូវបង់ជូនសមត្ថកិច្ចតាមផ្លូវគ្រប់ជំនាញទៀត ក្នុងនោះពិសេសជាងគេ ត្រង់ចំណុចផ្លូវបំបែកអូរទេះភ្លូក ក្នុងឃុំអមលាំង ស្រុកថ្ពង មានប៉ុស្តិចំនួន ២កន្លែងជាប់គ្នា ក្នុងនោះមានប៉ុស្តិយកលុយរបស់ប៉ូលិសសេដ្ឋកិច្ចក្រសួងមហាផ្ទៃមានឈ្មោះពួន ប្រចាំការទីនោះដុសស្លែរ និងដាក់ជនស៊ីវិលម្នាក់ដេកជា ប្រចាំទាំង យប់ទាំងថ្ងៃ មិនអាចមានគោយន្តគ្រឿងណាហ៊ានរំលងឡើយ នៅខាងកើតកុងត្រូល លោកប៉ូលីសសេដ្ឋកិច្ចនោះបន្តិច ប៉ុស្តិរបស់មន្ត្រីរដ្ឋបាលព្រៃឈើសង្កាត់ថ្ពង និងសាខាផ្នែកឱរ៉ាល់រាយដូចផ្សិត ដោយជួលផ្ទះអ្នកភូមិ ដេកចាំប្រមូលលុយដាក់ហោប៉ៅដូចគ្នា ប៉ូលិសសេដ្ឋកិច្ចក្រសួងដែរ ។
ប្រជាពលរដ្ឋរស់នៅក្បែរកន្លែងយកលុយគ្រប់កន្លែងរបស់ប៉ូលិសសេដ្ឋកិច្ច និងមេព្រៃស្រុងថ្ពងបានថ្លែងថា កន្លែងយកលុយពីរថយន្តដឹកឈើ គោយន្តដឹកដុលមូល រថយន្តដឹកអុស និងរ៉ឺមកដឹកធ្យូងនោះបានដាក់យូរាប់ឆ្នាំមកហើយ សុខស្រួលមិនដែលមានបញ្ហាអាជ្ញាធររុះរើឬដេញចេញទេ គឺចាំប្រមូលលុយធ្វើមានធ្វើបានដុះស្លែរ រហូតតាំងពីផ្លូវនៅលំបាកវេទនារហូតមានផ្លូវក្រាលកៅយ៉ាងប្រណិតក៏នៅមានក្រុនេៈនៅឈជើងដដែល។អ្នកស្រុកបន្តថា មានពេលខ្លះផឹកស៊ីស្រវឹងឈ្លោះគ្នាជាមួយ អ្នកគោយន្តក៍មានព្រោះតែបង់ប្រាក់មិនគ្រប់តាមកំណត់ ឬសុំចុះតំលៃខ្លះដោយខ្វះ ខាតលុយ ប៉ុន្តែពួកគេមិនព្រមទេព្រោះខ្លាចខាត់ដូចដាក់ដើមរកស៊ីអញ្ចឹង ។
លោកគាវ លាងគា អធិបាលស្រុកថ្ពង បានប្រាប់តាមទូរស័ព្ទ នៅរសៀលថ្ងៃទី ១៥ ខែមិនា ឆ្នាំ២០១៦នេះថា តាមពិតនៅត្រង់ចំណុចអូរតេះភ្លូកនោះពិតជាមានសមត្ថកិច្ចម៉ូលិសសេដ្ឋក្រសួង និងមន្ត្រីរដ្ឋបាលព្រៃឈរជើងមែន ដោយមានលិខិតបញ្ជាបេសកម្មពីថ្នាក់លើ ប្រសិនបើគ្មានលិខិតបេសកម្មត្រឹមត្រូវលោកមិនអនុញ្ញាតិឱ្យទេ ប៉ុន្តែរឿងយកលុយកាត់ពីប្រជាពលរដ្ឋ រកស៊ីដឹកឈើ អុសនោះគាត់មិនច្បាស់ដែរ ។ លោកបន្តថា បញ្ហានេះលោកបានដាក់បទបញ្ជាទៅលោកអធិការស្រុកដែរឱ្យជួយតាមដានពិនិត្យមើលជុំវិញមានសមត្ថកិច្ចណាខ្លះដើរយកលុយពីពលរដ្ឋដែលរកស៊ីដឹកផលអនុផលបន្តិចតួចនោះ មិនថាតែកន្លែងអូរទេះភ្លូកនេះទេ សូម្បីកន្លែងផ្សេងៗទៀត ក៍ត្រូវពិនិត្យ ។
លោកអភិបាលស្រុកបញ្ជាក់ រឿងនេះអាជ្ញាធរពិបាកក្នុងការដេញ ឬមានចំណាក់ការលើក្រុមសមត្ថកិច្ចទាំងនោះខ្លាំងណាស់ ដោយសារពួកគាត់សុទ្ទតែមានលិខិតបញ្ជាបេសកម្មពីថ្នាក់លើធំៗ ហើយពលរដ្ឋខ្លះគាត់ឆ្លៀតរកស៊ីល្មើសច្បាប់តិចតួចមែន និងរឿងសមត្ថកិច្ចជំរិតទាលុយលោកមិនទាន់បានទទួលព័ត៌មាននេះនោះឡើយទេ ។ ចំណែកមន្ត្រីរដ្ឋបាលព្រៃឈើ និងប៉ូលិសសេដ្ឋកិច្ចក្រសួងឈរជើងឈរដេកចាំប្រមូលលុយពីការដឹកជញ្ជូនបទល្មើសព្រៃឈើដែលរាជរដ្ឋាភិបាលកំពុងតែមានចំណាត់ការទប់ស្កាត់នោះ មិនអាចទំនាក់ទំនងសុំការបំភ្លឺបានឡើយ ។
សូមបញ្ជាក់ថា រាល់ការបញ្ជាបេសកម្មរបស់ថ្នាក់លើមិនបានបញ្ជាឱ្យដើរជំរិតទាលុយពីបទល្មើស និងប្រជាពលរដ្ឋបែបនេះទេ គឺដាក់មកដើម្បីបង្ក្រាប ទប់ស្កាត់ និងត្រួតពិនិត្យរាល់បទល្មើសសេដ្ឋកិច្ចផ្សេងៗទៀត ៕
