កំពង់ធំ ៖ ហេតុការបង្ករឲ្យមានការភ្ញាក់ផ្អើលមួយបានកើតឡើងនៅក្នុងក្រុងស្ទឹងសែន ខេត្តកំពង់ធ ដោយ សារតែមានករណី បោកគ្រាប់បែកចំនួន១គ្រាប់ ចូលក្នុងផ្ទះលោក សាយ ណូរ៉ា ព្រះរាជអាជ្ញារង អមសាលា ដំបូងខេត្តកំពង់ធំ កាលពីវេលាម៉ោង ៨.១០នាទី យប់ថ្ងៃទី ១៧ ខែ
ឧសភា ឆ្នាំ ២០១៤។
បន្ទាប់ពីមានការភ្ញាក់ផ្អើល ដោយសារតែជនមិនស្គាល់មុខ បានគប់គ្រាប់បែក ពីក្រៅរបងផ្ទះរបស់ លោក សាយ ណូរ៉ា ព្រះរាជអាជ្ញារង ខេត្តកំពង់ធំ ចូលទៅក្នុងផ្ទះ បង្ករឲ្យផ្ទះលាន់ដូចគេហែកមេឃ បានធ្វើឲ្យបំនែកគ្រាប់បែក ទៅប៉ះនិងជញ្ជាំងឡើងសុះ តែសំណាងល្អ ករណីបំផ្ទុះគ្រាប់បែកនេះ ពុំបានធ្វើឲ្យមានមនុស្សរងគ្រោះនោះឡើយ ដោយសារតែនៅថ្ងៃកើតហេតុ លោក សាយ ណូរ៉ា នាំក្រុមគ្រួសារ មករាជធានី ភ្នំពេញ ហើយបានទុកផ្ទះចោល ពុំមានមនុស្សនៅ ក៏ជនមិនស្គាល់មុខ ឆ្លៀតឪកាស យកគ្រាប់បែកទៅគប់ ចូលក្នុងផ្ទះតែម្តង ។
បន្ទាប់ពីផ្ទុះគ្រាប់បែកភ្លាម ឯកឧត្តម គង់ វិមាន បានចុះទៅកន្លែកើតហេតុ ភ្លាមព្រមទាំងលោក ស្នងការ រង ព្រះរាជអាជ្ញារង និងកំលាំងសមត្ថកិច្ចស្ថាប័នពាក់ព័ន្ឋ ចូលរួមពិនិត្យក្នុងហេតុការណ៏ ។ តាមប្រភពពត៌មាន មុនពេលផ្ទុះគ្រាប់បែក មានភ្លៀងធ្លាក់ស្រេចៗ ភ្នែកបន្ទោលលាន់ម្តងម្កាល ទើបមានរថយន្តមួយគ្រឿង មិន ស្គាល់ប្រភេទ បានបើកហួសចំនុចផ្ទុះគ្រាប់បែកនោះ ប្រមាណ១០ម៉ែត្រ ក៏ស្រាប់តែលាន់ស្នូរគ្រាប់បែកផ្ទុះ ឡើងយ៉ាងកក្រើកដី នៅក្នុងរបងផ្ទះរបស់លោក សាយ ណូរ៉ា ព្រះរាជអាជ្ញារង អមសាលាដំបូងខេត្តកំពង់ធំ តែទោះជាមានការគប់គ្រាប់បែកនេះ ក៏ត្រូវបានមហាជនទូទៅខ្សឹមខ្សៀវគ្នាថា ការគប់គ្រាប់បែកនេះមិនមែន ប៉ុនប៉ងធ្វើឃាតនោះទេ តែជាការគំរាម យ៉ាងចាស់ដៃ មកលើព្រះរាជអាជ្ញារងថ្មី និងជាកិច្ចស្វាគមន៍ ។
មហាជនទូទៅបាននិយាយថា ករណីដែលមានការ គប់គ្រាប់បែកនេះ ប្រហែលជាលោក សាយ ណូរ៉ា ដែលទើបតែផ្លាសមកពីខេត្តព្រៃវែង ហើយមកអនុវត្តន៍ច្បាប់កសាងយកស្នាដៃក្នុងខេត្តកំពង់ធំ ដោយបាន ធ្វើសកម្មភាព បង្ក្រាបបទល្មើសព្រៃឈើយ៉ាងសកម្មភាព ទាំងកាតដឹកជញ្ជូន ទាំងការស្តុបទុក និងបាន ក្របួចបានវត្ថុតាង រួមមានឈើជិត១០០ម៉ែត្រគូប និងរថយន្តជាច្រើនគ្រឿង ចាប់ជនសង្ស័យដាក់ពន្ឋនាគារ ជាង១០នាក់ ក្នុងនោះលទ្ធផលដែលបង្ក្រាបបាន បានធ្វើឲ្យថ្នាក់ដឹកនាំពេញចិត្តពេញថ្លើម ញញឹមស្ទើរតែ មិនឈប់ តែវាបញ្ហារ ជាបន្លារារាំងដល់ក្រុមឈ្មួញមួយចំនួន សុទ្ធតែជាកងកម្លាំងប្រដាប់អាវុធ ដែលបានធ្វើសកម្មភាព ប្រកបមុខរបរកស៊ីឈើ បានធ្វើឲ្យក្រុមឈ្មួញប្រដាប់អាវុធទាំងនេះបានខាតបង់ផលប្រយោជន៍ ម្យ៉ាងទៀតសំណុំរឿងជាច្រើន កំពុងតែត្រូវបានស៊ើបអង្កេត ទើបក្រុមឈ្មួញទាំងនេះ មានការភិតភ័យ ហើយក៏ប្រើវិធានការស្វាគមន៍ ដោយគ្រាប់បែក ដើម្បីបង្អាក់សកម្មភាពព្រះរាជអាជ្ញា ឬអាចថាជាការកាច់ ធ្មុងក៏បានដែរ ។
ក្នុងនោះក៏មានប្រជាពលរដ្ឋជាច្រើន បាននិយាយថាតើ សកម្មភាពរបស់លោក ព្រះរាជអាជ្ញារូបនេះមានលទ្ធ ភាព ក្របួចជនដៃដល់ ដែលហ៊ានប្រមាថ លេងរបស់ធ្ងន់យ៉ាងនេះមកលើព្រះរាជអាជ្ញារូបនេះ ដើម្បីចាប់ យកមកផ្តន្ទាទោសតាមច្បាប់បានដែរឬទេ។
