ខេត្តសៀមរាប៖ មន្ត្រីសាខាកាំកុលត្រូលខេត្តសៀមរាបនិយាយថា ៖ នៅក្នុងសង្គមជាតិយើងបច្ចុប្បន្ននេះ បញ្ហាម្ហូប-ចំណីអាហារគ្រប់ប្រភេទ វាមិនត្រឹមតែស្ថិតនៅក្នុងសមរភូមិប្រកួតប្រជែងទីផ្សារប៉ុណ្ណោះទេ ប៉ុន្តែវាបានក្លាយជាសមរភូមិប្រឈមសុខភាពផងដែរ ដោយសារតែប្រភពផលិតនិងប្រភពចែកចាយមួយចំនួនមិនស្របច្បាប់ ប្រព្រឹត្តិអំពើក្លែងបន្លំ ។
លោក ជុំ ឌី វ៉ឺ រីស អនុប្រធានសាខាកាំកុលត្រូលខេត្តសៀមរាប បាននិយាយឲ្យដឹងនាព្រឹកថ្ងៃទី១៦ ខែមិនា ឆ្នាំ២០១៦នេះ ក្នុងឱកាសដែលលោកបានដឹកនាំក្រុមការងារចុះត្រួតពិនិត្យទំនិញចំណីអាហារវេចខ្ចប់រួច នៅលើបណ្តាតូបលក់ទំនិញចាប់ហួយនានាក្នុងផ្សារលើធំថ្មី(ក្រុងសៀមរាប) ដោយបង្ហាញពីការព្រួយបារម្ភ ជាមួយនឹងការព្យាយាមរបស់កាំកុលត្រូល ក្នុងភារកិច្ចត្រួតពិនិត្យឆែកឆេរ និងអប់រំដល់បណ្តាអាជីវករ ឲ្យមានការទទួលខុសត្រូវខ្ពស់ចំពោះសុខភាពរបស់អតិថិជនរបស់ខ្លួន។
លោកបញ្ជាក់ថា បច្ចុប្បន្ននេះ វាមានកត្តាជាច្រើនដែលធ្វើឲ្យការលក់ដូរទំនិញចំណីអាហារគ្រប់ប្រភេទ មិនត្រឹមតែជាសមរភូមិប្រកួតប្រជែងទីផ្សារនោះទេ ក៏ប៉ុន្តែវាជាសមរភូមិប្រឈមសុខភាពផងដែរ ដោយមានប្រភពផលិតមួយចំនួន មិនមានច្បាប់អនុញ្ញាតិត្រឹមត្រូវ តែងតែបានផលិតក្លែងបន្លំផលិតផលម្ហូបអាហារ ជ្រៀតចូលដាក់លក់លើទីផ្សារ ។
ក្នុងឱកាសនៃការចុះត្រួតពិនិត្យលើកនេះ ក្រុមការងារបានផ្តោតជាសំខាន់ទៅលើការអប់រំពន្យល់ ដល់បណ្តាអាជីវករឲ្យព្រមទទួលយល់និងអនុវត្តឲ្យមានប្រសិទ្ធិភាព លើជំនាញពិនិត្យជ្រើសរើសទំនិញចំណីអាហារវេចខ្ចប់រួច ដើម្បីដាក់លក់រាយជូនអតិថិជនរបស់ខ្លួន ។ មន្ត្រីជំនាញនិយាយថា ៖ រាល់បញ្ហាប៉ះពាល់សុខភាពដែលកើតមានឡើង គឺអ្នកលក់ត្រូវទទួលខុសត្រូវផ្ទាល់ចំពោះមុខច្បាប់ បើសិនជាមានពាក្យបណ្តឹងចេញពីអតិថិជន ដែលជាជនរងគ្រោះនោះ ។
បើទោះជាមានការត្រូតពិនិត្យជាញឹកញាប់ ពីសំណាក់ក្រុមការងារសាខាកាំកុត្រូលខេត្តសៀមរាប នៅលើទីផ្សារនានាក្នុងក្រុងឬបណ្តាទីប្រជុំជននានាក្នុងខេត្តសៀមរាប គេមិនដែលប្រទះឃើញក្រុមការងារនេះ ពិន័យឬក៏ដកហូតយកទំនិញដែលរកឃើញថាខូចគុណភាពនោះឡើយ ដែលភាគច្រើននោះ គឺក្រុមការងារនេះគ្រាន់តែអប់រំ ហើយបញ្ជាឲ្យម្ចាស់អ្នកលក់ ដកទំនិញខូចគុណភាពទាំងនោះចេញ បញ្ឈប់អំពើក្លែងបន្លំតទៅទៀត តែប៉ុណ្ណោះ ។ លោកប្រធានក្រុមការងារនេះ បានបញ្ជាក់ដែរថា ៖ គោលដៅសំខាន់របស់កាំកុងត្រូល លើការងារសម្អាតទំនិញខូចគុណភាពលើទីផ្សារ គឺការយល់ដឹង និង ការចូលរួមទាំងអ្នកលក់ និងអ្នកទិញ ។ អ្នកលក់ត្រូវមានភាពស្មោះត្រង់ និងអ្នកទិញត្រូវចេះស្រឡាញ់សុខភាពខ្លួនឯង គឺត្រូវចេះពិនិត្យជ្រើសរើសចំណីអាហារ ដែលមានសុវត្ថិភាព ៕
