(កំពង់ចាម) នារីម្នាក់ត្រូវគេប្រទះឃើញដេកសន្លប់នៅតាមផ្លូវលំ ស្ថិតនៅភូមិក្រឡែងកើត ឃុំស្វាយរាប ស្រុកចំការលើ ខេត្តកំពង់ចាម កាលពីវេលាម៉ោង១២និង៣០នាទី ថ្ងៃទី១៦ ខែមីនា ឆ្នាំ២០១៦។លោក អ៊ិត តារា អធិការនគរបាលស្រុកចំការលើបានឲ្យដឹងថា នៅវេលាម៉ោង១២និង៣០នាទី ថ្ងៃទី១៦ ខែមីនា ឆ្នាំ២០១៦ សមត្ថកិច្ចបានទទួលព័ត៌មានថាមាននារីម្នាក់មិនស្គាល់អត្តសញ្ញាណដេកសន្លប់នៅកន្លែងខាងលើ។
ភ្លាមនោះសម្ថកិច្ច បានចុះទៅកន្លែងកើតហេតុ នាំស្ត្រីរងគ្រោះមកសង្គ្រោះនៅមន្ទីរពេទ្យបង្អែកស្រុកចំការលើ។
ក្រោយពីដឹងខ្លួននារីរងគ្រោះបានប្រាប់ថា នាងមានឈ្មោះ កយ ស្រីកា អាយុ២១ឆ្នាំ មានទីលំនៅភូមិស្ទឹង ឃុំកោងកាង ស្រុកពញាក្រែក ខេត្តត្បូងឃ្មុំ។
នាងបានបញ្ជាក់ថា ម្តាយរបស់នាងបានស្លាប់យូរហើយ ចំណែកឪពុកបានយកប្រពន្ធថ្មី ហើយរស់នៅជាមួយគ្នានៅខេត្តរតនគីរី។ ក្រោយមកនាង (ស្រីកា) ក៏មានជម្ងឺផ្លូវចិត្តធ្ងន់ធ្ងរ ស្មារតីមិនប្រក្រតី ហើយត្រូវ អង្គការមួយយកនាងទៅនៅភ្នំពេញតែនាងមិនចាំអង្គការនោះឈ្មោះអីទេ។
នាងស្រីកា បន្តថា ថ្មីៗនេះ នាងបានរត់ចេញពីអង្គការនោះ ហើយមកដល់ខេត្តកំពង់ធំ។
នៅថ្ងៃទី១៦ ខែមីនា ឆ្នាំ២០១៦ វេលាម៉ោងប្រហែល ៨ព្រឹក នាងបានសុំរថយន្តគេជិះ ដែលក្នុងរថយន្តនោះមានមនុស្សប្រុស៤នាក់។ នៅពេលធ្វើរដំណើរតាមផ្លូវនាងត្រូវគេបញ្ច្រកថ្នាំ ហើយនាមក៏ត្រូវបាត់ស្មារតី តែដឹងថា នាងត្រូវគេរំលោភសេពសន្ថវៈ។
លោកអធិការ បន្តថា តាមការពិនិត្យធ្វើកោសល្យវិច័យរបស់គ្រូពេទ្យ បញ្ជាក់ថា នាងស្រីកាត្រូវគេរំលោភសេពសន្ថវៈមែន។
ស្ត្រីរងគ្រោះបាននិងកំពុងសំរាកព្យាបាលនៅមន្ទីរពេទ្យបង្អែក ស្រុកចំការលើ រង់ចាំនាងជាសះស្បើយនឹងបញ្ជូនទៅស្រុកកំណើតវិញ។
