ខេត្តសៀមរាប៖ នៅលើទីលានប្រកួតកីឡាបាល់ទាត់ ក្នុងដែនដីវប្បធម៌ប្រវត្តិសាស្ត្រអង្គរ-សៀមរាប ក្រុមកីឡាករសៀមរាប-អង្គរក្នុងឯកសណ្ឋាន អាវ ស ខោ ស និងស្រោមជើងពណ៌ខៀវ នារសៀលថ្ងៃទី១៦ ខែមិនា ឆ្នាំ២០១៦ បានឈរជើងក្នុងឋានៈជាម្ចាស់ផ្ទះ ទទួលស្វាគមន៍ក្រុមកីឡាករកងរាជអាវុធហត្ថខេត្តកំពង់ធំ ដែលមានឯកសណ្ឋាន អាវខៀវ ខោខៀវ និងស្រាមជើងពណ៌ខៀវ ។នេះគឺជាការប្រកួតបាល់ទាត់ជើងទី២ ដណ្តើមពានរង្វាន់សម្តេចអគ្គមហាសេនាបតីតេជោ ហ៊ុនសែន លើកទី១០ (ឆ្នាំ២០១៦) ដែលក្នុងពេលជាមួយគ្នានេះ នៅកីឡាដ្ឋានខេត្តឧត្តរមានជ័យ ក្រុមកីឡាករម្ចាស់ផ្ទះ ជួបប្រកួតជាមួយ ក្រុមកីឡាករខេត្តព្រះវិហារ ។
នៅលើទីលានប្រកួតខេត្តសៀមរាប ក្នុងនាទី ទី២៦ កីឡាករកងរាជអាវុធហត្ថខេត្តកំពង់ធំ ( គង់ មិថុនា ) ពាក់ស្លាកលេខ ១១ ព្រមានម្ខាស់ផ្ទះ១គ្រាប់ ។ ១០នាទីបន្ទាប់ កីឡាករ មុត វណ្ណា ពាក់ស្លាកលេខ ១០ ប្រចាំក្រុមកីឡាកងរាជអាវុធហត្ថខេត្តកំពង់ធំ មានឱកាសស្វាគមន៍ម្ចាស់ផ្ទះបន្ថែម១គ្រាប់ទៀត ។ ចប់តង់ទី១ លទ្ធផលបណ្តោះអាសន្ន ( កំពង់ធំ ២ – សៀមរាប ០ ) ។
ចូលដល់តង់ទី២ ក្នុងនាទី ទី៥២ កីឡាករ ថន សីហា ពាក់ស្លាកលេខ ៧ របស់ក្រុមសៀមរាប-អង្គរ ទាត់បាល់ពិន័យ១១ម៉ែត្របានសម្រេច ទូទាត់ជូនភ្ញៀវ១គ្រាប់វិញ ។ 
នៅនាទី៦០ កីឡាករ តាំង ពិសី ពាក់ស្លាកលេខ ៣ នៃក្រុមម្ចាស់ផ្ទះ បានរកឃើញលទ្ធផលបន្ថែម១គ្រាប់ទៀត សម្រាប់ក្រុមរបស់ខ្លួន ។ នៅក្នុងម៉ោងចុងក្រោយនេះ គេសង្កេតឃើញក្រុមកីឡាករសៀមរាប-អង្គរ មានកម្លាំងចិត្តកាន់តែខ្លាំងឡើង ក៏ប៉ុន្តែធ្វើមិនបានសម្រេច លើក្រុមជើងខ្លាំងមកពីខេត្តកំពង់ធំ ។ ចុងបញ្ចប់នៃការប្រកួតលើកនេះ ក្រុមទាំង២នេះ ទទួលលទ្ធផលជាផ្លូវការស្មើគ្នា ( ២ ទល់នឹង ២ ) ។
សម្រាប់ថ្ងៃទី២៣ មិនាខាងមុខ ក្រុមកីឡាបាល់ទាត់សៀមរាបអង្គរ នឹងត្រូវធ្វើដំណើរជាភ្ញៀវ ទៅជួបជាមួយក្រុមកីឡាបាល់ទាត់ ខេត្តឧត្តរមានជ័យ ជាម្ខាស់ផ្ទះ ។ ចំណែកឯ ក្រុមកីឡាករកងរាជអាវុធហត្ថខេត្តកំពង់ធំ ក៏មានដំណើជាភ្ញៀវ ទៅជាន់តារាងខេត្តព្រះវិហារ ផងដែរ ៕ ដោយគឿនវេត
