ភ្នំពេញ៖ បុរសម្នាក់បានរងរបួសធ្ងន់ខណៈដែលកំពុងជិះម៉ូតូក៏ត្រូវរថយន្តឡង់គ្រីស័រមួយគ្រឿងបុកចំពីក្រោយពេញទំហឹង កាលពីវេលាម៉ោង១និង៤៥នាទីរំលងអាធ្រាត្រឈានចូលថ្ងៃទី១៨ខែឧសភាឆ្នាំ២០១៤ តាមបណ្ដោយផ្លូវមុនីរ៉េត ស្ថិតក្នុងសង្កាត់ផ្សារដើមគរ ខណ្ឌទួលគោក។ ប្រភពព័ត៌មានពីកន្លែងកើតហេតុបានអោយដឹងថា នៅមុនពេលកើតហេតុមានបុរសម្នាក់ជិះម៉ូតូមួយគ្រឿងម៉ាកហុងឌ្រីម ធុនសេ១២៥ ពណ៌ខ្មៅ ពាក់ស្លាកលេខ ភ្នំពេញ 1BP-4382 ជិះធ្វើដំណើរតាមបណ្ដោយ
ផ្លូវមុនីរ៉េត ទិសដៅពីជើងទៅត្បូង ខណៈមកចំណុចក្បែរសណ្ឋាគាររ៉ូយ៉ាល់ផាឡេស ស្រាប់តែមានរថយន្តមួយគ្រឿងម៉ាកឡង់គ្រីស័រ មិនចាំស្លាកលេខ ជិះធ្វើដំណើរពីក្រោយម៉ូតូក្នុងល្បឿនលឿនបានបុកម៉ូតូជនរងគ្រោះចំពីក្រោយពេញទំហឹងបណ្ដាលដួលបោកនិងថ្នល់រងរបួសធ្ងន់ ចំណែករថយន្តបង្កបន្ទាប់ពីបង្កហេតុបានបន្ថែមល្បឿនបើករត់គេចបាត់ស្រមោល។
បន្ទាប់ពីកើតហេតុប្រហែលជាជិត២០នាទីរថយន្តដែលបង្កហេតុខាងលើបានបើកគេចខ្លួនមកដល់ផ្ទះរបស់ខ្លួនលេខ17 នៅចំណុចច្រកចូលផ្លូវដោនថោន កែងនិងផ្លូវឌួងងៀប នៅសង្កាត់ទឹកថ្លា ខណ្ឌសែនសុខ ហើយដោយមានប្រជាពលរដ្ឋដែលឃើញហេតុការណ៍នេះជិះម៉ូតូដេញតាមរហូត មកផ្ទះម្ចាស់រថយន្តនេះដែរ។
ប្រជាពលរដ្ឋបានអោយដឹងទៀតថា គាត់បានឃើញរថយន្តបង្កហេតុខាងលើនេះចូលទៅក្នុងផ្ទះលេខ១៧នេះច្បាស់ណាស់ហើយខណៈនោះផងដែរ ម្ចាស់រថយន្តបង្កបានដកកាំភ្លើងបាញ់ចំនួន២ទៅ៣គ្រាប់ឡើងលើហើយក៏បិតទ្វារផ្ទះចូលទៅក្នុងបាត់តែម្ដង។ ក្រោយពេលកើតហេតុជនរងគ្រោះត្រូវបានរថយន្តសាមុយរបស់មន្ទីរពេទ្យឯកជនដឹកយកទៅសង្គ្រោះនៅ
មន្ទីរពេទ្យភ្លាមៗ ហើយសមត្ថកិច្ចចរាចរខណ្ឌទួលគោកបានចុះមកដល់ផ្ទះដែលរថយន្តបង្កហេតុនោះបើកចូល ប៉ុន្តែសមត្ថកិច្ចមិនហ៊ានចូលទៅសាកសួរឡើយបានត្រឹមតែឈរពីចំងាយ ទោះជាមានប្រភពព័ត៌មានពីប្រជាពលរដ្ឋយ៉ាងណាក៏ដោយ៕
